1 JUAN 4

1Ketʼalaqaunin, yu klaʼachaniyau, jantu kʼalhakʼapʼupʼintʼik tachun yu tanajun talhitʼajun ixʼEspíritu ni Dios. Pʼunaj kalaqtsʼinʼelatʼik para kʼamispʼatʼik licha laqsaval mintachal kun Dios. Ni lakamunukpaʼ ayaj alin jamakanunun. 2Tachun yu talhakapuʼan ni kilhitsukuchil Cristo la ixlakatunaj tacha kijnan, yuʼuncha talhitʼajun ixʼEspíritu ni Dios. Va chuncha lay pʼumispʼatʼik taʼayu lhitʼajun ixʼEspíritu ni Dios. 3Yu jantu talhakapuʼan ni chuncha kijunchil, yuʼuncha jantu ixnavin Dios kataval. Va talhitʼajun ni espíritu yu xkajiy ni Cristo. Ni uxiknan asmaktʼik ni kaminaʼ ni anchanu espíritu y chavay aniycha vil lakamunukpaʼ. 4Kesʼatʼan, yu ixlapanakni Dios untʼatʼik, uxiknan maʼalhaʼaʼotʼatʼikcha tachun yu jamakanunun. Yu vil kun uxiknan yucha apalay lhuu tapʼasta lhitʼajun xajantu yu vil kun xalapanakni lakamunukpaʼ. 5Yu jamakanunun va xanavin ni lakamunukpaʼ. Xlhiyucha talhichiviniy yu jantu ox jatapastakʼati y yu jantu talhakapuʼan Dios va tamakay kuenta. 6Pero kijnankʼan va ixnavin Dios juntau y taʼayuʼun yu tamispay Dios kintaqalasmakyan. Pero yu jantu tamispay Dios jantu kintaqalasmakyan. Xlhiyucha mispayau tasʼayucha espíritu yu masuy yu laqsaval y tasʼayucha yu jalaklkanan. 7Ketʼalaqaunin yu klaʼachaniyau, maqskʼiniy kalapaxkau. Yu japaxkanti mintachal kun Dios. Taʼayu yu japaxkanan, yucha va sasʼatʼa Dios junita y yucha mispay ni Dios. 8Yu jantu japaxkanan yucha jantu mispay ni Dios, ni Dios va ayaj japaxkanan. 9Ni Dios kintamasunin ixjapaxkanti tejkan malaqachal vamun yuʼ isTsʼal aniy lakamunukpaʼ para kaputsukuu ni yucha. 10Va inchineʼ junita yu ox japaxkanti. Kijnan jantu pʼunaj kaʼachaniu ni Dios, va yucha pʼunaj kintapaxkan. Va malaqachal isTsʼal para kamaqxtaqlhi tacha taun jamoqslanti. Ex va malaqmixiʼokal kintalaqalhinkʼan. 11Ketʼalaqaunin yu klaʼachaniyau, ni Dios va ayaj kintapaxkan, xlhiyucha maqskʼiniy kalapaxkau. 12Ni Dios jantu aqtaun matichun kalaqtsʼil, pero incha lapaxkayau ex ni Dios alinta kun kijnankʼan. Chuncha ixjapaxkanti lay tasuy la kimputsukukʼan. 13Ni Dios kintaxtaqnitan ixʼEspíritu, xlhiyucha pukʼatsayau ni tʼaunau kun Dios y yucha vachu tʼajun kun kijnan. 14Chuncha yu kijnankʼan klaqtsʼiu ni Jesús. Klaqputeʼeyau ni kimPay Dioskʼan va malaqachal Sasʼatʼa para kamil malaqtaxtun ni lapanakni yu tavilanal ni aniy lakamunukpaʼ. 15Taʼayu yu lhakapuʼan ni Jesús va Sasʼatʼa Dios junita, ex ni Dios tʼajun kun yucha y yucha vachu tʼajun kun Dios. 16Ex chuncha kijnankʼan kʼatsayau y lhakapuʼanau ni Dios kintapaxkayan. Ni Dios ayaj japaxkanan. Taʼayu yu japaxkanan, yucha tʼajun kun Dios y ni Dios tʼajun kun yucha. 17Ixjapaxkanti Dios tasuy la kimputsukukʼan. Xlhiyucha jantu maqskʼiniy katalhanau ni anchanuʼ julchan tejkan ni Dios kamukʼayaʼ maqanlqajnati. Tacha ixtiʼukxuntayay ni Jesucristo va chuncha tʼaunau kijnan ni aniy lakamunukpaʼ. 18Taʼan alin japaxkanti jantu alin talhanti, yu ox japaxkanti tinaqxtuy yu talhanti. Yu talhanan pastakʼa ixmaqanlqajnati. Taʼayu yu talhauniy ni maqanlqajnati yu xtaʼa ni Dios, yucha jantu kalhitsukul yu ox japaxkanti. 19Ni Dios pʼunaj kintapaxkan xlhiyucha kijnankʼan japaxkananau. 20Taʼayu yu najun: “Kitʼin kʼachaniy Dios”, pero xkajiy ixlaqaj, ex ni yucha va jalaklkanan. Incha jantu paxkay ixlaqaj yu laqtsʼin ex jantu lay achaniy ni Dios yu jantu laqtsʼinkan. 21Ni Jesucristo kintaxtaqnin ni aniy lhachimoʼon: taʼayu yu toʼoyay ni Dios, yucha vachuʼ maqskʼiniy kapaxkal ixtʼalaqajun.

will be added

X\