1 Ayaj kintapaxkayan ni kimPay Dioskʼan tus kintalhimapaqaʼuyan sasʼatʼan. Laqsaval sasʼatʼan juntau. Yu tatijuyanal lakamunukpaʼ jantu tamispay ni Dios, xlhiyucha jantu kintamispayan. 2 Uxiknan yu klaʼachaniyau, chavaycha juntaucha yu sasʼatʼan ni Dios mas jantukaʼ kʼatsayau tas kajunaucha astan. Pero kʼatsayau ni tejkan yucha kaminchoqoyaʼ ex kalaqtsʼinau tacha tasuy ni yucha. Xlhiyucha tacha yucha kajunau. 3 Taʼayu yu pakxanʼiy kaminchoqol ni Cristo yucha makauntijlay laqtaqal vachu va tacha ni Cristo yu jantu kalhitsukul laqtaqal. 4 Taʼayu yu makay laqtaqal yucha jantu qasmatʼa tacha najun ixlhachimoʼon ni Dios. Yu laqtaqal jantu paxtoqniy kun ixlhachimoʼon ni Dios. 5 Kʼatsʼayatʼikcha ni Jesucristo kilachil para kamaqosuʼol tachun kintalaqalhinkʼan. Yucha jantu tuʼuchun talaqalhin kalhitsukul. 6 Taʼayuʼ yu ox chʼantaun taylhaaniy kun yucha jantu makay laqtaqal. Taʼayuʼ yu tijuyal makanaʼ laqtaqal, yucha jantukaʼ mispay ni Jesucristo y jantukaʼ lhakapuʼan. 7 Kesʼatʼan, jantu kʼamakʼanukʼantʼik. Taʼayu yu tijuyal makanaʼ yu lajʼoxi, yucha jantu lhitsukuy laqtaqal, vachu chun junita tacha Cristo. 8 Taʼayuʼ yu tijuyal makanaʼ laqtaqal, yucha va ixnavin ni aqmoqxnuʼ. Yu aqmoqxnuʼ, yucha pʼunaj aqtaynil makanaʼ laqtaqal mas tejkan puʼaqtaynil ni lakamunukpaʼ tus chavaycha. Xlhiyucha kilachil ni Sasʼatʼa Dios aniy lakamunukpaʼ para kalaktʼilhiniʼol ixtapʼasta ni aqmoqxnuʼ. 9 Taʼayuʼ yu lhitsukuy sastʼi jatsukunti kun Dios yucha jantu tijuntayay makanaʼ laqtaqal. Va lhitʼajun jatsukunti yu Dios xtaqnil, ex jantu lay taylhaʼan makanaʼ laqtaqal por va sasʼatʼa Dios junita. 10 La ox mispakan taʼayuʼuncha sasʼatʼan ni Dios, vachu mispakan taʼayuʼuncha sasʼatʼan ni aqmoqxnuʼ. Yu makay yu jantu ox, yu jantu paxkay ixtʼalaqajun, yucha jantu sasʼatʼa Dios kaval. 11 Yu aniy chivinti vanaj va yucha yu maqancha pʼunaj asmaktʼik, va lhinajun kalapaxkau. 12 Jantu kʼaʼuntʼik tacha ni Caín yu ixnavin ixjunita ni aqmoqxnuʼ, yu maqnil ixtʼalaqajun. ¿Tisuncha ixlhiʼatal maqnil? Va por yu Caín ixmakay yu jantu lajʼoxi, chavay yu ixlaqaj va ixmakay yu lajʼoxi. 13 Ketʼalaqaunin, incha taxkayyan ni lapanakni yu jantu talhakapuʼan Dios, jantu katapastakʼun. 14 Ni kijnankʼan tapasataucha laka lhinin y chavay tiʼukxuyanau laka jatsukunti. Chuncha kʼatsayau por lapaxkayau ketʼalaqauninkʼan. Taʼayuʼ yu jantu paxkay ixtʼalaqajun yucha vananaj tiʼukxuyal laka lhinin. 15 Tachun lapanakni yu taxkajiy ixtʼalaqajunkʼan va talhixajyachal tacha jamaqninin. Uxiknankʼan ox kʼatsʼayatʼik yu jamaqniniʼ jantu kalhitsukul jatsukunti yu jantu aqtaun kamiʼoyaʼ. 16 Yu Jesucristo lhimaqxtaqlhi ixjatsukunti por kijnan. Va por yucha pumalaqasiyau tisuncha yu japaxkanti. Chavay yu kijnan vachu maqskʼiniy kamaqxtaqvi ketsukuntikʼan por ketʼalaqauninkʼan. 17 Licha qayntaun lapanaki lhitʼajunʼojoy tachun yu kaputapatsal la ixjatsukunti y laqtsʼin qayntaun ixlaqaj yu tsʼanqaniy tuʼuchun pero jantu mapayniy, ¿ex tas ancha alinta ixjapaxkanti ni Dios kun yucha? 18 Kesʼatʼan untʼatʼik, jantu kʼalapʼaxkʼatʼik vamun kun minchivintikʼan, va laqsaval kalaʼaqtʼayʼutʼik. 19 Licha chuncha makayau ex chuncha pukʼatsayau ni tʼaunau makanan yu laqsaval maqskʼiniy. Ex chuncha jantu talhananau la ixlakaʼukxpu ni Dios, 20 Incha la kelhanutikʼan keʼemankʼan mukʼanikanau kilaqtaqalkʼan, ni Dios apalay ay ixjamapayninti y tachun mispaʼojoy. 21 Ketʼalaqaunin, incha la kelhanutikʼan jantu ukskʼatsayau ni alin talaqalhin, ex jantu talhauniyau ni Dios. 22 Yucha kintaxtaqniyan tachun yu kaskʼiniyau por makaniyau yu kintalhijunan la ixlhachimoʼon y tachun yu lhipaʼiniy, yucha makayau. 23 Va kintalhijunan ni maqskʼiniy kalhakapuʼau isTsʼal yu junkan Jesucristo y vachu kalapaxkau aqstanchunin chuncha tacha kintalhijunan ni yucha. 24 Ni lapanakni yu tamakay yu lhinajun Dios, yuʼuncha tatʼajun chʼantaun kun yucha. Dios vachu vil kun yuʼuncha. Ex chuncha pukʼatsayau ni laqsaval vil kun kijnankʼan va por ixʼEspíritu Santo yu kintaxtaqnin.
