1 CORINTIOS 14

1Kʼalhilaqsoʼotʼik lhitsukunun japaxkanti. Ex vachu kʼalhilaqsoʼotʼik laqaʼinin yu xtaʼa ni Espíritu Santo. Pero apalay kaskʼintʼik para lay kʼalaqpʼutʼeʼetʼik ixchivinti Dios. 2Taʼayu yu maqxtaqnikan kachivinil alati lhichivin yu jantu mispay, yucha jantu matichun lapanaki malaqasiniy yu najun. Jantu va lapanakni yu jatʼachiviniy, va Dios yu tʼachiviniy. Va kun ixlhitsukunuʼ chiviniy yu jantu mispakan. 3Pero qayntaun lapanaki yu laqputeʼey ixchivinti Dios ox jalakmasuniy ni lapanakni. Ex ox lay kataʼayal ixlhakapuʼatkʼan y ox jalaqxtaqniy jatapastakʼati y ox jalakmalakaʼulay. 4Yu chiviniy alati lhichivin yu jantu mispakan yucha va xʼaman aqtayjukan la ixjatsukunti para ox kataʼayal ixlhakapuʼati. Pero yu laqputeʼey ixchivinti Dios yucha jalaqʼaqtayjuy alati ixlapanakni Dios para ox kataʼayal ixlhakapuʼatkʼan. 5Kitʼin iknajun ox kaval incha mintachunkʼan lay kachʼivinintʼik lhichivin yu jantu mispakan. Pero yu apalay iknajun va kʼalaqpʼutʼeʼetʼik ixchivinti Dios. Apalay ixlaqmiti yu laqputeʼey ixchivinti Dios xajantu yu chiviniy lhichivin yu jantu mispakan. Pero incha alin qayntaun lapanaki yu lay kalhichivinchoqol yu naunputun ni anchanu lhichivin ex vachuʼ ox. Chuncha lay ox katamalaqasil yu talhakapuʼan y ox kataʼayal ixlhakapuʼatkʼan. 6Xlhiyucha klajunau chavaycha, ketʼalaqaunin, incha kaklalaqʼanchaʼau y kaklalhixaqalau lhichivin yu jantu malaʼasiyatʼik ex jantu tuʼuchun taʼaqtayjuyan. Vamun taʼaqtayjuyan incha kaklalhixaqalau tuʼuchun yu kimasunil Dios u taun jatapastakʼati. Vachu taʼaqtayjuyan incha klalaqputeʼeniyau ixchivinti Dios u klamalaniyau tuʼuchun. 7Incha laqataun sqol u ataun lhisan tacha yu kitarra jantu siya putamin katakiltʼaunlhi, ¿ex tas laycha kapumispakal taʼayucha yu kitarra u taʼayucha yu sqol? 8Vachu sasqol yu sqolkan laka lhilukuj, incha jantu ox tʼasay, ¿ex tas laycha katapukʼatsal ni tropas para kataʼalcha laka lhilukuj? 9Vachu va chun uxiknankʼan incha chʼivinanatʼik chivinti yu jantu malaqasikan, ¿tas katapumalaqasiniyancha ni lapanakni? Valiʼiy laka unin chʼivinanatʼik. 10Alin lhuu lhichivin lakamunukpaʼ pero taun taun chivinti si alin yu naunputunta. 11Pero incha matichun kixaqalal kun aputaun lhichivin yu jantu kakmalaqasil ex klhixajachal tacha qayntaun yu alakataun machaqaʼ y yucha vachu chun lhixajachal kun kitʼin. 12Uxiknan ayaj lhitsʼukʼupʼutʼunatʼik yu xtaʼa ni Espíritu Santo. Chavay kʼalhilaqsoʼotʼik lhitsukunun yu ox lay katapuʼaynʼal ixlhakapuʼatkʼan ixlapanakni Dios. 13Ex taʼayu yu chiviniy lhichivin yu jantu malaqasikan, va kaskʼinin ni Dios kaxtaqnin vachu para lay kʼalhichʼivinchʼoʼo yu naunputun. 14Incha kitʼin ikskʼin Dios laka lhichivin yu jantu malaqasikan ex vamun la kilhitsukunuʼ ikskʼin Dios. La kijatapastakʼati jantu tuʼuchun ikmalaqasiy. 15¿Ex tascha kakmakal? Kakskʼinaʼ Dios la kilhitsukunuʼ pero vachu la kijatapastakʼati. Vachu kakmilpayaʼ la kilhitsukunuʼ pero vachu la kijatapastakʼati. 16Incha vamun la milhitsukunuʼ ox lhichʼiviniy Dios, ex ni lapanaki yu qalasmatʼan jantu malaqasiniyan yu naʼun. Ex jantu lay kaxtaqniyaʼ lhimalaqpuchuncha Dios chʼantaun kun uxintʼi, va jantu malaqasiy yu naʼun. 17Chuncha uxintʼi laqsaval xtʼaqniy lhimalaqpuchuncha ni Dios pero yu aqayntaun jantu tuʼuchun laqaʼiy para kaʼaynlhi ixlhakapuʼati. 18Kitʼin ikxtaqniy lhimalaqpuchuncha ni Dios ni apalay lay ikchiviniy lhichivin yu jantu mispakan xajantu mintachunkʼan uxiknan. 19Pero mas chuncha kunita, tejkan iktayay taʼan tataqxtoʼa yu talhakapuʼan, apalay ox klhilay kakchivinil laqakis chivinti yu lay ox katamalaqasil yu ancha tayanal. Apalay ox klhilay xajantu kaktsukul chivin laqakau mil chivinti laka lhichivin yu jantu malaqasikan. 20Ketʼalaqaunin, jantucha kʼalakpʼastʼaknantʼik tacha jasʼatʼan. Chun, ox kʼaʼuntʼik tacha jasʼatʼan yu jantu tamispay laqtaqal pero kalakpʼastʼaknantʼik tacha xapaynincha. 21La ixlhachimoʼon Dios najun: “Kaklaqlhixaqalayaʼ ni aniy lapanakni laka lhichivin yu jantu tamalaqasiy, mas kaval xachivinti yu minchal alakataun. Pero jantu kintaqalasmatʼaʼ, najun ni Dios.” 22Ex chuncha, tejkan kʼachʼivin lhichivin yu jantu mispakan yucha va para kalakmasunil ixtapʼasta Dios yu jantu talhakapuʼan, jantu para yu talhakapuʼan. Yu ixlaqputeʼeka ixchivinti Dios yucha va para yu talhakapuʼan. 23Chuncha incha tachun yu talhakapuʼan tataqxtoʼa y tachun tachiviniy lhichivin yu jantu malaqasikan ex katanuchal qayntaun lapanaki yu jantukaʼ laniy u yu jantukaʼ lhakapuʼan, ex yucha katajunan va lokos untʼatʼik. 24Pero incha tachun talaqputeʼey ixchivinti Dios, ex katanuchal qayntaun yu jantu lhakapuʼan u yu jantukaʼ laniy ex niman kaʼukskʼatsayaʼ ni alin ixtalaqalhin. Kakʼatsanaʼ ni lhitʼajun laqtaqal por ixchivintikʼan tachun ni lapanakni. 25Ex yucha niman kamispayaʼ yu jantu ox ixmaqsaqmaʼata la ixjalhanuti. Katalakaputatamayaʼ laka tʼun, katoʼoyayaʼ Dios, va kanaunaʼ: “Laqsaval Dios alinta kun uxiknan.” 26Ex chuncha, ketʼalaqaunin, ¿tisuncha maqskʼiniy kamakau? Tejkan uxiknankʼan katʼaqxtʼoqtʼik lati lay katamilpal Salmos, lati lay katamalaninil, lati lay katalaqputeʼel yu Dios jamasunil, lati lay katachivinil laka lhichivin yu jantu mispakan, y lati lay katalhichivinchoqol yu naunputun. Pero tachun katamakal para kataʼayal ixlhakapuʼatkʼan ixlapanakni Dios. 27Tejkan chʼivinanatʼik laka lhichivin yu jantu mispakan va qayntʼuy u qayntʼutu kachʼivinintʼik, pero va si por qayntamin kalalaksaklhipʼintʼik. Vachu maqskʼiniy kaʼalil qayntaun yu kalhichivinchoqol yu naunputun. 28Incha jantu kaʼalil yu lay kalhichivinchoqol yu naunputun, ex maqskʼiniy valiʼiy saq katataulal taʼan tataqxtoʼa yu talhakapuʼan. Katatʼachivinil Dios ixʼamankʼan. 29Va qayntʼuy u qayntʼutu katalaqputeʼel ixchivinti Dios y yu alati katamakal kuenta incha laqsaval yu tanajun. 30Incha alin tuʼuchun yu Dios masuniy aqayntaun yu valiʼiy taulay ex lay kachivinil. Ex yu tsukuy chivin lay valiʼiy saq kataulal. 31Mintachunkʼan lay kʼalaqpʼutʼeʼetʼik ixchivinti Dios por minqayntaminkʼan para tachun lay katalanil y kalakmapʼaysnikal. 32Yu talaqputeʼey ixchivinti Dios maqskʼiniy katalhichimoʼol ixjatsukuntikʼan. 33Dios yucha jantu lhipaʼiniy talakchʼiliti, va maqamay yu ox kʼamakʼatʼi. Chuncha maqskʼiniy kaval mas va toʼoxtaycha taʼan tataqxtoʼa yu talhakapuʼan. 34Ni xanatin maqskʼiniy saq katataulal la mintaqxtoʼatkʼan. Yuʼuncha jantu katalhitsukul lakatin katachivinil. Va kataqasmaknal chuncha tacha najun ixchivinti Dios. 35Incha takʼatsaputun tuʼuchun, lay katalhisakmil ixapaykʼan la ixchaqakʼan. Jantu ox tasuy katatsukul chivinin taʼan tataqxtoʼa yu talhakapuʼan. 36Jantu kun uxiknan kaminchal ixchivinti Dios. Vachu jantu vamun para uxiknankʼan kachil ixchivinti Dios. 37Incha matichun najun ni yucha paxtoqniy kalaqputeʼel ixchivinti Dios y lhilay ox tijuyal kun ni Espíritu Santo ex yucha maqskʼiniy kalhakapuʼal ni va ixlhachimoʼon Dios yu klatsʼoqniyau. 38Incha jantu lhakapuʼan ex yucha vachu jantu lay kalhakapuʼanikal. 39Ex chuncha, ketʼalaqaunin, kalhilaqsoʼotʼik laqputeʼenin ixchivinti Dios. Jantu kalaktʼanchʼatʼik yu tachiviniy lhichivin yu jantu mispakan. 40Tejkan tʼaqxtʼoʼatʼik ox kamakʼatʼik y jantu kʼatʼalakchʼilitʼik.

will be added

X\