1 Mu zi chiŋiu aa nyini a nee fɔuli naa maga mu fɔuli nan, yɛrɛ mu Kunyan Koosa ti kaa jɛrigi min? 2 Doonee o fun ŋɔ, "Mu kaa chaasi wu bɔnɛwa a biksi hin, adaha sɔbi a a dau, chen ni i zi wa karimi aau a biksi nara. 3 Sɔbi a a dau, domi saha nɔ laata chen wii ti kaa tum, amaa saha ti wa bu bol. Chenani mu ka kaa biksi hin chen maga zi wa tumu. I zi wa lisi i bambi ni di i pɔ chen a kuu, amaa kur sɔɔni bara aa pɔ, domi see chen wii ti tum. 4 Laaboor naa mu kaa kpa nyɛ hin chen nɛɛnɛ. Banawara ya tum tagna nibinsi chen waa zi bu wa nyɛn a vusi, amaa banawara laa tum tum were ali Koosa suwachak ni chen waa zi wa nyɛnu, aku baa chiŋɛ wa wuti ni a nyɛ Koosa ni chen daha." 5 Nisi ki damata mur narawa. Nar daŋni o duŋduŋ kin, o nyuha yaa kpok ka o kura tum kaa vɛɛ hiisi a chi chenani siu kuraa kpu kaa vɛɛ gili chen. Chendaha ba kura chem pulimsi kinkan saha maga chen. 6 Nibinsa banawara nara ta chem a nyaŋi chen zi yaa wa chiŋiu aa ya ba asaasi kaa ki ŋɔ. Ba yaa fun fuksi nara kinau a dau, amaa lalaknɔ ma gbaan nyɛn muksi nee. Lalaknɔ yɛrɛ ma bu kaa ya aa na kini ta? 7 Ma banawara chem nara wa laal ni aa nyaŋi chen zi wa ka maa zim di ma nyɛn chimni nɛɛ ka baa muksi ma di maa sak nyɔɔra ali malɛ anawara ma pɛŋsi chen ni. Ma dɔma zi wa du ma hansur taginu a nyaŋi ma. 8 Ma chem pulimsi kinkan nibinsa wa laal niu a nyaŋi, amaa lalaknɔ banawara ka pulimsi taa ni a nyɛn wa ba miisisa ni chen gbaan zi wa chem mau a nyaŋi, aku chenani ma chem pulimsi kinkan kaa kpa muksi kinkan a du o nibinsi ni chen daha. 9 Mu nyɛn muksi niu, domi ma fuksi narau wa tum tagna ni a nyɛ ma walɛ burigi kini tima kaa zii lug di ma kok ma damsa ali wumukse ni. 10 Ma ka du ma walɛ wa hiisirɛ ali ma tuma ni, domi chenani ma chem pulim damata nibinsa a nyaŋi kaa chɛɛki ba pulimsi ta a ta chen ti nyɛ ma nyɛn ta yɔri nɛɛ lalaknɔ. 11 Hali lalaknɔ o chi pulimsi ta zagbɛrkpursi ta bunkola maga wiu ka chɛɛm kinkan li doon aa wa. 12 Ma nyɛn muksi awa ta yɔri niu, domi ma yaa fun na ka tɔha ti nibinsa tum a puti ma ma yaa la kpu bau kaa fuksi ba tɔsa a dɔ. 13 Ya Kunyan Koosa naa zene a kpak kpok awa yiko a kaali kina maga chen piin vɔwu di nibinsi nawara ma chem a nyaŋi chen kuunsi ti kaa wa chi chenani ba yaa buti patro a du din ni chene. Pulim bɔnɛ nibinsi ta kur kaa kuu a ta yɔri. 14 Nibinsa zi wa na chenani niita su teku awa pola chenu tɛɛnɛ nɔ ni a zim di ya Kunyan Koosa werwa jirima nyɛɛliu. 15 Ma nyɛn ta yɔri niu, domi ma funɛ na paan taginu kinkan a du ma dɔma ni, amaa lalaknɔ ma burigi jɛrigɛu a du ma zuudɔŋsi wa hiisa. Ma nyɛ ba seewa biri ba val aa yeegi a chi chenani nar yaa nyɔ sin aa dɛɛsi chen. 16 Ya Kunyan Koosa zi wa nyɛ maa di hiisau ali ma wɛɛ ni kaa ta buu na jirima ali nara wati. Ma titi zi wa burigi sin nyɔɔsau a yaa nyɔ sin aa dɛɛsi. 17 Tum tagna anawara ma tum a nyɛ Lɛbanɔn tima ni chen maga zi wa burigiu a di ma. Ma kpu doon sela magwa, lalaknɔ sela ka aa ɔsi ma aa du ma hansur tagin. Chen zi wa yau, aku maa kpu nara kinkan ali ma laalsi ni kaa chɔk ba pulimsa awa ba tɔsa a ta chen daha. 18 Vur wa kpak nyɔɔra, domi nibine laa kɔɔri un ka aa mur ma ali a nusunsi ni, amaa ma yaa nyɛ ma see su aau. A ka waa koti aa sɛm sɛma. 19 Ma nyɛn ta yɔri niu, domi ma ya sɛm sɛmau ali da koo bunkol wati di o si chiŋi, amaa vura koo vug ka waa ki koti a chaasi wudigi a biksi nibine. Hali ba kpa salma awa anzunfa a naami un o ka wa kpak miisa a chi nibine. 20 Ya Kunyan Koosa nyɛn o bar jɛɛmi dama naa du kasi chen ni. Tɛɛnɛ nɔ nibinsa maga, ma moori ma nɔɔna ali o suwachak ni.
