1 PEDRO 3

1Vachu uxiknan xanatin yu lakxtʼuklatʼatʼikcha kaʼalasmaktʼik mixapaykʼan. Ex chuncha mas lati jantukaʼ taqasmatʼa ixchivinti Dios lay kamaʼalhaʼatʼik para katalhakapuʼal. Jantu kamaʼalhaʼatʼik kun chivinti, vamun por mimputsukukʼan, 2tejkan talaqtsʼinan ni ox tsʼukʼuyatʼik y tʼoʼoyananatʼik. 3Milhapaʼinkʼan jantu kaval vamun yu milhilakataykʼan ali mijaʼoqlnutkʼan ali yu oro o yu laqchʼiti yu la laqlhuu. 4Yu milhapaʼinkʼan kaval yu jantu miʼojoy, yu kaʼalil ixpulakna la melhanutkʼan, yu ox maqantaulnaʼ y oxamajʼay. Va yucha ni Dios laqtsʼin tacha ayaj ixtapal kaval. 5Chuncha ixtalhilakatayay ni xanatin yu maqancha ixtatʼajun. Ox ixtalhakapuʼan Dios, va ixtaqalasmatʼa ixapaykʼan. 6Chuncha ni Sara ixqalasmatʼa ni ixapay Abraham y ixjuniy tacha ixʼukxtin. Uxiknan va tacha Sara untʼatʼik incha makʼayatʼik yu lajʼoxi y jantu katʼalhanantʼik. 7Vachu va chun uxiknan yu xapaynin untʼatʼik, lajqalʼoxin kʼaʼuntʼik kun mixanatikʼan kun ox jatapastakʼati. Ox katʼoʼoyatʼik mixanatikʼan tacha qayntaun yu jantu laqapʼas kaval. Va kun yuʼuncha laʼaʼiyatʼik ni ox jatsukunti yu taxtaqniyan Dios. Chuncha kʼamakʼatʼik para jantu katsʼanqal yu skʼiniyatʼik Dios. 8Aniy tamaktaycha yu klajunau. Mintachunkʼan maqskʼiniy chʼantaun kʼaʼuntʼik la mejatapastakʼatkʼan y ox kʼalamapʼaynitʼik. Kalapʼaxkʼatʼik tacha tʼalaqaunin, lajqalʼoxin kʼaʼuntʼik y kamalakʼatʼunikʼantʼik. 9Incha jantu ox tamakaniyan, ex jantu maqskʼiniy kʼalakmaspʼiknichʼoʼotʼik yu jantu ox. Incha talaktuʼuyan jantu maqskʼiniy kʼalaktʼuʼuchʼoʼotʼik, va kaskʼinitʼik Dios yu lajʼoxi la ixjatsukuntikʼan. Ni Dios tajuntaʼin uxiknan para kʼalaʼaʼitʼik yu lajʼoxi. 10La ixchivinti Dios najun: Yu lhitsukuputun achati, yu najun kaʼalil yu lajʼoxi la ixjatsukunti, yucha maqskʼiniy kalhistaklhi ixkil para jantu kachivinil yu jantu ox, jantu maqskʼiniy kakiltaxtul yu jamakanunti. 11Maqskʼiniy kamakauntijlal yu jantu ox y kamakal yu lajʼoxi. Tsʼanqay kapuxkaul tas lay laqalajʼox katalatʼataulal kun yu alati. 12Ni Jalhachimoʼonu ox jalaklhistakʼa yu jalaqtsʼin tacha ox lapanakni. Ox lajqasmakniy tejkan taskʼin tuʼuchun. Pero jantu ox jalaqtsʼin yu talaktuʼunun. 13¿Taʼayucha katamakaniyan yu jantu lajʼoxi incha vamun makʼapʼutʼunatʼik yu lajʼoxi? 14Pero incha tuʼuchun kʼalhitʼapʼasatʼik por makʼayatʼik yu ox, ex kalaʼaʼiyapitik yu ox la metsukuntikʼan. Xlhiyucha jantucha katʼalhaunitʼik matichun, jantu katʼalhanantʼik. 15Kʼatʼoʼoyatʼik ni Dios tacha miJalhachimoʼonukʼan la melhanutkʼan. Listujcha kʼaʼuntʼik para lay kʼaʼalhtʼiyanantʼik tejkan talhisakmiyan valiʼiycha pʼakxanʼiyatʼik ni Dios. Pero kʼamalakʼatʼunikʼantʼik y katʼoʼoyanantʼik tejkan alhtʼiyananatʼik. 16Kʼamakʼatʼik kuenta ni jantu kʼalhitsʼukʼutʼik laqtaqal. Ex chuncha mas talaktuʼuyan y tamukʼaniyan laqtaqal, katalaqtsʼinaʼ ni ox tʼiʼukxuyanantʼik kun Cristo. Xlhiyucha va xʼamankʼan katalhitamaxaniyaʼ ixchivintikʼan. 17Incha Dios najun ni kʼamaʼanlʼajnantʼik, kaval por makʼayatʼik yu ox, jantu por makʼayatʼik yu jantu ox. 18Vachu chun ni Cristo va aqtauncha maqanlqajnal por kintalaqalhinkʼan, yu ox lapanaki nil por kijnan yu jantu ox juntau para lay ox katsukuu kun Dios. Va maqnikal la ixlakatunaj pero majkujuchoqokal la ixlhitsukunuʼ. 19Chuncha la ixlhitsukunuʼ laqkilaqputeʼenil taʼan lakchʼikanta ixlhitsukunukʼan ni lapanakni yu ixtanitacha. 20Va yuʼuncha yu jantu ixtaqalasmaknan maqancha tejkan Dios vananaj ixmaqanvil tejkan Noé ixtʼajun makanaʼ ni ay barco. Va yucha tapulaqtaxtul vamun qayntsajin lapanakni, va taxajchal tejkan jalaqmixnil kun xkan. 21Ni anchanuʼ xkan va tacha ni aqchajʼauti yu chavaycha pulaqtaxtuyau. Yu aqchajʼauti jantu vamun ixchaʼaka kilakatunajkʼan kaval. Va masuy ni jantucha kintamukʼaniyan laqtaqal y chuncha skʼiniyau Dios. Kujchoqol ni Jesucristo, va xlhiyucha laqtaxtuyau. 22Va pataxtuchoqol laktʼiyan y chavay vil la ixlhijakanaj kimPay Dioskʼan. Ancha laklhichimoʼoy tachun ixmayulnin Dios kun xalhachimoʼonun laktʼiyan y tachun yu talhitʼajun tapʼasta.

will be added

X\