1 CORINTIOS 15

1Ketʼalaqaunin, chavaycha iknajun kapʼastʼaktʼik ni ox chivinti yu klalaqputeʼeniu yu uxiknankʼan laʼaʼitʼik y yu ox tʼaylhipʼiniyatʼik. 2Ni anchanu chivinti yucha lay pʼulaqtʼaxtʼuyatʼik incha ox tʼaylhipʼinatʼik tacha klalaqputeʼeniu. Incha jantu, ex va tacha jantu tuʼuchun kaval mas lhakʼapʼupʼinatʼik. 3Klalaqputeʼeniu ni chivinti yu apalay maqskʼiniy kakʼatsʼatʼik. Vachu chun tacha klaqaʼil ni kitʼin klalaqputeʼeniu ni Cristo nil por kintalaqalhinkʼan, chuncha tacha ixnajunta la ixchivinti Dios taʼan tsʼoqkanta. 4Va maknukal y laʼatʼutu julchan val ex takukchoqol, chuncha tacha ixnajunta la ixchivinti Dios. 5Ex tasunil ni Pedro ex astan jalaktasunikal yu pumakautʼuy. 6Ex taval jalaktasunikal laqakis ciento lapanakni yu talhakapuʼan y chʼantaun talaqtsʼil. Chavay pumalhuu yuʼuncha vananaj takujta mas lati tanitacha. 7Ex tasunil ni Santiago, ex astan laktasunil tachun yu ixjalaqmalaqachata. 8Astan vachu kintasunil ni kitʼin, mas por kilaktuʼunti va xajkunita tacha jasʼatʼa yu jantu ox kaktsukul. 9Kitʼin kunita yu apalay lakatʼuniy kun yu alati ixtamalaqachan ni Cristo. Mas jantu kimpaxtoqniy para kakval ixtamalaqachan, va ox klaqmamaqanlqajnival ixlapanakni Dios. 10Por yu kixtaqnil ni Dios kitʼin kunita tacha yu kunita. Ni Dios va kintamapaynin pero jantu valiʼiy kaval ixjamapayninti. Chavay va apalay pʼays iktapatsanil xajantu yu alati. Pero jantu kaktapatsal keʼeman la kintapʼasta. Va ixtapʼasta ni Dios yu kixtaqniy por ixjamapayninti. 11Chuncha jantu maqskʼiniy kʼamakʼatʼik kuenta mas kaval kitʼin u mas kaval yuʼuncha, va klalaqputeʼeniu y uxiknan lhakʼapʼupʼintʼik. 12Kijnankʼan klalaqputeʼeniyau ni Cristo takukchoqol laka putaknun. ¿Ex valiʼiycha lati uxiknankʼan naunatʼik ni jantu katakujchoqoyaʼ yu janinin? 13Incha jantu lay takujchoqoy yu janinin ex Cristo vachu jantu kakujchoqol. 14Incha Cristo jantu kakujchoqol ex jantu tuʼuchun kaval mas klalaqputeʼeniu y vachu jantu tuʼuchun kaval mas lhakʼapʼupʼinatʼik. 15Incha chuncha junita ex kijnankʼan kakxajchaʼau tacha lapanakni yu jantu laqsaval talhichiviniy Dios. Pero kijnankʼan klajuniu ni Dios makutuchoqol ni Cristo. Ex incha jantu laqsaval ni janinin tatakukchoqoy lakaputaknun, ex vachu ni Dios jantu laqsaval kamakutuchoqol ni Cristo. 16Incha yu janinin jantu takujchoqoy ex Cristo vachu jantu kakujchoqol. 17Incha Cristo jantu kakujchoqol ex milhakapuʼatkʼan jantu tuʼuchun xtapal kaval. Vananaj ixtʼiʼuyanantʼik la mintalaqalhinkʼan. 18Incha laqsaval chuncha junita ex yu tanitacha yu ixtalhakapuʼan Cristo, yuʼuncha valiʼiy tatsʼanqata. 19Incha vamun para ni aniy jatsukunti pakxanʼiyau ni Cristo ex apalay payniʼincha ni kijnan. 20Pero laqsaval ni Cristo yucha kujchoqol y chuncha val yu xapʼunaj kun yu alati janinin. Yucha pʼunaj kujchoqol ex astan yu alati. 21Vachu chun tacha puʼaqtaynil ni lhinin por yu makal qayntaun lapanaki. Ex chuncha vachuʼ por yu makal aqayntaun lapanaki puʼaqtaynil takujchoqoy ni janinin. 22Chuncha tachun niyau por minchaʼau kun Adán. Ex vachuʼ tachun yu chʼantaun juntau kun Cristo kalhitsukuyau jatsukunti. 23Pero jantu va qayntaun paxtoqniy. Xapʼunaj paxtoqnil ni Cristo y yucha kujchoqol. Ex astan katapaxtoqniyaʼ yu ixlapanakni ni Cristo tejkan kaminchoqoyaʼ. 24Ex astan katamaktayaʼ tachun. Cristo kaminaʼ maqosun tachun palhachimoʼon kun tachun tapʼasta. Ex kamaqxtaqnichoqoyaʼ ixpalhachimoʼon la ixtamakaʼ ixPay Dios. 25Yucha maqskʼiniy kalhachimoʼonul tus tejkan kalhajaʼoyaʼ tachun ixtʼalaxkaynin. 26Vachu yu lhinin va ixtʼalaxkayaʼ y yucha va astan kamaqosuyaʼ. 27Va tsʼoqkanta la ixchivinti Dios ni kamaqxtaqnikal tachun yu alin ni Cristo para kaʼakchʼintamaʼol. Chuncha najun ni laqsaval kalhichimoʼoyaʼ tachun yu alin, pero jantu kalhichimoʼoyaʼ ni Dios, va yucha yu maqxtaqnil. 28Tejkan tachun ixnavin kunaʼ ex yu Sasʼatʼa Dios va ixnavin kunaʼ ni Dios yu maqxtaqnil tachun. Ex chuncha Dios kalhachimoʼonunʼol tachun yu alin. 29Incha jantu katakujchoqoyaʼ ni janinin, ¿ex tisuncha xtapal tejkan taʼaqchajʼajuy para ixlapanaknikʼan yu tanitacha? 30Ex chuncha vachu kijnankʼan, ¿valiʼiycha iktiʼukxuntayayaucha chux julchan chux hora laqa lhitaʼay la ketsukuntikʼan? 31Ketʼalaqaunin, klhiʼachantajuy por uxiknankʼan ni chʼantaun untʼatʼik kun Jesucristo kiJalhachimoʼonukʼan. Laqsaval klajunau ni lhilhiy iktijuyal laqa lhitaʼay taʼan lay kaknil. 32Kitʼin iktayanil yu machaqan laka putaulan Éfeso tus tacha maqtalin ixtajunita. ¿Pero tisuncha klhajay mas chuncha kintamakal incha laqsaval jantu katakujchoqoyaʼ ni janinin? Ex apalay ox kaval tacha tanajun lati: “Chavaycha ox kavajiu, y ox kaʼoqnuu, va niman kaniyau.” 33Jantu kʼamakʼanukʼantʼik. Tacha najun titaun chivinti: “Ni lapanakni yu talaktuʼunun, valiʼiy kintamaqatsʼanqaniyan yu ox la kimputsukkʼan.” 34Kʼamapʼaxatʼik mijatapastakʼatkʼan para ox kaval y kʼamakʼauntʼijlatʼik mintalaqalhinkʼan. Lati uxiknankʼan jantu mispʼayatʼik Dios. Chuncha klajunau para kalhimaxanantʼik. 35Ka va lay alin yu kalhasakmininaʼ: “¿Tas katapukujchoqoyacha ni janinin? ¿Tisuncha lakatunaj katalhitsukuyaʼ?” 36Va lhitontoj yu lhasakminin. Laqataun xataltsʼi incha kachʼantʼi, tsʼanqay kapuchʼiʼelal tacha kanil ex astan lay pʼunchoqoy. 37Jantu chʼankan xajavan yu pʼuncha, va yu valiʼiy xataltsʼi chʼankan mas kaval kʼispa u trigo u tichichuncha. 38Ex Dios xtaqniy xaxqoy tacha makaputul ni yucha. Laqatamin xataltsʼi si putamin talhitsukuy xaxqoy tacha yu paxtoqniy. 39Jantu tachun lakatunaj va taun kaval. Ixlakatunaj lapanaki taun tasuy, ixlakatunajkʼan talhitsukuti aputaun tasuy, vachu ixlakatunajkʼan jatanti aputaun junita y tsʼoʼon vachu aputaun lakatunaj talhitʼajun. 40Yu alin laktʼiyan va putaun, yu alin lakamunukpaʼ va aputaun. Vachu yu ayaj kʼus yu alin laktʼiyan va tumpaj y yu kʼus yu alin lakamunukpaʼ aputaun junita. 41Chuncha tacha yu julchan aputaun lhitʼajun ixkilmaknauxtu, yu malkuyuʼ aputaun, y yu jastʼakun aputaun. Laqatamin jastʼaku va tumpaj ixmaklkukʼan. 42Vachu chun katapasayaʼ tejkan katakujchoqoyaʼ ni janinin. Tumpaj jun ixlakatunajkʼan yu lakmaknukan, va niman puchʼiy, pero yu katakujchoqoyaʼ yucha jantucha aqtaun kapuchʼiyaʼ. 43Yu maknukan oxicha miʼojota ixlakatunaj pero tejkan katakukchoqoyaʼ ex ox kalaqauntayachoqoyaʼ. Tejkan katakukchoqoyaʼ ex ox kalhitsukuchoqoyaʼ ixtapʼasta. 44Yu maknukan yucha valiʼiy lakatunaj yu lhitsukukan aniy lakamunukpaʼ, pero yu katakukchoqoyaʼ yucha va xalakatunaj laktʼiyan kunaʼ. Alin putʼuy lakatunaj, alin yu lhitsukukan aniy lakamunukpaʼ y alin yu xalakatunaj laktʼiyan. 45Xlhiyucha va tsʼoqkanta la ixchivinti Dios: “Yu pʼunaj Adán yucha lhitsukul xalakatunaj aniy lakamunukpaʼ.” Pero ni Cristo yucha val yu xaʼastan Adán. Yucha xtaʼa ni Espíritu yu xtaʼa jatsukunti. 46Ni jatsukunti yu xtaʼa ni Espíritu jantu pʼunaj lhitsukukan. Yu pʼunaj lhitsukukan va yu xalakatunaj aniy lakamunukpaʼ. Ex astan lhitsukukan yu ox jatsukunti. 47Yu pʼunaj lapanaki makakal tʼun y tsukul aniy lakamunukpaʼ. Yu xaʼastan lapanaki yu kiJalhachimoʼonukʼan minchal laktʼiyan. 48Yu alin lakamunukpaʼ va aqstanchun tacha ni lapanaki yu jamakanti tʼun. Yu tapaxtoqniy laktʼiyan va tacha ni lapanaki yu minchal laktʼiyan. 49Chavaycha vachu chun tasuyau tacha ni lapanaki yu jamakanti tʼun, ex vachu chun katasuyau tacha ni lapanaki yu minchal laktʼiyan. 50Ketʼalaqaunin, iknajun kakʼatsʼatʼik yu valiʼiy kivakaxkʼan ali kejakʼalkʼan jantu lay tanuyachal taʼan lhachimoʼonun Dios. Vachu yu kilakatunajkʼan yu puchʼiy jantu lay xajachal para jantu aqtaun kapuchʼil. 51Iknajun kakʼatsʼatʼik taun chivinti yu jantu ixmispakan. Jantu tachun kaniyau pero tachun katapaxaʼoyau. 52Va taun laqatsʼalaj, va tacha aqtaun tsʼupʼiks kalakpʼuʼu tejkan kapusuntajukanaʼ ni sasqol yu kaputamaktayaʼ ni lakamunukpaʼ. Laqsaval kamakatʼaunaʼ ni sqol, ex yu janinin katakujchoqoyaʼ kun ixlakatunajkʼan yu jantu aqtaun kamiʼoyaʼ, y kijnan yu vananaj katsukuyau katapaxaʼoyau. 53Laqsaval kilakatunajkʼan yu puchʼiy maqskʼiniy katapalal lakatunaj yu jantu aqtaun kapuchʼiyaʼ. Vachu kilakatunajkʼan yu niy maqskʼiniy katapalal lakatunaj yu jantu aqtaun kaniyaʼ. 54Chuncha tejkan yu puchʼiy kalhixajanta yu jantu puchʼiy, yu niy kalhixajanta yu jantu aqtaun niy. Ex katapasayaʼ tacha tsʼoqkanta la ixchivinti Dios taʼan najun: Yu lhinin jantucha apalay kalhitsukul tapʼasta, va lhajakalcha. 55Lhinin, chavaycha, ¿tas ancha alin mintapʼasta para kilamiu unan? ¿Toʼoxtaycha alin mintapʼasta para kilalhajau? 56Chavaycha yu lhinin lay kintaʼuyan, va por alin talaqalhin. Chuncha yu talaqalhin ayaj lhitʼajun tapʼasta, va por ixlhachimoʼon Dios kintamukʼaniyan laqtaqal. 57Pero ayaj lhuu ikxtaqniy lhimalaqpuchuncha ni Dios. Yucha kintaxtaqniyan tapʼasta para kalhajau por Jesucristo kiJalhachimoʼonukʼan. 58Xlhiyucha, ketʼalaqaunin yu klaʼachaniyau, ox kaʼukxpʼupʼintʼik, jantu matichun katamaʼoqspalnin. Apalay kʼatʼapʼatsʼanitʼik ni kiJalhachimoʼonukʼan. Va kʼatsʼayatʼik ni jantu valiʼiy kaval tejkan pʼays tʼapʼatsʼaniyatʼik.

will be added

X\