1 TESALONICENSES 3

1Va keʼemankʼan iktamakajuu laka putaulan Atenas, pero jantucha xaktayaniyau por ayaj xaklalaqʼuxaʼanau. 2Ex chuncha ikmalaqachau katalaqʼan kilaqajkʼan Timoteo. Yucha ixʼoqxtamati Dios y kintatʼatapatsayan para kalaqputeʼekal yu ox chivinti yu lhichiviniy Cristo. Ikmalaqachau para kataxaqalan para apalay ox kaval milhakapuʼatkʼan. 3Ex jantu matichun lay katamamakaunin milhakapuʼatikʼan por yu jamaqanlqajnati. Kʼatsʼayatʼikcha ni kintapaxtoqniyan jamaqanlqajnati. 4Tejkan ancha xaklatʼavilanau va xaklajunau ni kaʼalinaʼ taun maqanlqajnati. Kʼatsʼayatʼikcha ni va chuncha val. 5Ayaj xaklalaqʼuxaʼanau va tus jantucha lay kaktayanil, va klamalaqachaniu ni Timoteo para kajkʼatsal tas junitacha milhakapuʼatikʼan. Xaktalhananau incha katamakanun ni aqmoqxnuʼ, ex valiʼiy kaval kilhitapatskʼan kun uxiknankʼan. 6Pero chavaycha va chinchoqol ni Timoteo. Lhimil taun ox chivinti va kintajunan va la ox alintʼatʼik por milhakapuʼatkʼan ali mijapaxkantikʼan. Vachu kintajunan va kilapastakʼau kijnankʼan y ayaj kilalaqtsʼinputunau vachu va chun tacha kijnankʼan klalaqtsʼinputunau ni uxiknankʼan. 7Xlhiyucha, ketʼalaqaunin, mas va lhitaʼaycha iktapasayau y ikmaqanlqajnanau, va oxamaktaun ijkuu tejkan ijkʼatsau ni ox milhakapuʼatkʼan. 8Chavaycha klhiʼachantajuyau ni ox tʼaylhipʼintʼatʼik kun ni kiJalhachimoʼonukʼan Dios. 9Va ikxtaqniyau lhimalaqpuchuncha ni Dios por uxiknan y ayaj klalhiʼachantajuyau tejkan ikskʼinau Dios. 10Mas va putsʼis mas va tunkuj, va ikskʼinau Dios para lay kaklalaqtsʼinchoqoo y kaklaʼaqtayjuu yu vananaj tsʼanqay la milhakapuʼatkʼan. 11Chavaycha va iknaunau kintaʼaqtayjun ni kimPay Dioskʼan ali kiJalhachimoʼonukʼan Jesucristo para kaklalaqʼanchoqoo. 12Vachu ikskʼinau ni Jalhachimoʼonu para apalay ox kalapʼaxkʼatʼik y vachu ox kʼalakpʼaxkʼatʼik tachun ni lapanakni, vachu va chun tacha kijnankʼan klapaxkayau. 13Ex chuncha lay katʼayanitʼik y la melhanutkʼan, jantu kaʼalil tuʼuchun laqtaqal. Chuncha katalaqaʼiyan kimPay Dioskʼan tejkan kaminchoqoyaʼ ni kiJalhachimoʼonukʼan Jesucristo kun tachun ixlapanakni.

will be added

X\