1 Nara yaa kaniu aa vɔu di ba ya wudigi, amaa Koosa kaa laa zi koti nyɛ wi ti ya koo o ta yaali. 2 Nar zi koti lisiu di chenani maga o waa ya chen deŋli nyinbaanu, amaa ya Kunyan Koosa nyini nara maga lisisau. 3 Naa yaa kaa vɔu wi, o sumi Koosa di o ya alibarka a du un ni, chen ni o zi koti nyaŋi wi tiu. 4 Kinawara ya Kunyan Koosa naami tɛɛnɛ nɔ maga ni maga kpak a bɔrɛ. Tum tagni nibinsa waa bar la peti ka ya ta yɔrirɛ. 5 Ya Kunyan Koosa wara daŋni banawara laa daŋni sɔn kinkan bar nyɛni, chendaha o zi wa lɛrigi ba diŋsau. 6 Naa chiŋɛ bar bɛgim aa ŋɔ wuti kaa laa nu Koosa nɔɔ, o zi gil tiin wu tagna a pɛŋ unnu. Naa kaa laa nyɛ o sɔn ti wa jirima, wu tagin waa zi wa o wati. 7 Koosa tusɔɔna ya nar kpa o dɔma a burigi o chɛnsa. 8 Nar ŋɔ wuti kaa na kini tama, o kaali o suni kaa na kina kinkanu. 9 Nibine yaa kaniu a vɔu chenani o kaa ya, amaa Koosa kaa laa biksi un chenani o zi ya. 10 Koor ti yaa sɛmu wa Koosi yiko ni, chendaha o lisisi maga yaa deŋliu. 11 Ya Kunyan Koosa daŋni naa laa ŋɔ wuti kaa laa ya wurewa aa nyɛ nara ni ali o tumtum maga ni. 12 Koorsa waa kila tum tagna aa du ba pulimsi ni, domi wuti ŋɔɔli laa nyɛ pulim gɔmna nyuhu tiin ti wa kpok. 13 Nara wa kpa sɛma a wa koor wati, o yaa daŋni o nu naa kpak wuti chen watɛɛ kaa sak un ni. 14 Nɛha tiina wara daŋni koor paan ki si, domi o paan ti wa si, o waa gali nar siu. 15 Koor ti tutɔ ka chi chenani dobaal yaa sak buudaha ni yuu saha a wa ni doon chenne. 16 Nar kpak nɛha awa zima, o kaali wa o kpak salma awa anzunfau. 17 Banawara laa tum tum were, ba wara tiŋ wu tagin nyinbaan, adaha ma yaa la doonani maga maa nyini, domi ma tiŋ nyinbaan weri, maa zi wa fosiu. 18 Nyukpok bar la peti ya ta yɔri barrɛ. Sɔn daŋni kinkan kaa lɔ nar tɛɛnɛ. 19 Nar nyɛnɛɛ a vɛɛ daŋni sɔn kaa ya nyau, o bɔ o nyɛn aa daŋni sɔn kaa ki namsiu. 20 Naa cheŋi diŋsa aa nu biksisa, o zi di nyusumu ali o wɛɛ maga ni, naa see kaa su ya Kunyan Koosa, o tuha zi sɔɔniu. 21 Nihɛɛ naa kpak nɛha, nara kinkan yaa zim unnu aku oo zim wɛ muna daha. Chenani o sɛmsɛma sɔɔni tuha, chenne a vɛɛnaa kpu nara bambisi wa o sɛmsɛm ti ni. 22 Nɛha ya nɛha tima nyɛni munchiika, amaa nar daŋni o biksi wom waa wa wudigi, o yaa chɔk o saharɛ. 23 Banawara kpak lisi, ba waa yaa lisi wɛ aa puŋ kaa laa sɛm sɛma. Ba sɛm ta kaa burigi nar bambire. 24 Jirima sɛmsɛm mɛlsɛu a chi tuun, a mɛlsɛu wa nɔɔ lɛmsi kaa vɛɛnaa nyɛ nar wa alaafɛ o bara ni. 25 Nar zi lisiu di nyinbaan werire o tiŋ chen, amaa ka o bar la peti ya siu. 26 Tumtumna naa laa daŋni diwe kinkan, waa laa tum kinkan, domi o yaa daŋni o na a diu a puŋ a kpu o lɔsi ti. 27 Tum tagna nibinsa yaa dɛu nyinbaanasau di ba du nara wa dɛŋasa, hali ba nɔɔ sɛm sɛma yaa tagniu aa boori bara. 28 Tum tagni tima ta yaa gbau aa lɔ nara gantɛla, aa du nara wa wumukse kaa wɔligi nara wa ba chɛnsa aa li dɔŋ ni. 29 Ba yaa mur ba chɛnsau, a la du wu tagin zenzen ni. 30 Maa doso banawara yaa miriki see aa nyini ma kaa laa jɛɛmi ma chen ni, domi ba yaa lisi di ba ya ma wu taginnɛ. 31 Naa nyɛni were, o nyɛn weri ti bɔta ya mii ziŋirɛ. Nibine nyuksa ka wa chaani, o biksi di Koosa kpa chen a nyɛ un di nara ki nyɛ un jirima. 32 Nar nyɛnɛɛ kaa kpak kanyita, o kaaliwa o dɛɛsi kpoku. Nar ka kote a saksi o titi ali wɛɛ ni, o kaaliwa o ŋɔ di o saksi tɔ birigiu. 33 Nibinsi yaa yo walɛu di ba buksi Koosa tutɔ, amaa waa ka zim wɛ maga.
