1 JUAN 1

1Klatsʼoqniyau ni uxiknankʼan chivinti yu lhichiviniy ni lapanaki yu ixtʼajuncha tejkan tachun puʼaqtaynil. Ni yucha yu ijqasmaktau y yucha klaqtsʼiu la kilaqchulkʼan. Laqsaval klaqtsʼiu y ikchʼapau kun kimakakʼan. Anchanu lapanaki va yu chivinti yu xtaʼa jatsukunti. 2Ni jatsukunti tasul y kijnankʼan klaqtsʼiu y vachu klaqputeʼeu. Chavaycha vachu klalaqputeʼeniyau ni aniy jatsukunti yu jantu aqtaun kamiʼoyaʼ. Yucha yu ixtʼavilchal ni Dios y kintatasunin. 3Laqsaval klalaqputeʼeniyau yu klaqtsʼiu y yu ijqasmakvi para chʼantaun kʼaʼuntʼik ni uxiknan kun kijnan, chuncha tacha kijnan chʼantaun kuntau kun kimPaykʼan Dios ali Sasʼatʼa Jesucristo. 4Xlhiyucha klatsʼoqniyau para kaʼalinʼol miʼachatkʼan. 5Ni aniy chivinti va yucha yu kintamasunin ni Jesucristo y kijnankʼan klalaqputeʼeniyau ni uxiknan. Ni Dios va tacha maklku y kun yucha jantu alin japutsʼisniʼ. 6Chavay incha naunau va chʼantaun juntau kun yucha y vananaj tiʼukxuyanau valiʼiy laka putsʼisniʼ, ex va jalaklkananau, jantu makayau yu laqsaval. 7Pero licha tiʼukxuyanaucha ni laka maklku chuncha tacha yucha alinta la ixmaklku ex chʼantaun alintau kun yucha. Ex yu Jesucristo yu Sasʼatʼa Dios kintaxakaniʼoyan kintalaqalhinkʼan kun ixjakʼalna. 8Incha naunau ni jantu kalhitsukuu talaqalhin ex keʼemankʼan makanukanau, jantu laqsaval kaval yu naunau. 9Pero licha tapayniniyau ni Dios para kaxakamaʼal kintalaqalhinkʼan, ex ni Dios lay lhakapuʼaniyau ni laqsaval kamakayaʼ yu ox. Kintamalaqmixiniyan kintalaqalhinkʼan y vachu kintaxakaniyan kilaqtaqalkʼan. 10Licha naunau ni jantu kalhitsukuu laqtaqal ex naunau ni Dios jantu laqsaval yu najun y jantukaʼ laqaʼiyau ixchivinti.

will be added

X\