VAROMA 9

1Khu lina la Kristo nya gu ganela lisine, kha nyi liphi. Livhalo langu, na li gu wenengedzwa khu Liphuvbo nya gu Age, li ngu tiyisa lisine nya esi nyi ganelago. 2Monyo wangu wu tade khu gu garadzega nya gukhongolo ni wuvi nyamba hegisa, khu kota nya vandriyangu nya mavelego. 3Nyi di gu dogolela gu vadwa khu Nungungulu ni gu hambaniswa ni Kristo, nari gu pwani iso sa gu dzi kodza gu va phasedzela. 4Avo sivelegwa sa Israeli. Nungungulu a va giride sanana saye, a wuya a va kategisa khu gu khala vbakari gwawe ni wudhumo waye; hungide navo gidzumeledzwano, a va ninga Nayo, ni wukhozeli; ni situmbiso. 5Khavo sivelegwa sa vakokwe nya libandla; Kristo, khu tumbunuko nya wuthu, a gu lumba lihundzu lawe, uye a guromo vbatshani nya silo satshavbo, a gu Nungungulu nya gurungudzwe kala gupindruga. Amen! 6Ambari ulo, khandri gu pwani gitumbiso gya Nungungulu gi tandregide. Kholu, khandri satshavbo sanana nya melego wa Israeli si gu libandla la Nungungulu. 7Khandri satshavbo sanana sa Abrahama si gu sanana saye nya lisine, kholu Nungungulu a di khuye ga Abrahama: "Khu Isaki a na gu ningago melego nya sanana nyi gu tumbisidego" 8sa gu yeyedza gu pwani: khandri sanana sa Nungungulu esi si velegwago khu tumbunuko nya wuthu; aholu, vale va velegwago khu tshivba nya gisambanyo gya Nungungulu, khavo basi va thudwago sanana saye nya lisine. 9Kholu Nungungulu giride gisambanyo gyaye ga Abrahama khu magana yaya: "Mwakane, khu matshigu yaya nyi na wuya, Sare a na bani ari ni gyanana" 10Silo sesi kha sa dugelela Sare ekha, si dugelede nuye Rabheka a nga velega sanana sivili nya mavbaha ni kokwe wathu Isaki. 11- 12Nasi gu hefemuli, sanana si si guti gughoha, mwendro gu gira gululama, Nungungulu a di khuye ga Rabheka: "Oyu nya koma a na thumela oyu nya nandra". Kharato, gu yeyedza gu pwane Nungungulu tumbegide, kholu a gu hatha edzi a dzinago khidzo, nyamba khedza khu mithumo nya muthu, 13kha nga yi hevbudzago Milowo nya gu Age, yi gu khiyo: "Nyi gode Jakobe guvbindra Isawu". 14Hi na khethu ginani olu? Hi na khethu Nungungulu kha gira gwadi? Ahihi, kha hi dzi kodzi gu ganela kharato. 15Kholu uye embede Mosi khuye: "Nyi na girela wuhindzi uye nyi na dzinago gu mu girela, nyi ditshedza oyu nyi na dzinago gu mu pwela" 16Nungungulu kha pimi khu gugola mwendro khu gu dzigaradza nya muthu, aholu a gu pima khu guhaladza gwaye basi. 17Omu nya Milowo nya gu Age, Nungungulu a di embela Faro, mufumeli wa Egipito khuye: "Eni nyi gu giride mufumeli gasi nyi yeyedze khavbo gwago tshivba yangu, ni gu lina langu li tidwa tigoni gwatshavbo." 18Khu kharato, Nungungulu a gu girela wuhindzi oyu a dzinago gu mu girela, a gu vivbisa monyo wa oyu a dzinago gu mu vivbisela. 19Olu mu na nyi wudzisani gu khenu: "A gu bani ari kharato, khu ginani Nungungulu a ningago nandru muthu? Khu mani, a dzi kodzago gu yeyisa guhaladza gwaye?" 20Uwe muthu, khuwe mani, uwe nya guganedzisane ni Nungungulu? Ina khali nya libumba yi ngu dzi kodza gu wudzisa ga muwumbi wayo, khigyo: "Khu ginani u nga nyi wumba kharati?" 21Kholu muwumbi a na ni fanelo nya gugire edzi a dzi golago khu libumba. A ngu dzi kodza gugira khilo sombo nya guthavisege, ni sombo nya nyalidede. 22Ha gupwa ginani ethu, Nungungulu a gu bani a dzinide gu yeyedza likhulo laye ni gu wonegisa tshivba yaye? Uye yeyedzide guhunisela nya gukhongolo ga vale va nga bani va gu yela gu mana sitsayiso nya likhulo laye, va nga bani va gu yela gu fuviswa. 23Dzinide gambe guyeyedza talo nya wufumu waye ga vale a va hathidego, kholu a hi pwede wusiwana a hi dongisela guya hengela naye wudhumoni gwaye. 24Ethu khethu vale va ranidwego khu Nungungulu nasiri basi vbakari nya Vajudha, aholu ni vbakari nya va nya mayigo gambe. 25Khiso si lovidwego libhukuni ga Oseya, pwani: "Vale va nga bani va siri vathu vangu nyi na va rana: 'Vathu vangu'.Litigo nyi nga bani nyi si li goli nyi na li rana gigodwa gyangu. 26Vbale va nga embedwa avbo gupwani:'Enu kha muri vangu',wulangani wowo va na ranwa:'Sanana sa Nungungulu a vbanyago.' " 27Isaya nuye a ngu ganela, na gu thula Israeli, khuye. "Ambari tengo nya vathu va Israeli va tala kha nga fungo wa phwani, gu na vbanyiswa basi vadugwana. 28Kholu Pfhumu a na tadzisa mafuni gwatshavbo magana yaye, nyamba hwela". 29Uye gambe Isaya a di phede khu gu ganela khuye: "Nari gu pwani Pfhumu nya tshivba yatshavbo kha nga hi tshiyela melego na hi mbembide kha nga Sodhoma ni Gomora." 30Ha gu vbweta gu khethu ginani khu satshavbo sesi? Ha gu vbweta gu khethu vale va si gu Vajudha, va nga bani va si landreli Nungungulu, va wonidwe na va lulamide mahoni gwa Nungungulu khu kota nya gukhodwe. 31Gasi Vajudha, va nga bani va gu landrisa Nayo, wu nga vbweta gu va gira vathu nya gululame mbeli gwa Nungungulu, va tandregide. 32Khu ginani? Kholu kha va vbweta gululama khu ndzila nya gukhodwe, aholu va di vbweta gu gu mana khu gu landrisa mithumo yawe. Kharati, va tshunganede va gu thega vbagiwindritunu nya gikhunguvanyiso, 33gi nga thudwa khu Milowo nya gu Age pwani: "Nyi ngu vega Siyoni giwindri gi tshunganisago gi thesa.Aholu, wule a khodwago ga egi giwindri gima kha na nga thedwa dzitshoni".

will be added

X\