VAROMA 3

1Gasi khu gevbini giphaso nya gukhale Mujudha? Khu gevbini giphaso nya guhane wugwera? 2Gyomo giphaso ngudzu khu silo nya singi. Gilo nya guphele, Nungungulu tshiyedzide Vajudha magana yaye. 3Aholu, nandru muni wu guromo va gu bani vambe na va bombide gukhodwa? Ina gu mba khodwa gwawe gu yeyedza gu pwani Nungungulu nuye kha tumbega gani? 4Khandridzo. Kholu Nungungulu tumbegide gikhati gyatshavbo ambari ulo vathu va si tumbegigo. Kha nga yi ganelago Milowo khiyo: "Gasi u manwa nu lulamide mu guregerani gwago,ufela gu dugelela litshigu nya gulamudwe gwago" 5Aholu, guvivba gwathu gwa gu bani gu thumela guyeyedza gutumbega gwa Nungungulu, hi na gu khethu ginani gambe? Hi na khethu Nungungulu kha lulama kholu a hi tsayisago? (Nya gu ganela kha nga edzi va ganelago khidzo vathu). 6Khandridzo.Kholu nari gu pwani Nungungulu kha lulama, a di vbweta gu dzi kodza kharini gu lamula litigo? 7Aholu, guvivba gwangu gwa gu bani gu thumela gu wonegisa lisine la Nungungulu ni wudhumo waye, khu ginani nyi ningwago nandru nya wughohi? 8Khu ginani hi si ganeligo khethu: "Hongoleni hi gira guvivba gasi guta nya sadi." Vomo va nyi singedzago khavo khiso nyi hevbudzago. Vathuvo va na tsayiswa khu edzi gu vbwategago khidzo. 9Hi na khethu ginani olu? Ina ethu Vajudha hi vathu nya wutshukwana guvbindra vambe, gani? Ahihi. Kha nga nyi ngari gu mi yeyedzago, Vajudha ni ava va si gu Vajudha, vatshavbo va fumedwe khu gighoho. 10Kha nga Milowo nya gu Age yi ganelago khiyo: "Mwalo muthu a lulamidego.Mwalo ni moyo basi. 11Mwalo muthu a gu ni mapimo nya yadi.Mwalo a vbwetago Nungungulu. 12Vatshavbo va digide ndzila nya lisine,vatshavbo va dzimede.Mwalo a girago nya sadi.Mwalo ni moyo basi. 13Va gu lipha, va pfhadza nyamba hegisa.Lidimi lawe va gu li thumisa gupemba vathu.Magana yawe ma gu gamba wuhungu nya dzinyoga. 14Maganani gwawe gu tade khu wulala ni guvala. 15Migondro yawe ya gu tutumela gu ya vbaladza novba. 16Umo va vbindrago khumo va gu sazela,va tshiya marumbi ni gililo. 17Kha va dziti dzindzila dzi vbahago gurula, 18va mwalo githawo ni Nungungulu." 19Ethu hi ngu dziti nya gukhethu satshavbo esi si rumwago libhukuni nya Nayo sa gu lumba basi avo va fumedwago khu nayo yoyo, gasi gu degudza magana yatshavbo ma si mani gu dzi vhikela, ni gu litigo latshavbo li dzipwe liri ni nandru mbeli gwa Nungungulu. 20Muthu kha manegi na lulamide mbeli gwa Nungungulu khu kota nya gulandrise mithumo yi rumwago khu Nayo; kholu Nayo wa gu tulela muthu gu dziti gu khuye gighohi. 21Gasi olu, Nungungulu a hi yeyedzide magirelo a hi tshanganisago khayo naye nyamba thumisa Nayo, kha nga li fakazago libhuku nya Nayo ni eli la Vaprofeti. 22Nungungulu khuye a hi tshanganisago naye khu gukhodwa ga Jesu Kristo. A gu tshanganisa naye muthu watshavbo a khodwago, nyamba hathela. 23Vathu vatshavbo va ghohide, va manega hwindzo ni Nungungulu. 24Aholu, Nungungulu khu wuhindzi waye, a dzinide gu wusedzela navo wupari khu tshivba ya Jesu Kristo, a va tshudego wugumbini nya gighoho. 25Nungungulu giride gu khuye khu gufa gwa Kristo, vathu vatshavbo va khodwago gwaye va mane gu tsetseledwa sighoho sawe. A gu yeyedza kharati wuwadi waye, kha nga matshigu ya gale a nga hunisela, a si tsayisi vathu khu kota nya sighoho sawe. 26Muhuno, Nungungulu gasi gu yeyedza gu khuye lulamide, ningede Kristo. Khu guralo Nungungulu lulamide a ngu hakha vale va khodwago ga Jesu. 27Khu kharato, khu gevbini gilo nya gu dzi gugumugise khigyo muthu? Gimwalo ni gimwegyo. Khu ginani gi gu mwalo? Khu kota nya mithumo nya Nayo gani? Ahihi! Khu kota nya gukhodwe basi. 28Ethu hi ngu tivisa gu khethu hi tshanganisidwe ni Nungungulu khu gukhodwa, nasiri khu mithumo nya Nayo. 29Gasi uye Nungungulu nya Vajudha basi, gani? Khandri Nungungulu wa va nya mayigo gambe, gani? Khu lisine khuye gambe Nungungulu wa va nya mayigo, 30kholu womo Nungungulu moyo basi, a na tshanganisago naye va nya gu hana wugwera khu gukhodwa, a tshanganisa gambe va nya mayigo khu gukhodwa. 31Khavbo avbo, ina sa gu wonega gupwani hi ngu tshipisa Nayo khu gukhodwa, gani? Ahihi. Aholu ha gu tiyisa Nayo.


Copyright
Learn More

will be added

X\