1 Ba naa funɛ nyɛn doon ka nii ti go ba chen fun ŋɔ ya di doon sɔn ya Mɔltɔ. 2 Ba funɛ ya nibin werewa ya wati a la ya a du. Doon funɛ ni ka waa nyɛn. Chendaha ba fun biksi din di ya weeri. 3 Pɔɔl funɛ lagmi daasa a du din ti ni chene, dum fun li dooni a gasi o nin. Din ti nunum funɛ nyɛ dum ti li. 4 Ba naa funɛ nyɛn pulim ti ni fun na dum ti ka o gasi Pɔɔl nin ti. Ba fun ŋɔ dɔŋ ni, "Baal nɔ funɛ kpu nandigirɛ. Hali nii ti vɛ di un chen, amaa lalaknɔwa o na o nyɔɔra a zi siu." 5 Pɔɔl fun misi dum ti o chel din ti ni, ka o vɛ ya un wu digi. 6 Ba funɛ nyini un a la pɔ di o fuusi a chel tɛɛnɛ ni a siu. Ba fun nyini a vusi a na di wudigi wa ya un. Ba fun chɛrigi ba bambe a li chenani ba fun te ŋɔ di o kpu nandigirɛ chen a ŋɔ di Koosa funɛ kok un. 7 Ya wa pulim ti koor bar nyɛni wa fun bol dɔŋ ni. O sɔn funɛ ya Publius. O fun la ya a du ya nyɛn o wati wuzu butora. 8 Kabilima funɛ kpak Publius nyana ka o chaari a chɔ o kichɔɔli ni. Pɔɔl fun nu o wichɔti ti wɛ a fun la zu o dɛ chɔɔli ti a sumi Koosa a nyɛ un a kpa o nisa a sak un ni a tiibi un. 9 Chenani o fun tum chen laaboora mɔɔli pulim naa nii go chen maga. Ba naa maga funɛ wi a nyɛn dooni fun wa Pɔɔl wati o tiibi ba. 10 Ba fun kpa papaha damata a nyɛ ya. Ya funɛ saksi di ya li pulim ti ni pɛnsa atora gantɛl ni, ba fun kpa ya papaha a gbaari kin nawara ya daŋni ya kpa li ya val ti ni. 11 Alɛzandria tima ariŋa funɛ nyɛn doonee fufuk saha ti. Ba funɛ yir un, "Vursa a naa ya leusisa". Ya fun la zu un a kaali. 12 Ya fun la tel tɔha naa ba yir Sirakus a nyɛn dooni wuzu butora. 13 Wuzu butora ta gantɛl nɛɛ, ya fun li dooni a kaali tɔha naa ba yir Rɛjium ali Itali pulim ni. Chɔɔsa funɛ wa pisi, peha fun ya ali pul mun ni ka ya li dooni. Wuzu bulɛ gantɛl ni ya fun la tel tɔha naa ba yir Puteoli chen ali ariŋ ti ni dooni. 14 Yesu nitiŋɛ ba naa nyɛn dooni, fun nyɛ ya wa nyɛn ba wati. Wuzu bunɔpɛ gantɛl ni, ya fun li dooni a kaali Room. 15 Yesu nitiŋɛ ba naa nyɛn dooni, fun val nyinbaan ziŋi a wa chem ya. Bɔnɛ fun chem ya a li yawa naa ba yir Apius. Ba wa ya fun val tama ka ba naa tiŋ ba gantɛl a wa chen, fun chem ya a li hɔɔra bar chɔɔli damsi butora. Pɔɔl funɛ na ba chen, o kpami un o zaami Koosa chen daha. 16 Ya funɛ la tel Room, ba fun nyɛ Pɔɔl nyɛn o duŋduŋ ka lanjima il un. 17 Wuzu butora gantɛl, o fun yir Ju tima ba naa nyɛn dooni, nihɛɛta ba lagmi a wa o wati. O fun ŋɔ ba, "Mu niinbisa, mu wa fun tum tum tagin a du ya walɛ ni. Mu ka wa fun vɛɛn biksi nara di ba ta bu tiŋ ya nawaalsi ta nyinbaan. Hali nan daha, ba fun kpak min a tɔ dɛ ali Jerusalɛm ni a kpa min a du Room tim nisa ni. 18 Ba fun di mu sɛriya a na di mu wa ya wi naa la zi nyɛ mu siu a la daŋni ba lisi min. 19 Ya walɛ ta wa funɛ daŋni ba lisi min a fun namsi min di mu la sumi pulim gɔmna nyuhu tiin nihɛɛ naa nyɛn dooni, di o kpa min la nyɛ koorsi ta nyuhu tiina Siiza ni o di mu sɛriya. Mu wa wa bar nɔ di mu wa fiksi bau. Ba funɛ muksi minnu. Chendaha mu wa. 20 Ya Ju tima kpak bambi bɛgimu di Koosa zi tum naa o fun vɔu di o tumu ba wati wuzu digi. Room tim ta funɛ kpa zɔgliu a vɔu mu nisa a nyɛ lanjima nɔ il min, domi naa ya nara kpak bambi bɛgim a nyɛ chen daha. Chendaha mu yir ma di ma wa min na dɔŋa." 21 Ju tima ba naa funɛ nyɛn Room ni chen, fun ŋɔ un, "Ya niinbisa ba naa nyɛn Judia pulim ni, digi wato a sɔbi i wɛ a du tɔn ni a nyɛ ya. Nandigi wa gba ali dooni a wa ŋɔ ya i laaboora koo a chɔk i sɔn ya wati. 22 Ya zimu di ba naa nyɛn bar maga ni ka ba sɛm sɛm tagna a du ba naa wa hin la tum tum ni. Chendaha ya daŋni ya nu chenani i lisi." 23 Ba fun la nɔɔni di ba wa Pɔɔl zi bu lagmiu. A wuzu ti fun wa tel, ba fun i a gbaari a wa doonani o nyɛn chen. A piili chɔɔsa hali nha wa chel, o fun biksi ba di saha naa Koosa zi wa dɔ nara telu mun. O fun karimi Koosa sɛm tɔn ti bar digi ali chiksɛ naa o fun lisi a nyɛ Mosis ni chen awa sɛm naa Koosa witiinsi ta fun sɔbi di o biksi ba chenani o fun ŋɔ Yesu wɛ chen ya wutirɛ. 24 Ba bɔnɛ fun nyɛ ba see su o biksi ti. Ba bɔnɛ ka wa fun nyɛ ba see su un. 25 Pɔɔl sɛm ta fun nyɛ Ju tim ta di dɔŋa wa amɔrɛ ka ba funɛ daŋni ba la, amaa Pɔɔl funɛ nyɛ ba chiŋiu o sɛm ba sɛm tama a gbaari. O funɛ ŋɔ bau, "Koosa siim weri ti funɛ nyɛ Koosa witiina Azaaya sɛm wuti sɛma a nyɛ ma nawaalsi ta ni saha digi. 26 O fun sɛm di Koosa ŋɔ un, 'La ŋɔ Ju tim ta ni, ba kpak seeu kaa vɛɛ naali. Mu ŋɔ bau, ba ka wa zim mu sɛm ta mun. 27 Nara nama bambe situ. Ba tɔ ba diŋsiwa awa ba see gbaanko. O vɛ ya chen, ba bambe fu zi lisiu ka ba nu mu sɛm ta a koti a na. Ba bambe zi chɛrigiu, chen ni mu zi gil ba tum tagna a nyɛ ba.' " 28 Pɔɔl fun bukoo ŋɔ ba, "Mu daŋni ma zimu di ba naa vɛ ya Ju tima na nyinbaanu di ba nu Koosa laaboor weri ti di o daŋni o yisi bau ali ba tum tagna ni ba tiŋ un. Ba nidamata zi nu unnu." 29 Pɔɔl funɛ sɛm chen Ju tim ta funɛ di dɔŋa wa amɔrɛ. 30 Pɔɔl fun la nyɛn nandigi dam ni a la bɔ un dam ti nyuhu ni bunsa alɛ. O fun la ba naa maga wa di ba zaami un a du. 31 O fun kpak bambi a biksi ba di saha naa Koosa kaa wa dɔ nara chen telu awa ya kunyana Yesu Kristo wɛ. Nandigi wa fun to a tɔ un nyinbaan di o ta sɛmi.
