1 JUAN 5

1Yu talhakapuʼan ni Jesús va yu Cristo yu malaqachal ni Dios, yuʼuncha va sasʼatʼan Dios. Incha achaniyau yu kimPay Dioskʼan ex vachu maqskʼiniy kapaxkaniu sasʼatʼan. 2Licha achaniyau ni Dios y makayau yu tacha lhinajun ni yucha, ex chuncha kʼatsayau ni laqsaval paxkayau yu sasʼatʼan Dios. 3Incha achaniyau ni Dios ex makaniyau yu tacha lhinajun ixlhachimoʼon. Jantu lhitaʼay kaval kamakau ixlhachimoʼon. 4Tachun yu tajunita sasʼatʼan ni Dios, yuʼuncha tamaqalhajay ni xajatapastakʼati ni lakamunukpaʼ. Va por kilhakapuʼatikʼan maqalhajayau xajatapastakʼati ni lakamunukpaʼ. 5Taʼayu yu lhakapuʼan ni Jesús va Sasʼatʼa Dios junita, yucha lay maqalhajay xajatapastakʼati ni lakamunukpaʼ. 6Tejkan kilachil ni Cristo ni aniy lakamunukpaʼ va aqchajʼaul y tejkan maqnikal va taxtul ixjakʼalna. Chuncha yu xkan kun ni jakʼalna kintamasuniyan ni Jesucristo va laqsaval Sasʼatʼa Dios junita. IxʼEspíritu Dios najun yu laqsaval y yucha kintamasuniyan ni laqsaval kilachil Sasʼatʼa Dios ni aniy lakamunukpaʼ. 7Laktʼiyan alin putʼutu yu chuncha kintamasuniyan. [Va yu kimPay Dioskʼan ali yu Sasʼatʼa Dios ali yu ixʼEspíritu Dios. Por ixlaʼatʼutukʼan va putaun junita. 8Vachuʼ lakamunukpaʼ putʼutu alin yu chuncha kintamasuniyan.] Va yu ixʼEspíritu ni Dios ali yu xkan ali yu jakʼalna. Por putʼutu va chʼantaun jun. 9Lhakapuʼanau qayntaun lapanaki tejkan kintalaqputeʼeniyan. Pero yu kintamasuniyan ni Dios yucha apalay lhitʼajun tapʼasta, y ni Dios va kintalaqputeʼeniyan ni Jesús va Sasʼatʼa. 10Taʼayu yu lhakapuʼan ni Sasʼatʼa Dios, yucha laqaʼiy la ixjalhanuti yu laqputeʼey ni Dios. Taʼayu yu jantu lhakapuʼan ni Dios, yucha juniy ni Dios va jalaklkanan, va jantu lhakapuʼan yu lhichivinil ni Dios yu Sasʼatʼa. 11Ni Dios kintalaqputeʼenin ni kintaxtaqnitan jatsukunti yu jantu aqtaun kamiʼoyaʼ. Yu aniy jatsukunti minachal kun Sasʼatʼa. 12Taʼayu yu tʼaʼan Sasʼatʼa Dios, yucha lhitʼajun yu jatsukunti yu jantu aqtaun kamiʼoyaʼ. Pero yu jantu tʼaʼan yu Sasʼatʼa, yucha jantu kalhitsukul anchanuʼ jatsukunti. 13Chuncha klatsʼoqniyau ni uxiknankʼan yu lhakapupʼinatʼik Sasʼatʼa Dios para kakʼatsʼatʼik ni lhitʼaunatʼik jatsukunti yu jantu aqtaun kamiʼoyaʼ. 14Jantu talhauniyau Dios, va kʼatsayau ni kintaqalasmakyan tejkan skʼiniyau yu lhipaʼiniy. 15Ex licha kʼatsayau ni laqsaval kintaqalasmakyan tejkan skʼinau, ex chuncha pukʼatsayau ni lhitʼaunaucha yu skʼiniyau. 16Incha matichun laqtsʼin ixlaqaj ni tʼajun makan talaqalhin yu jantu jalhaʼanan laka lhinin, ex maqskʼiniy kaskʼinil Dios por ixlaqaj. Dios kamaqxtaqniyaʼ ixlaqaj yu ox jatsukunti. Va klhichiviniy yu laqtaqal yu jantu jalhaʼanan laka lhinin. Alin laqtaqal yu jalhaʼanan laka lhinin. Jantu maqskʼiniy kaskʼinkal Dios por ni lapanaki yu makay ni anchanu laqtaqal. 17Tachun yu jantu lajʼoxi tamakay ni lapanakni va laqtaqal. Pero alin laqtaqal yu jantu jalhaʼanan laka lhinin. 18Kʼatsayau yu laqsaval sasʼatʼa Dios junita, ni yucha jantu taylhaʼan makanaʼ laqtaqal. Ni Cristo yu Sasʼatʼa Dios, yucha lhistakʼa y yu aqmoqxnu jantu tuʼuchun lay makaniy. 19Kʼatsayau ni sasʼatʼan Dios juntau. Yu jantu talhakapuʼan Dios, yuʼuncha tatijuyanal la ixlhachimoʼon ni aqmoqxnuʼ. 20Vachu kʼatsayau ni Cristo yu Sasʼatʼa Dios va kilatachil y kintaxtaqnin jatapastakʼati. Chuncha lay kamispau ni yucha yu laqsaval Dios. Vilanau chʼantaun kun Jesucristo yu Sasʼatʼa Dios, yu masuy yu laqsaval. Yucha va yu laqsaval Dios yu kintaxtaqnin jatsukunti yu jantu aqtaun kamiʼoyaʼ. 21Kesʼatʼan, jantu katʼoʼoyatʼik yu axtoqnuʼ tacha Dios kaval. Va chuncha kaval.

will be added

X\