1 Mu Kunyan Koosa, mu chiŋɛ bar bɛgimu di mu kpa mu bara maga a lɔ tusɔɔn boola aa pɛki i sɔn ti. 2 Muu zi kpa mu zɔɔsi ki moseu a yaa gbaari aa lɔ boola ta saha naa maga mu yaa wa na ka nha yɛli. 3 Mu Kunyan Koosa, saha naa mu yaa wa lagmi pulim bɔnɛ nibinsi ni, muu zi yaa ki zaami hinnu kaa ki pɛki i sɔn ti ba suwachak ni. 4 Chenani i chiŋi bar bɛgim aa daŋni nara maga chen chi o ziŋi hali a laa tel buudaha a chi bii ziŋziŋi. 5 Naa magkpaa nyini buudaha awa kinawara i naami a ta doon, o yaa na i zenzen tiu. Naa kaa vɛɛn nyini tɛɛnɛ nɔ awa o ki naamɛ, o yaa nyɛ i sɔn ti wa jirimau. 6 Mu vɛɛnaa sumi hinnu di i cheŋi i diŋsa a nu mu wusisum nɔ kaa fosi ya banawara ii daŋni chen wa i kpok ti ni. 7 Mu Kunyan Koosa, i funɛ sɛmu ali i bar jɛɛmi dama ti ni, di ii zi purigi pulim naa baa yir Sɛkɛm chenu a bɔni i walɛ, kaa vɛɛn purigi nɛŋbɔ naa ba funɛ yir Sakɔf chen a gbaari ba. 8 I funɛ vɛɛn ŋɔu, di pulimsi anawara baa yir Giliad awa Manasɛ chen maga ya i kiniwa. Banawara ba ka funɛ yir Ifrɛɛm chen tima chi mu laal tagtarɛ. Banawara ba ka funɛ yir Juda chen tima ka fun chi i kankoor daŋkpala. 9 I funɛ vɛɛn ŋɔu, di ii zi nyɛ pulim naa baa yir Moab chen nyɛni zi wa chi chaasi gbaŋtakau, ka pulim naa baa yir Idɔm chen nyɛni ka wa chi yom naa o kunyana yaa ur natau doŋa a nyɛ un o chaksi chen nyɛni. Chen laa zi wa ya ba zim di hin dɔ ba. I funɛ vɛɛn sɛmu, di ii zi wa nyaŋi banawara ba funɛ yir Filistia tima chenu. 10 Mu Kunyan Koosa, nandigi wato kaa laa zi te ya suwachak a kpa ya la pulim naa baa yir Idɔm chen, a koti la zu o tɔha naa nibinsa kpokee chen tuha. 11 Yaa sumi hinnu di i ta vɛ ya a taali, kaa wa duŋni ya dɔma banawara maga go nan a ta. 12 Suŋi ya ya koti nyaŋi ya dɔm ta, domi i vɛ suŋi ya, nibine waa ki suŋi ya. 13 Hin laa zi nyaŋi ya dɔm ta nyɛ ya, ka ya di nyusum.
