1 Israɛl tima nyɛn tuchɔk niu, domi ba jirima chesiu a chi paputi zɔŋsi o nihɛɛti sinnyɔrsi nyuuni ni aa chesi, ba nyukpok nyuuni ta maga ya ki sɔɔr lɛmwa, amaa ba yaa suni wɛu a nyɔ sin a dɛɛsi. 2 Ya Kunyan ti kpa naa kpak kpok awa yikou di o wa chem ba nara laa zi wa a chi dopeha awa do zenzen chesi, a chi nii kpok nara laa wa pol di o fuksi tɛɛnɛ maga. 3 Ba nihɛɛti sinnyɔrsi ta nyukpok ti zi wa chɔ tɛɛnɛ niu baa nɔsi. 4 Ba jirima ti zi wa petiu kaa ka ba a chi bugil nara ha nɔn nɔn falɛ bun tuha ba tɔrki aa di saha nara o sɛɛri chen. 5 Wuzu digi wau ya Kunyan ti zi wa chi papu falɛ naa kpak kpachak kinkan. 6 O zi wa tum tum wereu aa nyɛ banawara ya sɛriya ni diile, chen ni kaa ki kpaŋsi banawara laa pɔ tɔha ti bolzɔɔnɔ chen. Azaaya wa Koosa witiin naa funɛ ya sin nyɔɔr Juda pulim ni chen. 7 Hali witiinsi ta awa Koosa dam kɔkɔɔrsi ta mag nyɔ sinnɛ a dɛɛsi aa yeegi. Ba nyɔ sin kinkannɛ a vɛ zim ba sɛm ta see, o witiinsi ta sin nyɔha ti daha ba wa chɔ a na chenani Koosa daŋni ba la sɛm, Koosa dam kɔkɔɔrsi ta sin nyɔha ti daha nar kpa wumuksi wa ba wati ba waa zim chenani ba suŋi tiina. 8 Koti nawara ni baa kani chen mag ya sɛɛsirɛ hali a vɛ kpak jirima tamafini. 9 Ba yaa sɛm mu sɛma a ŋɔ, "Baal nɔ lisi di, antirɛ oo biksi nan? Anti laa daŋni o Koosa sɛmsɛm ti? O Koosa sɛmsɛm ti ha kur mag bichɛlpulimsiwa. 10 O haru di o sɔɔni bara aa biksi ya sɛm bɛgim bɛgima." 11 Ma vɛ nu mu sɛma Koosa zi nyɛ nar kpa sɛm kurgɛu a wa biksi ma wɛ. 12 O nyɛ ma hiisiu awa tusɔɔna, amaa ma vɛ chenu. 13 Chendaha ya Kunyan ti kaa biksi ma sɛm bɛgim bɛgima awa wel bɛgim bɛgima chen, chen ni ma tum wu wewe ma zi putiu, toroko kaa zi kpak mau ba kpa ma la tɔ dɛ. 14 Ma zimɛ tima nawara ya nihɛɛta a dɔ Jerusalɛm nɔ nan maa nu kinkina ya Kunyan ti sɛm. 15 Ma dɛɛsiu di ma wa lɛlɛ sɛm sɛmau dɔŋ wati, di ma waa zi na siu. Maa lisiu di sibir waɛɛ o waa zi pu ma, domi ma kpa ma yɛdasa a du nusunsa awa mur nɛɛ di maa zi fosiu. 16 Nanɛ ya Kunyan ti ŋɔ, "Mu kaa sa zachikre Zayɔn ni o kpok a vɛɛ ziiki. Mu kaa kpa bunkol kpokre a zɔŋ un ni a sɔbi sak un ni di, yɛda naa kpokee o kpak kanyita. 17 Tum were tumi kaa wa ya da nara ba kaa kpa aa magsi dɛ ti, wuti ŋɔɔli ka kaa wa ya o nin da magsi ti." Do peha zi wa chaasi nusunsi ta magau a kaali ka nii wa chaasi ma kpok ti. 18 Vɔwa nara ma wa lɛlɛ vɔu dɔŋ wati chen zi wa dusiu ka ma nɔ bɛgim ti wa dusi, sibir wa chel ma nisa zi nyɛn un niu. 19 Sibir ti zi wa muksi mau piili chɔɔsa kila chɔɔsi digi saha maga ma ka zi kur wa nyɛn, chen ni wa kanyita ni nha wa dusum. Koosa laaboor fali ti kur wa wa hansur fali ka kaa wa wa. 20 Ma zi wa chi baal digiu ali jɛɛgɛ ni nara funɛ daŋni o chɔ ki chɔɔli tore ni kaa tuuni o nasa kaa vɛɛna daŋni o kpa kuntu bore a tɔ o bar maga chenu. 21 Ya Kunyan ti zi wa chem laalu a chi chenani o fun tum Pɛrasim awa Gibiɔn nɛŋbɔsi ta ni chenu. Kinkina laa zi wa nyɛ o ya chenani o vɔu di o ya chen see o wa peti o alaazibu tum tau. 22 Ma taa mɔm sɛm nawara mu sɛm ma nan, ma ya chen o zi wa bɔm nyɛ mau wa ma fosi, domi mu nu ya Kunyan ti nyinbaan naa o kpak a kaa chem pulim nɔ chenu. 23 Maa nu chenani muu sɛm nan kaa cheŋi diŋsa kinu chenani muu ŋɔ ma nan. 24 Ni pari wato a zi kur ki par ŋmaha kaa vɛɛ duuli. 25 Saha naa o wa par kɔpɛŋa a peti o yaa du o ki duhau kaa buraa par ba fali. 26 O zim chenani o tum o ŋmaha tumau, domi Koosa biksi un. 27 O waa zi kpa daa yuk aa piisi sansike koo gɔŋa see o kpa nara maksɛ. 28 O kaa kum o sinkaafa o wara nɔsi a ni aa fimsi, amaa o yaa kpa loriu a zu val a tuha a zim kumi aa kum. 29 Nan zima awa nan nɛha nɔ li ya Kunyana ti watɛɛ. Koosi vɔwa maga ya nɛha vɔwarɛ a maga kaa yau.
