1 Chavaycha klajunchoqoyaucha yu kilalhisakmiu la minkartajkʼan incha qayntaun tsʼal apalay ox kaval jantu kalakxtuklal. 2 Apalay ox ni xapaynin katalhitsukul qayntamin ixanatikʼan. Vachu yu xanatin katalhitsukul qayntamin ixapaykʼan para jantu katatʼatamal yu jantu ixnavinkʼan. 3 Tejkan talakxtuklatacha, yu xapay maqskʼiniy kaxtaqnil ixlakatunaj ixanati. Vachu yu xanati maqskʼiniy kaxtaqnil ixlakatunaj ixapay. 4 Yu ixlakatunaj ni xanati va ixnavin ni xapay y yu ixlakatunaj ni xapay va ixnavin ni xanati. 5 Jantu kʼalalaktʼanchʼanitʼik para kʼalaʼaqchʼapʼatʼik. Vamun incha milaʼatʼuykʼan va chʼantaun makʼayatʼik mijatapastakʼatkʼan ni jantu kalaʼaqchʼapʼatʼik va por tapastakʼuyan ni vamun iskʼinka Dios. Pero jantu paqlhuu kaval, va kalatʼatʼamachʼoʼotʼik. Chuncha para yu Satanás jantu katamanunin jatapastakʼati para kʼamakʼatʼik laqtaqal. 6 Jantu klalhijunau laqatapʼasta ni kʼalakxtʼuklatʼik. 7 Va iknajun tachun ni lapanakni va tacha kitʼin kataval. Pero qayntamin si putamin maqxtaqnil Dios, va si tumpaj kintamakan. 8 Klajunau ni ox kaval yu jantukaʼ talakxtuklay ali yu tiyaunin chuncha katatamakaul tacha kitʼin. 9 Pero incha jantu lay katʼiʼuntʼayatʼik valiʼiy chuncha, ex apalay ox kʼalakxtʼuklatʼik. Apalay ox kʼalakxtʼuklatʼik para jantu vamun yucha kapʼastʼaklhitsʼukʼutʼik la melhanutkʼan. 10 Uxiknan yu lakxtʼuklatʼatʼik, va klalhijunau ni yu xanatin jantu valiʼiy katamakauntijlal ixapaykʼan. Yucha jantu keʼeman iknajun, va chuncha naul kiJalhachimoʼonukʼan Jesucristo. 11 Pero incha matichun xanati kamakauntijlal ixapay, ex va katijuntayal ixʼaman u katʼatsukuchoqol ixapay. Vachu yu xapay jantu valiʼiy kamakauntijlal ixanati. 12 Yu alati uxiknan, mas jantu chuncha kanaul ni Jesucristo, kitʼin klajunau tacha kʼamakʼatʼik tejkan qayntaun xapay lhakapuʼan ni Cristo pero ixanati jantu lhakapuʼan. Incha yu xanati taylhaʼanputun katʼataulal ex yu xapay jantu lay kamakauntijlal. 13 Vachu chun tejkan qayntaun xanati yu lhakapuʼan ni Cristo pero ixapay jantu lhakapuʼan. Incha yu xapay taylhaʼanputun katʼataulal ex yu xanati jantu kamakauntijlal. 14 Incha yu xaxapay jantu lhakapuʼan vachu lay kunaʼ ixlapanaki Dios por ixanati. Vachu incha xaxanati jantu lhakapuʼan ex vachu ixlapanaki Dios lay kunaʼ por ixapay. Incha jantu chuncha katʼaylhipʼi kun mixapay u mixanati, ex yu mesʼatʼan tacha valiʼiy lapanakni kataval. Pero chuncha va si ixlapanakni Dios tajunita. 15 Pero incha yu jantu lhakapuʼan jamakauntijlananputun, ex chuncha kavalcha. Ex yu lhakapuʼan lay tamakajun oxamaktaun. Yu Dios kintalhijunin katsukuu oxamaktaun. 16 Porke uxintʼi yu xanati kʼatʼi, jantu kʼatsʼay yu katapasayaʼ. Ka va lay mixapay kalaqtaxtuyaʼ por uxintʼi. Vachuʼ, uxintʼi yu xapay kʼatʼi, ka va lay mixanati kalaqtaxtuyaʼ por uxintʼi. 17 Chuncha katʼatʼiʼukxuntʼayapitik tacha ni Jalhachimoʼonu Jesucristo tamaqxtaqnin, tacha untʼatʼik tejkan yu Dios tajuntaʼin para kʼalhakʼapʼupʼintʼik. Chuncha ikmasuy ni kitʼin mas va toʼoxtaycha taʼan tataqxtoʼa yu talhakapuʼan. 18 Incha matichun xvililichukʼupʼuxnikantacha tejkan lhakapuʼal ex yucha jantu maqskʼiniy kamapaxal yu ixmakanikanta. Incha matichun jantu kaxvililichukʼupʼuxnikal tejkan lhakapuʼal ex yucha jantu maqskʼiniy kaxvililichukʼupʼuxnikal. 19 Jantu maqskʼiniy licha va kaxvililichʼukʼupʼuxnikʼa u jantu. Yu maqskʼiniy va kʼamakʼatʼi tacha lhinajun ni Dios. 20 Va taʼayucha kaval, va kataylhaʼal tacha ixjunita tejkan Dios juntaʼil para kalhakapuʼal. 21 Tejkan Dios juntaʼitan para kʼalhakʼapʼupʼi, incha va oqxtamati y ixnavin miʼukxtin ixʼunitʼa, jantu kapastakʼun. Pero incha kaʼalil julchan tejkan kaxtʼaqnikʼa lakatin para katʼaxtʼu, ex katʼaxtʼu. 22 Incha matichun ixjunita oqxtamati tejkan ni Jalhachimoʼonu Jesucristo juntaʼil para kalhakapuʼal, chavaycha va oxamaktaun tapatsaniy ni Jalhachimoʼonuʼ. Vachu va chun taʼayuʼ yu oxamaktaun ixjunita tejkan juntaʼikal para kalhakapuʼal chavaycha va ixʼoqtamati Cristo. 23 Ni Dios va laqlhuu talhiʼitan ni uxiknan. Jantu kaxtʼaqnitʼik lakatin matichun aqayntaun lapanaki katalhichimoʼon. 24 Ex chuncha, ketʼalaqaunin, qayntamin maqskʼiniy kataylhaʼal kun Dios tacha ixjunita tejkan juntaʼikal para kalhakapuʼal. 25 Chavay yu jatsiʼinkaʼ jantu kaklhitsukul tuʼuchun chivinti yu lhinajun ni Jesucristo. Pero kimapaynil ni Jalhachimoʼonuʼ Jesucristo, xlhiyucha lay kʼalhakʼapʼupʼintʼik kinchivinti. 26 Chavaycha va lhitaʼay aniy lakamunukpaʼ taʼan tijuyanau. Xlhiyucha qayntaun lapanaki incha vananaj ixʼaman tijuyal, kitʼin ox klhilay chuncha kataylhaʼal. 27 Incha lhitʼaʼun mixanati, jantu kʼamakʼauntʼijla. Chavay incha jantu kʼalhitsʼukʼu, jantu kʼalakxkʼau. 28 Chavay incha lakxtuklay jantu tuʼuchun laqtaqal makʼay. Vachuʼ incha matichun jatsiʼi lakxtuklay vachu jantu tuʼuchun laqtaqal kaval para yucha. Pero apalay lhitaʼay chuncha la metsukuntikʼan. Xlhiyucha chuncha klajunau, va iknajun jantu kamaʼanlʼajnantʼik. 29 Ketʼalaqaunin, klajunau ni jantucha paqlhuu kintatamakauniyan. Ex chuncha yu lakxtuklanin katatiʼukxuntayal tacha yu jantukaʼ talakxtuklay. 30 Jantucha katapastakʼun yu xanavin aniy lakamunukpaʼ. Yu taqalhun katatiʼukxuntayal tacha yu jantu taqalhun. Yu talajʼachajyanal katatiʼukxuntayal tacha yu jantu talajʼachajtayay. Yu taʼiy axtoqnu yuʼuncha katatsukul tacha yu jantu katalhitsukul tuʼuchun. 31 Yu tamapatsay yu xaʼaxtoqnuʼ aniy lakamunukpaʼ, katakʼatsal va tacha jantu katatsukul mapatsanan. Ni aniy lakamunukpaʼ va tʼajun miʼonuʼ. 32 Va iknajun jantu katapastakʼun tuʼuchun. Yu ixʼaman tijuntayay lay kapastakʼul vamun yu lhinajun ni Jalhachimoʼonu Jesucristo. Pastakʼa tas lay kamakal para kalhipaʼinil ni Jalhachimoʼonuʼ. 33 Pero yu lakxtuklata vachu pastakʼuy yu xanavin ni aniy lakamunukpaʼ y makaputun yu kamaqamal ixanati. 34 Ex chuncha tʼuy chivinti junita. Vachu va chuncha yu xanatin yu jantu katalhitsukul ixapaykʼan ali yu jatsiʼinkaʼ. Yuʼuncha lay katapastakʼul vamun yu lhinajun ni Jalhachimoʼonu Jesucristo para ixnavin Dios kataval la ixlakatunajkʼan y vachu la ixlhitsukunukʼan. Pero qayntaun xanati yu lakxtuklay pastakʼuy yu xanavin ni aniy lakamunukpaʼ y makaputun yu kamaqamal ixapay. 35 Chuncha klajunau para klaʼaqtayjuu. Jantu klalhichimoʼoyau laqatapʼasta. Va klajunau para lay ox katʼiʼukxuntʼayatʼik y jantu tuʼuchun kalaktanchanin para ox kʼatʼapʼatsʼanitʼik ni Jalhachimoʼonu Jesucristo. 36 Incha qayntaun xapay lhitʼajun istsiʼi yu laqchaanitacha ixʼaynti, incha yucha najun kalakxtuklal ni istsiʼi ex lay kamakal yu kamakaputul. Jantu laqtaqal kaval, va kalakxtuklal. 37 Pero incha matichun xapay najun la ixjalhanuti ni apalay ox jantu kalakxtuklal istsiʼi y vachu incha jantu maqskʼiniy kalakxtuklal, ex jantu maqskʼiniy. Incha chuncha najun la ixjalhanuti, ex lay kalhistaklhi istsiʼi para jantu kalakxtuklal. 38 Ex chuncha yu maqxtaʼa istsiʼi para kalakxtuklal la ox makay. Vachu yu jantu maqxtaʼa istsiʼi para kalakxtuklal ayaj ox xajachal. 39 Qayntaun xanati yu ikantacha va la ixtamakaʼ ixapay tʼajun incha vananaj tʼajun. Pero incha yu xapay kanil lay katʼatsukul taʼayucha yu katʼatsukuputul. Pero kaval qayntaun yu lhakapuʼan ni Jalhachimoʼonu Jesucristo. 40 Pero apalay katijuntayal kun achati incha jantu kalakxtuklachoqol. Chuncha ikpastakʼa ni kitʼin y klhilay va chuncha kixtaqniy ixjatapastakʼati ixʼEspíritu ni Dios.
