1 TESALONICENSES 4

1Chavay, ketʼalaqaunin, klalhijunau y klatapayniniyau por kiJalhachimoʼonukʼan Jesús ni katʼiʼukxuntʼayatʼik tacha klamasuniu. Maqskʼiniy katʼiʼukxuntʼayatʼik tacha kalhipaʼinil ni Dios. Chuncha katʼaylhipʼintʼik tacha tʼiʼukxuyanantʼik pero chavay apalay ox kʼamakʼatʼik. 2Kʼatsʼayatʼik yu klalhijuniu la ixtaqaʼuti ni kiJalhachimoʼonukʼan Jesús. 3Dios najun ni katʼatʼiʼukxuntʼayatʼik tacha paxtoqniy ixlapanakni Dios. Jantu katʼatʼamatʼik matichun yu jantu minavinkʼan. 4Kʼamispʼatʼik tacha maqskʼiniy kʼalhitsʼukʼu mixanati para ixnavin Dios kʼaʼuntʼik y ox katʼoʼoyatʼik. 5Jantu valiʼiy kʼamakʼatʼik yu makʼapʼutʼunatʼik la milakatunajkʼan tacha tamakay yu jantu tamispay Dios. 6Ex chuncha jantu matichun kamakanumaxtunil yu ixnavin ixlaqaj. Ni kiJalhachimoʼonukʼan kalaqmamaqanlqajnivayaʼ yu chuncha talay. Va chuncha klalhixaqalau y chuncha klalhichimoʼoo. 7Ni Dios jantu kintajuntaʼin para kalaktuʼunuu, va kintajuntaʼin ni katiʼukxuntayau tacha paxtoqniy ixlapanakni. 8Yu akchʼintamay ni aniy chivinti yucha jantu lapanaki akchʼintamay. Yucha akchʼintamay Dios yu kintaxtaqnin ni Espíritu Santo. 9Jantu maqskʼiniy klatsʼoqniyau para kʼalapʼaxkʼatʼik mintʼalaqauninkʼan. Ni Dios yucha tamalanin para kʼalapʼaxkʼatʼik. 10Laqsaval ayaj japʼaxkʼayatʼik tachun mintʼalaqauninkʼan yu xalakatʼun Macedonia. Pero klalhitapayniyau ni apalay kapʼaxkʼanantʼik. 11Oxamaktaun kʼalatʼatʼaulatʼik, kʼamakʼatʼik milhitapatsakʼan yu tapaxtoqniyan, kʼatʼapʼatsʼatʼik la mimakakʼan tacha yu klajuntau. 12Ex chuncha katatoʼoyayan yu jantu talhakapuʼan y jantu tuʼuchun katatsʼanqaniyan. 13Ketʼalaqaunin, va iknaunau kakʼatsʼatʼik tisuncha tatapasay yu jantucha katakujlhi para jantu kamaʼaninintʼik tacha lapanakni yu jantu tuʼuchun tapakxanʼiy. 14Va lhakapuʼanau ni Jesús va nil y kujchoqol. Vachu va chun lhakapuʼanau ni Dios kalaklhiminaʼ tachun yu tanitacha yu ixtalhakapuʼan Jesús. 15Xlhiyucha klajunau yu naul ni kiJalhachimoʼonukʼan. Ni kijnankʼan yu vananaj tʼaunau tejkan kaminchoqoyaʼ ni Jesús jantu kapʼulayau kun yu tanitacha. 16Ni kiJalhachimoʼonukʼan kaminanta laktʼiyan, kamatʼasananaʼ y yu xaʼukxtin ixmayulnin la pʼas kachivinaʼ y kasqolkanaʼ isqol Dios. Ex chuncha pʼunaj yu tanitacha yu talhakapuʼal ni Cristo yuʼuncha katakujʼelayaʼ. 17Ex kijnankʼan yu vananaj kujtau vachu kalhaʼankanau chʼantaun kun yuʼuncha laka taputsʼi. Ex chuncha kapaxtoʼau ni kiJalhachimoʼonukʼan laktʼiyan. Ex mas va tavanancha katʼaʼalinau ni kiJalhachimoʼonukʼan. 18Xlhiyucha kalamalakʼaʼulatʼik kun yu aniy chivinti.

will be added

X\