1 TESALONICENSES 2

1Ketʼalaqaunin, kʼatsʼayatʼik ni tejkan klalaqkilau jantu valiʼiy kaval. 2Laka putaulan Filipos ikmaqanlqajnau y klaktanchanikau pero klajuniu ni ox chivinti yu kintaxtaqnin Dios. Yucha kintamaʼayajnin, xlhiyucha klaqputeʼeu mas kintaxkajin ni lapanakni. 3Tejkan klaxaqalau va klajuniu yu laqsaval. Jantu klajuniu yu jantu ox kaval y jantu klamakanuu. 4Ni Dios ox lhilay kilhitapatsakʼan xlhiyucha kintamalaqachan puteʼenin ni ox chivinti. Xlhiyucha jantu ikputeʼeyau para katalhipaʼinil ni lapanakni, va para kalhipaʼinil ni Dios yu kintalaqtsʼintanuniyan kelhanutkʼan. 5Kʼatsʼayatʼik ni jantu aqtaun klaxaqalau kun valiʼiy kʼus chivinti para kalhiʼachʼantʼaʼutʼik, vachu jantu klamakanuu kun chivinti para kaklhajau tumin. Ni Dios yucha kʼatsaycha. 6Jantu kaknajuu kilatoʼoyau uxiknankʼan vachu jantu kaknajuu kintatoʼoyan alati lapanakni, mas lay kaknajuu kaktoʼoyakau va por ixtamalaqachan Cristo kuntau. 7Ni kijnankʼan va laka laksniy kʼukxuyanau kun uxiknan vachu va tacha qayntaun ox xanati laklhistakʼa sasʼatʼan. 8Va ayaj ox klapaxkau. Xlhiyucha jantu vamun klaxtaqniu ni ox chivinti, va klaxtaqniu tus la ketsukuntikʼan, va por ayaj klaʼachaniu. 9Ketʼalaqaunin, pʼastʼakʼatʼik yu lhitaʼay lhitapatsa yu ikmakau. Va iktapatsau tsʼis, tunkuj para kaʼalil yu xakmaqskʼiniyau. Va para jantu klamaqanchapuu tejkan xaklalaqputeʼeniyau ni ox chivinti yu lhinajun Dios. 10Uxiknankʼan kʼatsʼayatʼik y vachu yu Dios kʼatsay ni xaktiʼukxuyanau tacha paxtoqniy ixlapanakni Dios. Vas xakʼukxuyanau, jantu tuʼuchun laqtaqal xakmakayau. 11Klaxtaqniu jatapastakʼati y klamalakaʼulau tachun uxiknan vachu va tacha qayntaun xapay kun sasʼatʼan. 12Klalhixaqalau katʼiʼukxuntʼayatʼik tacha paxtoqniy yu ixnavin Dios. Yucha tajuntaʼiyan para kʼatʼanutʼik taʼan lhachimoʼonun taʼan tasuy kun tachun ixʼayaxtu. 13Xlhiyucha va tacha ikxtaqniyau lhimalaqpuchuncha ni Dios. Tejkan asmaktʼik ni chivinti yu klalaqputeʼeniu va laʼaʼitʼik jantu tacha valiʼiy ixchivinti lapanakni. Va laʼaʼitʼik tacha yu laqsaval ixchivinti Dios. Yucha taʼaqtayjuyan la metsukuntikʼan yu lhakʼapʼupʼinatʼik. 14Uxiknan, ketʼalaqaunin, aqtʼaynitʼik tiʼukxuntayaniy vachu va tacha yu alati ixlapanakni Dios xalakatʼun Judea yu talhakapuʼan Jesucristo. Uxiknan maʼanlʼajnantʼik la ixtamakakʼan mintʼamachaqankʼan vachu va tacha ancha Judea ixtʼaʼisraelitaskʼan tamaqanlqajnal. 15Yuʼuncha tamaqnil ni kiJalhachimoʼonukʼan Jesucristo y jalaqmaqnil yu maqancha ixtalaqputeʼey ixchivinti Dios. Vachuʼ kintatixkaulhaʼan. Jantu lhipaʼiniy ni Dios yu tamakay, va taxkajiy tachun ni lapanakni. 16Laqatapʼasta tamakay para jantu lay kaklaqputeʼeniu tas lay katapulaqtaxtul yu lapanakni yu jantu israelitas kataval. Ex chuncha yu anchanu israelitas yu jantu talhakapuʼan va apalay talhavay ixlaqtaqalkʼan. Pero chavaycha ni Dios laqtalqauniycha. 17Ketʼalaqaunin, jantukaʼ maqan jun tejkan klamakajuu. Mas jantu klatʼataulau pero va chʼantaun kelhanutkʼan. Kmakau laqatapʼasta para kaklalaqʼanchoqoo. Ayaj xaknaunau klalaqapulaqtsʼinchoqoo pero jantu kalal. 18Va xaklalaqʼuxaʼanchoqoyau. Ni kitʼin Pablo aqlhuvaj xakʼuxaʼanachal pero ni Satanás makal para jantu lay kajkʼanchaʼau. 19Va ikpakxanʼiyau ni achati ali ayaxtu yu kaklhajayau. ¿Valiʼiycha kaklalhiʼachantajuyau y ox kajkʼatsanau? Va por ox kaʼunapitik anchanu julchan tejkan kaminchoqoyaʼ ni kiJalhachimoʼonukʼan Jesús. 20Chuncha va ox ijkʼatsanau y kʼachanau por uxiknan.

will be added

X\