1 CORINTIOS 2

1Ketʼalaqaunin, tejkan klakilaqputeʼeniu ixchivinti Dios yu ixmaqsaqmakakantacha, jantu aqtaun kakchivinil kun lajkʼus ali lajʼay chivinti. 2Tejkan klalaqkilau xaknajun katanul la kijatapastakʼati vamun ni Jesucristo yu makxtukmukʼakal laka kurus. 3Jantu kaklatʼataulau kun tapʼasta. Kitʼin ayaj xaktalhanan tus xajkaxkapʼiknin. 4Tejkan klakilaqputeʼeniu ni ox chivinti jantu kakmapatsal lajʼay chivinti kun lhuu jatapastakʼati para kalaʼaʼitʼik. Va klamasuniu kun ixtapʼasta ni Espíritu Santo. 5Va knajun jantu kʼalhakʼapʼupʼintʼik por ixjatapastakʼatkʼan lapanakni. Va kʼalhakʼapʼupʼintʼik por mispʼatʼik ixtapʼasta ni Dios. 6Laqsaval klaqxaqalayau kun lhuu jatapastakʼati yu oxicha talhakapuʼanta pero jantu kun yu xajatapastakʼati aniy lakamunukpaʼ. Vachu jantu ikmapatsayau ixjatapastakʼatkʼan yu talhachimoʼonun ni aniy lakamunukpaʼ yu katalaqmixaʼ. 7Va klhichivinanau ixjatapastakʼati Dios. Ni aniy jatapastakʼati jantu ixtasuy, va ixmaqsaqmakakanta. Yucha va yu pastaklhi ni Dios tejkan jantukaʼ ixʼalin lakamunukpaʼ. Chuncha lhinaul ni Dios para astan lajʼay kalhixajchaʼau ni kijnan. 8Ni anchanu jatapastakʼati jantu katamispal ni lapanakni yu talhachimoʼonun aniy lakamunukpaʼ. Yu va ixtamispal ex jantu ixtamakxtukmukʼal ni Cristo yu la ay Jalhachimoʼonu. 9Va tsʼoqkanta la ixchivinti Dios yu najun: Dios laʼoxita tuʼuchun para yu lapanakni yu taʼachaniy, va taun tuʼuchun yu ox yu jantukaʼ matichun laqtsʼin, nisin qasmatʼa. Vachuʼ jantu matichun lay pastakʼa tacha junita ni anchanu yu ayaj ox. 10Pero ni kijnankʼan Dios kintamasunin kun ni Espíritu Santo. Ni Espíritu Santo puxkauʼojoy tachun yu paxtoqniy ni Dios, tus tachun puxkaulaqtsʼin. 11Jantu matichun lapanaki lay ox mispaniy tacha pastakʼa ataun lapanaki. Vamun ixlhitsukunuʼ ni anchanu lapanaki mispaniy tacha ixjatapastakʼati. Ex vachu va chun jantu matichun lay mispaniy ixjatapastakʼati ni Dios. Vamun ixʼEspíritu ni Dios lay mispaniy. 12Pero kijnankʼan jantu kalaqaʼiu yu xaʼespíritu lakamunukpaʼ. Va laqaʼiu ixʼEspíritu ni Dios para lay kamispau yu kintaxtaqnin por ixjamapayninti. 13Ex chuncha klhilakchivinanau yu aniy jantu kun chivinti yu minachal ixjatapastakʼatkʼan lapanakni. Va kun chivinti yu kintamasuniyan ni Espíritu Santo. Chuncha klakmasuniyau ni lapanakni yu talhitʼajun ni Espíritu, ikmasuniyau yu makay ni Espíritu. 14Pero yu valiʼiy lapanakni, yuʼuncha jantu lay talaqaʼiy yu xtaʼa ixʼEspíritu ni Dios. Talhilay va lhitontoj y jantu lay tamalaqasiy. Yucha lay malaqasikan vamun kun ni Espíritu Santo. 15Ni lapanakni yu talhitʼajun ni Espíritu Santo, yuʼuncha lay tapuxkaulaqtsʼin tachun. Pero jantu matichun lay puxkaulaqtsʼin qayntaun yu lhitʼajun ni Espíritu Santo. 16Va tsʼoqkanta la ixchivinti Dios, najun: “¿Taʼayucha lay mispay ixjatapastakʼati ni Dios? ¿Taʼayucha lay jamalaniy ni Dios?” Pero kijnankʼan lhitʼaunau ixjatapastakʼati ni Cristo.

will be added

X\