TITO 3

1Laya vatshavbo ava u va thangelago, va yingela mufumu ni vafumeli; va dzumele gugira satshavbo esi nya sadi. 2Va laye va si ganeli guvivba khu muthu, aholu, va khale khu gurula ni wuwadi, vari ni mavbanyelo nya yadi ga vathu vatshavbo. 3Kholu, gale ethu nethu hi diri mwalo mapimo, hi di si yingeli, hi diri sipumbu, hi diri dzikhumbi nya gunavele silo satshavbo nya guvivbe; hi diri vathu nya guvivbe ni wufu. Hi di gu vengwa khu vatshavbo, anethu hi di gu venga vathu vatshavbo. 4Aholu, olu Nungungulu, Muvbanyisi wathu, yeyedzile wuwadi ni lihaladzo laye ga vatshavbo. 5Uye a hi vbanyiside khu kota nya lihaladzo laye basi, nasiri khu kota nya mithumo yathu nya yadi. Nungungulu a hi agiside khu tshivba nya Liphuvbo nya gu Age; a hi velegide nya luphya a gu hi ninga guvbanya nya guphya. 6Nungungulu giride wuhindzi a hi ninga Liphuvbo laye nya gu Age khu ga Jesu Kristo Muvbanyisi wathu. 7Giride kharato khu gufela gu khuye khu wuhigo waye hi vbuluge ga nandru watshavbo, hi mane guvbanya nya gupindruge hi gu lindredego. 8Gihevbudzo gegi gi tiyile. Nya gu vbweta uwe u simame ni mahungu yaya, gasi vale va khodwago ga Nungungulu, va dzi garadze khu gu gira esi nya sadi. Esi silo khyadi, gambe si ngu phasa vatshavbo. 9Aholu, nyenya guganedzisana khu silo nyamba phasa gilo, khu longoloko nya malina ya vakokwe, ni gu dwanisana khu mahungu nya Nayo nya Vajudha. Silo soso satshavbo kha si phasi gilo, si mwalo lisima. 10Oyu a wusago guhambana vbakari gwanu mu kawuke gumogo ambari guvili; hwane nya ugo u nga mu theli gambe kota. 11Kholu u ngu dziti gwadi nya gukhuwe muthu nya guralo mwalo gambe rendre. Sighoho saye sa gu yeyedza gu pwani ndreyile. 12Nya gu rumela iyo gwago Artema mwendro Tikiko, gira tshivba nya gute uta manana ni eni dhoropani ga Nikopoli, kholu nyi dzi vegisede guya khala iyo nango yatshavbo nya girame. 13Phasa mulamuli Zena ni Apolo khu satshavbo esi si vbwetegago gu dongisela liendro lawe. 14Vandriyathu gu vbwetega va hevbula gu gira esi nya sadi ni gu phasa ava va hamugago, gasi guvbanya gwawe gu ninga giphaso. 15Vatshavbo nyi gu navo eno va ngu gu losedzela ngudzu. Losedzela dzipari dzathu khu gukhodwa. Wuhigo wa Nungungulu wu na khale ga enu mwatshavbo.

will be added

X\