1 "Ma tiŋ chiksɛsi naa mu kpa nyɛ ma zinan chen maga wa wuti ni chen ni, maa zi nyɛnu aa wɔsi a su pulim naa Koosa vɔu di o kpa nyɛ ma nawaalsi ni chen. 2 Ma lisi chenani ya Kunyan Koosa fun te ma suwachak a kpa ma a zu nyaabaan ti ni bun fumnaasi a la li kaa laa zamsi ma wa wumukse ni, chen ni o zi zim chenani ma bambisa vɔwu awa chenani maa zi tiŋ o chiksɛsi tau. 3 O funɛ nyɛ lɔsa kpak mau ka o fun nyɛ ma diwe naa baa yir 'mana' chen ma di. Hali ma nawaalsa ha waa fun di chen diwe ta. O funɛ ya chene di o biksi ma di diwe nyuuni laata nibine nyɛn, amaa see o tiŋ chenani maga Koosa biksi. 4 Bun fumnaasi ta maga tuha ni, ma kilaarɛ waa fun kusi ma naasa ka waa fun fuusi. 5 Ma zim di Koosa kpak mau aa ta nyinbaan ni kaa vɛɛnaa lɛrigi ma diŋsa a du chenani nyan yaa dɛɛsi o be chen. 6 Adaha maa tum chenani Koosa chiksi ma chen kaa ki nyɛ o sɔn ti wa jirima. 7 Ya Kunyan Koosa kaa kpa mau a la du tɛɛn weri naa kpak mɔɔgsa awa pol wisa ni awa tɛɛnɛ naa kpak nɛŋbɔɔsa awa kunkulsi ni chen. 8 Chen tɛɛnɛ ti laa bi mɛ awa niŋmɛna awa bugil maga kaa vɛɛn kpak 'ɔlif' bugila awa tuun nuu. 9 Dooni lɔsa waa zi wa kpak ma, ma ka waa zi wa nyɛn muksi ni. Doon gbɛntɛl bɔɔsa kpak lukɛwa ka o kunkulsa kpak salim bɔɔsa. 10 Maa zi wa na ma tutɔu aa di kaa ki pɛki Koosa aku chenani o kpa ma wa du tɛɛn weri ti ni chen." 11 "Ma ta wa sugli Koosi wɛ kaa tiŋ o chiksɛsa anawara mu kpa a nyɛ ma chen zinan. 12 Saha naa ma wa na ma tutɔ aa di kaa sa dam were a nyɛn, 13 ka ma sela awa ma anzunfa awa ma salma ti maga gbaari kinkan. 14 Ma ta wa dɛɛsi nyukpoka a sugli Koosa wɛ, domi waa funɛ yisi ma ali Ijipt tima nisa ni, ma bu vɛ ya yosa. 15 O funɛ te ma suwachaku a kpa ma val nyaabaan ti tuha ka dum tagna awa numsa nyɛn dooni kinkan. Dooni funɛ ya kinkɔɔkrɛ, amaa ka o fun nyɛ nii li kparbunyaŋ ni maa nyɔ. 16 O funɛ nyɛ ma diwe naa baa yir 'mana' chenu ma di ka ma nawaalsa vɛ zim chen diwe ta. O funɛ zamsi mau wa wumukse ni, chen ni bar peti ni o zi ya alibarkau a du ma ni. 17 Adaha ma ta wa lisi wuzu digi di ma titi kpok awa ma yiko nɛɛ ma na nisi ki damata chen. 18 Ma zim di ya Kunyan Koosa nyɛ ma yiko ma na nisi kini ta chen, chen ni maa zi zimu di o ya wuti tiinnɛ ali vɔwa naa o fun vɔu wa ma nawaalsi ni chen. 19 Ma ta wa sugli Koosa wɛ kaa burigi aa jɛɛmi koosi bɔnɛ ka ma ya chen o zi kpu ma magau. 20 Ma vɛ tiŋ Koosa nɔɔ, o zi kpu mau a chi chenani o kaa kpu pulim bɔnɛ nibinsi ta chen."
