1 Yupela ol manmeri bilong mi, yupela harim gut tok bilong mi. Yupela putim yau gut long toktok mi laik mekim. 2 Mi laik mekim ol tok piksa long yupela. Mi bai stori long ol kain kain samting i stap hait long bipo i kam inap nau. 3 Bipo ol tumbuna i tokim mipela long ol dispela samting, na mipela i harim pinis na mipela i save long en. 4 Mipela i no ken haitim tok long ol pikinini bilong mipela. Nogat. Bai mipela i tokim ol nupela lain pikinini i kamap. Bai mipela i stori long bikpela strong bilong God, na long ol strongpela wok em i bin mekim, na long ol kain kain mirakel em i bin wokim. 5 God i givim lo bilong en long ol manmeri bilong Israel. Em i givim tok long ol lain tumbuna bilong Jekop, bilong ol i bihainim. Em i tokim ol tumbuna bipo olsem, “Yupela i mas lainim gut ol pikinini bilong yupela long olgeta lo bilong mi.” 6 Olsem na ol lain pikinini i kamap bihain ol tu i ken lainim, na bai dispela lain i mas tokim ol pikinini bilong ol. 7 Sapos ol i mekim olsem, bai ol dispela lain tu i ken bilip long God, na ol i no ken lusim tingting long ol samting em i bin mekim. Na bai ol i ken bihainim olgeta lo bilong em. 8 Nogut ol i kamap wankain olsem ol tumbuna bilong ol. Ol tumbuna i bin bikhet na sakim tok bilong God, na ol i no bilip strong long em, na ol i no bihainim tok bilong en oltaim. 9 Bipo ol Efraim i save pait long banara na spia. Tasol dispela taim pait i kirap na ol i ranawe. 10 Ol i no bihainim kontrak bilong God, na ol i no laik bihainim lo bilong en. 11 Ol i lusim tingting long ol samting em i bin mekim na long ol mirakel em i bin wokim long ai bilong ol. 12 Long ai bilong ol tumbuna God i wokim wanpela mirakel long ples Soan long kantri Isip. 13 God i brukim solwara na solwara i sanap long hap na long hap, na em i bringim ol Israel i kam namel. 14 Long san em i stap long klaut na em i go pas long ol, na long nait em i stap long lait bilong paia na i go pas long ol. 15 Em i brukim ol ston long ples drai, na i mekim wara i kamap long daunbilo na ol i dring. 16 Em i mekim wara i kamap long ston na wara i ran olsem bikpela wara long bus. 17 Tasol ol i wok long mekim sin long God Antap Tru. Ol i stap long ples drai na ol i bikhet long em. 18 Ol i traim God na mekim olsem. Ol i singaut strong long em i givim ol dispela kaikai ol i laikim tumas. 19 Ol i tok bilas long God olsem, “God inap givim mipela planti kaikai long ples drai, a? 20 Tru, pastaim em i paitim ston na bikpela wara i kamap. Tasol olsem wanem? Em inap givim bret na mit long mipela, o nogat?” 21 Orait Bikpela i harim tok bilong ol na em i kros. Em i salim paia i kam daun long ol lain bilong Jekop. Na kros bilong en i kamap bikpela tru. 22 Long wanem, ol i no bilip long em. Na ol i no laik bilip long em i laik helpim ol bai ol i stap gut. 23 Tasol maski, em i tokim skai antap na skai i op. 24 Orait em i salim mana i pundaun na ol i kaikai. Em i givim kaikai bilong heven long ol manmeri. 25 Olsem na ol i kisim kaikai bilong ol ensel. God i givim planti kaikai long ol, na ol inap tru. 26 Na bihain em i kirapim win long hap bilong sankamap, na long strong bilong em tasol, em i kirapim win long hap bilong saut. 27 Na em i mekim planti pisin i pundaun namel long ol inap olsem das bilong graun, na olsem wesan bilong nambis. 28 God i mekim ol dispela pisin i pundaun namel long kem bilong ol, na raunim ol haus sel bilong ol. 29 Olsem na ol manmeri i kaikai na i pulap tru. Dispela samting ol manmeri i krai long kisim, em God i givim ol. 30 Ol i wok long kaikai i stap. Ol i no kaikai pinis yet, 31 na God i kros long ol na i kilim i dai ol strongpela man, em ol gutpela yangpela man bilong Israel. 32 God i bin wokim ol mirakel, tasol ol manmeri i wok long mekim sin moa yet na ol i no bilip long em. 33 Orait wantu tasol em i pinisim ol, olsem win i kamap long maus i save go pinis kwik. Em i bagarapim ol kwiktaim tru na ol i dai. 34 Taim God i kilim sampela i dai, ol arapela i tanim bel na i kam bek long em na ol i prea strong long em. 35 Nau ol i tingim gen, God em i wasman bilong ol. God Antap Tru em i man bilong helpim ol. 36 Tasol ol i giaman na mauswara nating long em. 37 Ol i no bihainim tok bilong em, na ol i brukim kontrak ol i bin mekim wantaim em. 38 Tasol God i marimari long ol na rausim sin bilong ol, na em i no bagarapim ol. Planti taim em i pasim kros bilong em, na em i no belhat long ol. 39 Em i tingting long ol olsem, ol i manmeri tasol, ol i olsem win i kam na i go pinis. 40 Planti taim ol i bikhet na ol i sakim tok bilong em long ples drai. Na planti taim ol i mekim em i bel hevi. 41 Ol i no lusim pasin bilong traim God bilong Israel, em God bilong mekim gutpela na stretpela pasin olgeta. Ol i traim em na mekim em i kros tru long ol. 42 Ol i no tingim bikpela strong bilong em, na ol i no ting long dispela taim em i bin kisim bek ol long han bilong ol birua. 43 Long dispela taim em i wokim olkain mirakel long hap bilong Soan long Isip. 44 God i tanim ol wara i kamap blut na ol Isip i no inap dring. 45 Na em i salim planti lang na planti rokrok i go long ol. Na ol lang i kaikaim ol, na ol rokrok i bagarapim planti samting long ol gaden bilong ol. 46 Na God i salim ol binatang wantaim ol grasopa i kam na ol i kaikai ol samting i kamap long ol gaden bilong ol. 47 Em i salim ren olsem ais na dispela i bagarapim ol diwai wain bilong ol. Na em i mekim ais i bagarapim ol diwai fik bilong ol. 48 Em i salim bikpela ren olsem ais i kam na i kilim ol bulmakau bilong ol. 49 Em i kros moa moa yet long ol na i mekim save tru long ol. Na em i salim ol ensel i go bagarapim ol na ol i gat bikpela hevi. 50 Em i belhat long ol na em i no larim ol. Nogat. Em i salim bikpela sik long ol na ol i dai nabaut. 51 Em i kilim i dai ol namba wan pikinini bilong olgeta lain bilong Isip. 52 Na em i olsem wasman bilong sipsip, na em i go pas na was long ol manmeri bilong en. Long ples drai em i soim rot long ol. 53 Em i bringim ol i go na ol i stap gut, olsem na ol i no pret. Tasol solwara i karamapim ol birua bilong ol. 54 Em i bringim ol i kam long graun bilong em yet. Em dispela ples maunten em i bin kisim long strong bilong em yet. 55 Em i rausim ol arapela lain taim ol manmeri bilong en i kam. Na em i tilim dispela graun long ol lain bilong Israel. Na em i larim ol i sindaun gut long ol haus sel bilong ol. 56 Tasol ol Israel i traim God Antap Tru na i bikhet long em. Ol i no bihainim lo bilong en. 57 Ol i bikhet na sakim tok bilong en, olsem ol tumbuna bilong ol i bin mekim bipo. Ol i olsem banara i krungut na i no save sut stret. 58 Ol i wokim ol alta bilong giaman god na dispela i mekim God i kros. Ol i wokim ol giaman god na God i bel nogut long ol. 59 God i lukim pasin bilong ol na em i belhat tru long ol, olsem na em i givim baksait olgeta long ol Israel. 60 Na em i lusim haus sel bilong en long Silo. Long dispela haus em i bin i stap namel long ol manmeri. 61 Na em i larim ol birua i kisim Bokis Kontrak. Long dispela bokis ol i save lukim strong bilong en na bikpela lait bilong pes bilong en. 62 Em i kros long ol manmeri bilong en na i larim ol birua i kilim ol i dai. 63 Ol yangpela man i dai long bikpela pait, na ol yangpela meri i no gat man bilong maritim ol. 64 Ol birua i kilim i dai ol pris na ol meri bilong ol i no inap sori na krai long ol. 65 Orait nau Bikpela i kirap, olsem man i kirap long bet, na olsem strongpela man i dring planti wain na i singaut nabaut. 66 Na em i pait long ol birua na ranim ol i go bek. Em i winim ol tru na ol i sem nogut, na ol i no inap pait gen. 67 Tasol em i no laikim ol tumbuna pikinini bilong lain bilong Josep, na em i no makim ol lain bilong Efraim. 68 Em i makim lain bilong Juda na maunten Saion, dispela maunten em i save laikim tumas. 69 Em i wokim haus bilong en long dispela maunten, na em i mekim haus i stap strong oltaim olsem skai antap na olsem dispela graun em i bin wokim na i stap strong tru. 70 God i makim Devit, wokman bilong en, na i kisim em long wok bilong lukautim ol bikpela sipsip na ol pikinini sipsip. 71 Na God i putim em i stap king bilong Israel, na em i stap wasman bilong ol manmeri bilong God. 72 Devit i tingting long wok bilong em tasol, na em i lukautim ol gut. Na em i stap gutpela lida bilong ol.
