1 CORINTIOS 6

1Tejkan mintʼalaqajunkʼan tamakaniyan laqtaqal ¿valiʼiycha laqpʼinatʼik lhachimoʼonun yu jantu tamispay Dios y jantu laqpʼinatʼik yu ixlapanakni Dios? 2¿Jantu kʼatsʼayatʼik yu ixlapanakni Dios katalhachimoʼonunaʼ aniy lakamunukpaʼ? Incha uxiknan kʼapʼuxkʼaulaqtsʼinapitik xalapanakni aniy lakamunukpaʼ, ¿ex valiʼiycha jantu lay kalaʼoxitʼik lhilukuj yu jantu lhitaʼay kaval? 3Mas ixmayulnin Dios kapuxkaulaqtsʼinau. ¿Ex tas lhijantucha kalal kapuxkaulaqtsʼiu yu tapasay aniy la ketsukuntikʼan? 4Ex chuncha tejkan lhitsʼukʼuyatʼik lhilukuj siya uxiknan yu lhakʼapʼupʼinatʼik, ¿valiʼiycha laqpʼinatʼik lhachimoʼonun yu jantu tuʼuchun kataval kun yu ixlapanakni Dios? 5Chuncha klajunau para klamamaxaniu. Ka alin matichun kun uxiknan yu apalay kalhitsukul jatapastakʼati para lay kalaqlaʼoxil lhilukuj siya jatʼalaqaunin. 6Pero alin lhilukuj siya jatʼalaqaunin, y uxiknan laqpʼinatʼik yu jantu talhakapuʼan para katalaʼoxil. 7Laqsaval jantu ox tejkan lachʼivintʼanuniyatʼik kun jalhachimoʼonun. Apalay ox kaval katʼayanitʼik tejkan milaqajkʼan tamakaniyan tuʼuchun laqtaqal u tejkan tuʼuchun taʼalhauniyan. 8Pero uxiknan ayaj makʼaniyatʼik laqtaqal y laʼalhauniyatʼik siya uxiknankʼan mas va tʼalaqaunin. 9¿Jantu kʼatsʼayatʼik ni yu talaktuʼunun jantu katatanuyanta taʼan jalhachimoʼonun ni Dios? Jantu kʼalakmakʼanukʼantʼik. Tachun yu tatʼatamay lapanakni yu jantu ixnavinkʼan kataval, ali yu tatoʼoyay antivas ali yu tamaqantivinin, ali yu joʼakna yu talatʼatamay ixtʼajoʼaknakʼan 10ali yu alhavanan ali yu taʼakchaʼan ali yu taʼapʼanin ali yu jalaklkanan ali yu tamakanuxtuy tumin, yuʼuncha jantu katatanuyanta taʼan jalhachimoʼonun ni Dios. 11Chuncha ixʼuntʼatʼik xalati ni uxiknan. Pero chavaycha xakʼanikʼantʼatʼikcha mintalaqalhinkʼan, ixlapanakni Dios untʼatʼik. Dios ox talaqtsʼinan por yu makal ni Jalhachimoʼonuʼ Jesucristo, vachu por yu makal ixʼEspíritu Santo. 12Lati tanajun ni lay kʼamakʼatʼi va yu kamakʼapʼutʼucha. Pero kitʼin iknajun jantu tachun xtapal. Tanajun ni lay kʼamakʼatʼi va yu kamakʼapʼutʼucha. Pero kitʼin jantu ikxtaqniy lakatin para kimaqalhajal yu jantu ox. 13Tejkan vaynau vamun para kimpajankʼan y yu kimpajankʼan vamun para kavajiu. Va yu laʼatʼuy ni Dios kamamiʼoniyaʼ. Pero kilakatunajkʼan jantu kaval para katʼatamau yu jantu kinavinkʼan. Ni kilakatunajkʼan va para kalhitoʼoyau kiJalhachimoʼonukʼan Jesucristo y yucha kintaʼaqtayjuyan la kilakatunajkʼan. 14Ni Dios majkujuchoqol kiJalhachimoʼonukʼan tejkan ixnitacha. Ex vachu chuncha kintamajkujuchoqoyan kun ixtapʼasta. 15¿Jantu kʼatsʼayatʼik ni milakatunajkʼan va chʼantaun junita kun Cristo? Chuncha incha kilakatunaj chʼantaun junita kun Cristo ex jantu lay kakxtaqnil kilakatunaj qayntaun xanati yu jalaktʼatamay joʼakna. Jantu aqtaun chuncha kaval. 16¿Jantu kʼatsʼayatʼik tejkan matichun lapanaki chʼantaun tʼajun kun qayntaun xanati va laqataun lakatunaj tajun? Va tsʼoqkanta la ixchivinti Dios, najun: “Yu ixlaʼatʼuykʼan va laqataun lakatunaj katajunaʼ.” 17Matichun yu chʼantaun tʼajun kun ni Jesucristo va laqataun jun ixlhitsukunukʼan. 18Kʼamakʼauntʼijlatʼik ixtʼatamaka yu jantu minavinkʼan kaval. Yu alati laqtaqal yu tamakay lapanakni jantu laqalhiy ixlakatunajkʼan. Pero yu tatʼatamay yu jantu ixnavinkʼan, yuʼuncha tamakay laqtaqal yu talaqalhiy ixlakatunajkʼan. 19¿Jantu kʼatsʼayatʼik ni milakatunajkʼan va tacha taun chaqaʼ taʼan vil ni Espíritu Santo yu Dios taxtaqnin? Milakatunajkʼan jantu minavinkʼan kaval. 20Ni Dios taʼitan. Xlhiyucha maqskʼiniy katʼoʼoyatʼik ni Dios kun milakatunajkʼan.

will be added

X\