1 Mu Kunyan Koosa, muu sumi hinnu di i fosi min ali mu wumukse naa ni ka a chi chenani nar yaa tu nii a wa mag baŋna chene. 2 A vɛɛn chi chenani nar yaa nɔsi vɛri ni aa fim ka tɛɛnɛ bar kpok vɛ nyɛni chenne. O chi mu kur nyɛn nii bar lug nee kaa nii ŋmɛn daŋni o chuŋi min kaali. 3 Chendaha muu wiu aa yir hin di i wa suŋi min hali mu lila waa chɛɛki. Saha maga mu yaa mirigi mu seewa a pɔ di i wa suŋi min. 4 Banawara kur ha min ka mu vɛ ya ba kindɔŋ chen iiu kinkan a chi nibine nyuksa. Ba yaa suni wɛu aa nyɛ min kaa laa dɛu nyinbaanasa di ba yisi mu miisa. Hali kinkina ya mu kin ba yaa wa fuksiu kaa ŋɔ di mu ŋmɛu. 5 Mu Kunyan Koosa, i waa ka piin zim mu tum tagni magwa awa chenani mu yaa tum womsi tuma. 6 Hin ya Koosa naa zene a kpak kpok a kaali kina maga, adaha muu sumi hinnu di ta wa nyɛ mu du banawara maga see su hin chen wa hiisa. Ka ta wa nyɛ mu filimi baa li nara suwachak ni, domi hinnɛ ya nawaalsi banawara ya Ju tima chen gbaan funɛ jɛɛmi. 7 I jɛɛmi daha nibinsa yaa pini mu zomau kaa laa du min hiisa. 8 Chendaha mu niinbisa awa mu walɛ maga yaa nyini minnu mu chi nibin hɔɔr ba wati. 9 Mu bambi boori min niu saha maga di mu yaa waa jɛɛmi hin ali nara pini i zoma o yaa chi mu zomwa baa pini chen. 10 Mu yaa vɔu nɔu a kpa mu titi a burigi jɛrigi, amaa nara yaa pini minnu aku chen daha. 11 Mu tuha wa chɔk ka mu laari mu tu chɔk kilaarɛ, ba yaa mɔm minnu. 12 Nar kinkan yaa sɛm mu sɛma, hali sin nyɔɔrsi yaa kpamu wɛu aa lɔ boola. 13 Mu Kunyan Koosa, mu waa kaa zii sumi hinnɛ saha maga, adaha yaa cheŋi i diŋsa kaa ki nyɛ min mu ki daŋnɛ ta a li i tutɔ saha, domi i chiŋɛ bar bɛgimu aa daŋni min kaa vɛɛn vɔu di ii zi fosi minnu ali mu wumukse ni. 14 Muu vɛɛnaa sumi hinnu di i ta nyɛ wumukse ta ki nyaŋi min a chi mu tu nii bar luŋi ni kaa bu fim vɛri ni. 15 Mu sumi hinnu di i ta wa nyɛ a nyaŋi min a chi chenani nii yaa di nar chen, koo chenani nar yaa chel bɔɔ luŋluŋi ni a luku liili chen. 16 Mu Kunyan Koosa, muu sumi hinnu di i nu mu wusisuma aku chenani i tum tum were aa nyɛ nara ni kaa vɛɛn chiŋi bar bɛgim aa daŋni nara chen, domi chenani ii ɔm nara siki chen zen kinkannɛ. 17 Mu ya i tumtumnɛ, adaha muu sumi hinnu di i ta wa vɛ min a taali kaa chɔ wa a wa fosi min, domi mu nyɛn wumukse kinkan nɛɛ. 18 Mu vɛɛnaa sumi hinnu di i chɔ wa fosi min ali mu dɔm ta nisi ni. 19 Saha maga ba yaa pini mu zomau kaa laa du min hiisa, kaa vɛɛn vɛɛ nyɛ min jirima. I gbaan ka piin zim ba magwa. 20 Hali ba bote mu bambiu a li chenani baa pini mu zoma chen, chendaha baa daŋni ba nyaŋi minnu. Mu yaa kpak tahamau di baa zii ɔm mu sikiu kaa ki sɔɔni mu bambi ali ba sɛmsɛmsɛ ni, amaa ba ka wa ya chen. 21 Saha naa lɔsa yaa fun wa kpak min ka muu daŋni diwe, ba yaa ya lurire a du diwe ni a nyɛ min, di mu di asiu nnyɔksa ka yaa fun kpak min, ba yaa kpa sin haasirɛ a nyɛ min di mu nyɔ. 22 Mu Kunyan Koosa, muu sumi hinnu di hin laa zi nyɛ chenani ba yaa kpak lagmi zene aa di diwe chen ta ba yɔri. 23 Mu vɛɛnaa sumi hinnu di i kpa nyulumsa a du ba mag ni kaa ta bu nyɛ kpok nyɛn ba bar hoka ni. 24 Hin laa zi biksi ba i paan ti kaa nyɛ ba namsi. 25 Hin laa zi nyɛn ba damsi maga burigi dicheena ka nandigi ta bu nyɛn doon, 26 domi saha maga ba ya muksi banawara i lɛrigi ba diŋsa chennu. Ba yaa na banawara i du ba dɛŋasa a nyɛ baa namsi chennu aa sɛm ba sɛma. 27 Muu vɛɛnaa sumi hinnu di i zim ba tum tagni ta maga, kaa ta wa fosi ba wuzu digi ali ba tum tagni taa ni. 28 Hali o ya di i sɔbɛ ba sɔnau a du tɔn ni di ba wa nyɛn i wati, muu sumi hinnu di i dusi ba sɔn ta a ta. 29 Mu Kunyan Koosa, mu nyɛn nunum kinkannɛ, adaha muu sumi hinnu di i yisi min ali chen nunum ti ni, 30 chen ni muu zi lɔ boolu aa pɛki i sɔn ti kaa ki mɔɔli aa biksi nara chenani i zen kinkan. 31 Mu sii su di chen zi sɔɔni i tuhau a kaali wa nar kpa nuha a wa pa hin. 32 Banawara nyɛn muksi ni awa banawara laa jɛɛmi hin chen wa nu i sɔn ti pɛki, ba bara zi bukoo kpaŋsiu. 33 Baa zi wa zimu di ii nu banawara maga ya nyau tima awa banawara maga ba tɔ dɛɛna chen wiila awa ba fɔulau. 34 Buudaha nibinsa awa tɛɛnɛ nibinsa awa tekusa awa kina anawara nyɛn a ni, maa pɛki ya Kunyan Koosa sɔn ti. 35 O zi wa fosi Jerusalɛm timau ali ba dɔma nisa ni kaa vɛɛn bukɔɔ sa Juda pulim tɔsa maga. O zi wa nyɛ o ni jɛɛmɛ ta nyɛn dooniu a dɔ doon tɛɛnɛ ti. 36 Ba niisisa gbaan zi wa siu a dɔ dooni, a nyɛ banawara laa daŋni un mag wa nyɛn dooni.
