VAROMA 6

1Hi na khethu ginani olu? Hi na simama guvbanya gighohoni gasi wu engedzelana wuhigo wa Nungungulu gani? 2Khandridzo, gima kha hi na gira kharato! Muthu nya gighoho ndrani gwathu fude, hi na dzi kodza gambe kharini gu simama hi vbanyela mu gighononi? 3Ina kha mu dzitini nya gukhenu ethu hatshavbo hi bhapatisidwego, hi gu tshanganiswa ni Jesu Kristo, hi patidwe gambe naye gufani gwaye, gani? 4Khu gu bhapatiswa hi dzingidwe gumogo ni Kristo, hi gu hengela naye gufani gwaye. Gasi hi dzi kodza nethu gu vbanya khu mavbanyelo nya maphya nya nga ya Kristo a wugidego khu ga vafudego khu tshivba ya Nungungulu Babe. 5Kholu, nya nga olu hi tshanganisidwego ni Kristo khu gufa nya nga ogu gwaye, kharati gambe hi na hengela naye guwuga khu ga vafudego. 6Hi ngu dziti gwadi gu khethu muthu wathu wa gale fude gumogo ni Kristo vbagihambanotunu, gasi gu pfhungumudwa guvivba gwatshavbo hi nga bani hiri nago, hifela gu tshulega wugumbini nya gighoho. 7Kholu muthu a fudego tshulegide wugumbini nya gighoho. 8Ha gu bani hi fude gumogo ni Kristo, hi ngu khodwa gu khethu hi na vbanya gambe naye. 9Hi ngu dziti nya gukhethu Kristo a wugidego khu ga vafudego, gima kha na ngafa gambe. Gufa gumwalo gambe tshivba avbo gwaye. 10Na fude, Kristo fude gumogo basi a gu pala gighoho gasi khu guvbanya a gu nago olu, a gu vbanyela Nungungulu. 11Kharato nenu, dzi gireni kha nga vathu va fudego va gu hambana ni gighoho, aholu, va vbanyago gumogo ni Kristo, va gu vbanyela Nungungulu. 12Mu nga dzumedzisi gambe gighoho gi fuma givilini gwanu nya gufe gi mi kutsedzela gu landrisa gudogorela gwaye. 13Mu nga ningelini ga gighoho sivbango nya givili gyanu mu si girani silo nya guthumele guvivba. Aholu, dzi ningeleni ga Nungungulu nga vathu va tshatugidego gufa va gu mana guvbanya. Dzi ningedzeleni wurumba wanu gu thumela Nungungulu, mu dzi gira sivbango nya guthumele silo nya gululame. 14Kha gu vbwetegi gighoho gi fume gambe gwanu, kholu enu kha mu vbanyi gambe vbavbatshi nya Nayo, aholu mwa gu vbanya wuhigoni gwa Nungungulu. 15Hi na khethu ginani olu? Hi na dzi ningedzela gighohoni khu gu khethu kha hi ngu gu rumwa gambe khu Nayo, ha gu rumwa khu wuhigo wa Nungungulu, gani? Khandridzo, gima kha hi na gira kharato. 16Ina kha mu dzitini gu khenu mwa gu dzi gira dzikhumbi dza muthu, guvbwetega mu landrisela milayo ya wule mu mu thumelago gani? Khidzo gambe kharato: mwa gu dzi ningela ga gighoho, mu na mana gufa; gasi mwa gu dzi ningela ga Nungungulu mu na mana guvbanya nya wuhengeli naye. 17Aholu, a na bongwe Nungungulu! Kholu enu gale mu nga bani muri dzikhumbi nya gighoho, olu mu ngu landrisa khu myonyo yanu yatshavbo ndzila nya sihevbudzo mu hakhidego. 18Mu tshudwe wugumbini nya gighoho, gasi mu khale sithumi nya ndzila nya gululame ya Nungungulu. 19Nya gu ganela kharati khu maganelelo nya wuthu khu gu dziti gu kheni si ngu mi garadzela gu si pima silo sesi. Gale mu di dzi ningela gu khala dzikhumbi nya wubhayi ni guvivba gwatshavbo mufela guthuma mithumo nya guvivbe. Olu dzi ningeleni gambe khu monyo watshavbo gu thumela Nungungulu, mufela gu agiswa. 20Na mu ngari wugumbini nya gighoho, mu diri mwalo giguruvedzo nya guthumele guhaladza gwa Nungungulu. 21Aholu, giphaso muni mu gi manidego khu gu thumani silo, muhuno si mi thelago dzitshoni? Mahegiso nya mithumo yoyo khu gufa. 22Gasi olu, na mu tshulegide wugumbini nya gighoho, mwa gu thumela Nungungulu. Giphaso mu gi manago khu gu agiswa, mu wonwa na mu lulamide mbeli gwa Nungungulu, mu hegisa khu gu hakha guvbanya nya gupindruge. 23Handro nya gighoho khu gufa, aholu, giningwa hi gi manago ga Nungungulu khu guvbanya nya gupindruge, gumogo ni Jesu Kristo, Pfhumu yathu.


Copyright
Learn More

will be added

X\