1 Saha naa nibinsa fun wa su tɛɛnɛ nɔ nihabichɛsa zi nyɛn chen. 2 Koosa bisa ta funɛ na di nihabichɛsi ta werwa haanasau. Ba fun kpa ba ba nyɛn ba wati a ya ba haanasa. 3 Koosa fun lisi o bambi ni di a waa zi bu nyɛ o siim ti ki vusi nibine ni. O funɛ ŋɔu di o wa zi nyɛ nibine bu nyɛn aa vusi, di o baraa siwu, adaha nibine bunsa zi ya kɔk difumlɛ duŋduŋnɛ. 4 Chen saha ti banawara ba funɛ yir Nɛfilim koo nibin kpok taa chen funɛ ya nihaana niisisa kaa ya Koosa nibinsa chen funɛ nyɛn. Ba waa funɛ ya nibin kpoka saha digi ti. 5 Koosa funɛ wa na chenani tum tagna tumi kur nyɛn nibinsa ni ka ba lisisa kur ya tum tagna lisi saha maga chen. 6 O funɛ ya un yɔriu wa o naami nibine chen. O fun luk nɔ o titi. 7 O funɛ lisi o bambi ni, "Mu zi kpu nibine awa kina anawara mu naami nan duhau, aku baŋ daha o ya min yɔriu wa mu naami a a ta tɛɛnɛ nɔ ni?" 8 Saha ti baal naa baa yir Nowa chen funɛ kpak dahau ali Koosa suwachak ni. 9 Nowa laaboora nɛɛnɛ, o funɛ ya nibin werire Koosa suwachak ni, domi o funɛ zim Koosau. 10 O funɛ kpak bisa batorwa. Ba sɔna funɛ ya Sɛm, Ham awa Jafɛt. 11 Saha ti nibine maga funɛ tum tum tagniwa kinkan Koosa suwachak ni. 12 Koosa funɛ nyiniu a na chenani nibinsa su tɛɛnɛ nɔ wa tum tagni tumi ni. 13 O fun ŋɔ Nowa ni, "Mu zi kpu nibine magau, domi tɛɛnɛ nɔ magkpaa zi suu wa nibine tum tagni ni, 14 amaa kpaasi ariŋa zenzen wa taabo weri ni, o kpak dɛɛna a wa koti zer i wa i sal walɛ, kaa ta o tuha awa gantɛl wa chel ni. 15 Nyɛ o ziŋziŋ ya naa kɔksa naasi difumnyuun, o pɛnpɛn ka ya naa fumnɔpɛ daanyuun. Zini ka ya naa fumnaasi daanyuun. 16 Kpaasi ariŋ ti nyuha kaa gil bar digi o tel nin magsi fumlɛ alɛ wato kila nyu daha ti. Du un dɛɛna zɔŋsi dɔŋ ni, kaa du zɔɔnɔ o cheŋcheŋ ni, kɔɔri ariŋ ti o ya dɛɛna tora a zɔŋsi dɔŋ ni. A maga kpak zɔɔnɔsa. 17 Mu kaa tum niirɛ o wa di tɛɛnɛ nɔ nibinsa maga awa o ki nyine. Anawara nyɛn tɛɛnɛ nɔ ni maga zi wa sitiu, 18 amaa nan vɔurɛ mu ka vɔu wa hin ni. Nii wa zi di i haan, i bisa awa i bisa haanasa ba zomsa. 19 Vɛɛn chɛ ki dɛɛsɛ maga nihaan awa nibaal a du ariŋ ti ni. Zer diwe kurgɛ maga a du. 20 Zer zimebisa abalɛ, sela abalɛ, awa ki nyine anawara laa pal tɛɛnɛ ni chen gbaan a du ariŋ ti ni. 21 Zer diwe kurgɛ maga a gbaari a ya ma diwe." 22 Doonee Nowa fun tum chenani magkpaa Koosa biksi un chen.
