1 Chavay klalhixaqalayau ni tumin yu pusakkan para kilpatanin yu talhakapuʼan. Katʼaylhipʼinitʼik makanan vachu chun tacha klaklhijunil yu tavilanal xaʼestado Galacia. 2 Xapʼunaj julchan laka semana minqayntamin kalhilkʼamaʼatʼik mintuminkʼan yu xajachal para chuncha jantu katsʼukʼutʼik maqxtoqnun tus tejkan kakchaanchal. 3 Tejkan kaklalaqchaantachaʼau kilalaksakniu jaltanan para katalhaʼal mintuminkʼan laka putaulan Jerusalén kun kinkartas yu lay kalakpumispakal. 4 Incha ox kaval kajkʼal ni kitʼin vachuʼ ex lay chʼantaun kintatʼaʼal. 5 Kaktapasaʼelayau xaʼestado Macedonia ex kaklalaqchaantachaʼau. Va maqskʼiniy kaktapasal Macedonia. 6 Ka va lay kaklatʼataulau paqlhuu mas panchuncha laka lhikʼasnin kaklatʼataulau. Ex astan tejkan kajkʼanchoqoya alakataun lay kilaʼaqtayjuyau para kilakatin. 7 Chavaycha jantu iktapasatijlaputun vamun kaklalaqtsʼiu. Va klatʼataulputunau paqlhuu incha Dios najun. 8 Pero aniy kaktaulaʼ laka putaulan Éfeso tus kalakachinaʼ xakʼatan Pentecostes. 9 Chavaycha aniy ox lay kaktanuchal para kaklalhaval ixlhitapatsa Dios mas la alin yu tʼalaxkaynin. 10 Incha kachaʼananta ni Timoteo kalhilaqsoʼotʼik katatʼataulan oxamaktaun. Yucha ox tapatsay la ixlhitapatsa ni Jalhachimoʼonu Jesucristo, chuncha tacha iktapatsay ni kitʼin. 11 Jantu xataʼayuʼ uxiknankʼan kʼalaktʼanchʼanitʼik. Tejkan kaminchoqoyaʼ ox kaʼaqtʼayʼutʼik la ixlakatin para lay kilaqminchoqol. Kitʼin va ikpakxanʼiy kilaqmil kun alati ketʼalaqauninkʼan. 12 Yu kintʼalaqajunkʼan Apolos, yucha aqlhuu iktapayninil para katalaqʼanchaʼan kun yu alati ketʼalaqauninkʼan. Pero chavaycha jantu uxaʼanachal, pero chun kaʼananta tejkan lay kalhilayaʼ. 13 Ox kʼalhistʼajkʼantʼik y ox kʼatʼapʼasnitʼik la milhakapuʼatkʼan. Jantu katʼalhanantʼik. Kʼaʼuntʼik laqpʼaysnin lapanakni. 14 Tachun yu makʼayatʼik, va kamakʼatʼik kun lhuu japaxkanti. 15 Ketʼalaqaunin, kʼatsʼayatʼik ni Estéfanas chʼantaun kun yu tavilanal la ixchaqaʼ, yuʼuncha pʼunaj talhitanul yu ox chivinti ancha xaʼestado Akaya. Va si pʼas tamakay para kataʼaqtayjul alati yu talhakapuʼan. 16 Klatapayniniyau ni chuncha kʼamakʼatʼik tacha tanajun yuʼuncha y vachu kamakʼatʼik tacha tanajun tachun yu chʼantaun tatapatsay kun yuʼuncha. 17 Klhiʼachantajuy por kintalaqchil ni Estéfanas ali Fortunato ali Akaiko. Yuʼuncha lay kiʼaqtayjul taʼan uxiknankʼan jantu lay kilaʼaqtayjuu va por maqati vilananchipitik. 18 Ox kintamalakaʼulanil kelhanuti y vachu katamalakaʼulaniyan melhanutkʼan. Ox kʼalaktʼoʼoyatʼik. 19 Tachun yu talhakapuʼan aniy xaʼestado Asia tamalaqachaniyan jamastakʼanti. Vachu ni Akila ali Priscila tamastakʼayan tacha sasʼatʼan Dios. Vachu tachun yu talhakapuʼan yu tataqxtoʼa la ixchaqaʼ tamastakʼayan. 20 Tachun ketʼalaqauninkʼan tamastakʼayan. Ox kʼalamastʼakʼatʼik kun la kiltastukni tacha yu laqsaval ixlapanakni Dios. 21 Kitʼin kPablo chavay klamastakʼayau kun kijatsʼoqnuti la kimakaʼ. 22 Incha matichun jantu achaniy kiJalhachimoʼonukʼan Jesucristo ex kamukʼanikalcha maqanlqajnati. Niman kaminchoqol kiJalhachimoʼonukʼan. 23 KiJalhachimoʼonukʼan Jesucristo kataxtaqnin yu lajʼoxi la metsukuntikʼan. 24 Tachun uxiknankʼan yu ixlapanakni Cristo Jesús ox klapaxkayau. Chuncha kavalcha.
