VAROMA 16

1Nyi ngu mi bikelani ndriyangu Febe a thumelago Libandla la Kenikreya. 2Mu hakheni gwadi khu lina la Pfhumu, nga edzi gu vbwetegago khidzo vbakari nya vakhodwa, mu phasedzeleni ga satshavbo a na si vbwetago, kholu uye nuye phasedzede nya vangi, ambari eni neni a nyi phasedzede. 3Vbohisani malosedzela yangu ga Prisila ni Akila, a gu avo nyi hengelago navo ndzilani momu nya guthumele Jesu Kristo. 4Avo va di dzi ningela ni womi wawe khu gufela gu nyi vbanyisa. Khavbo avbo, nyi na va bonga ngudzu. Nasiri eni basi, aholu ni mabandla yatshavbo nya vakhodwa va nya mayigo va ngu va bonga. 5Malosedzela yangu nya gu ma rumela gambe ga vakhodwa vatshavbo va tshanganago ndrangani gwawe. Losedzelani pari yangu Epaneto, a gu uye muthu nya guphele gu khodwa ga Kristo tigoni ga Asiya. 6Losedzelani Mariya a thumidego ngudzu vbakari gwanu. 7Losedzelani gambe Androniko ni Juniya sivelegwa sa tigo-mwedo ni eni, gambe hi nga hengela lipaso. Khavo va nga phela khavo gu tidwa vbakari ga vapostoli, va nyi hegudza gukhodwa ga Kristo. 8Losedzelani Ampliyato, pari yangu nya gigodwa khu ga Pfhumu. 9Mu losedzela Urbano nyi hengelago naye ndzilani momu nya guthumele Kristo; ni pari yangu Estakiyo. 10Losedzelani Apele, mwamwa nya gukhathalele ngudzu Kristo, gumogo ni ngamo yatshavbo ya Aristobulo. 11Malosedzela yangu nya gu ma rumela gambe ga Herodhiyani wa gaya ni ga ngamo ya Narsizo va khodwago ga Pfhumu. 12Losedzelani Trifena ni Trifosa va dzi garadzago khu gu thumela Pfhumu, ni Persidha, pari yangu nya gu yi gole, a thumedego nuye ngudzu Pfhumu. 13Losedzelani Rufo a dzi ningedzelago thumoni wa Pfhumu, ni mayi waye, oyu eni neni nyi mu wonago kha nga mayi wangu nya lisine. 14Nyi ngu rumela gambe malozedzela ga Asinkrito, ni Flegonte, ni Herme, ni Patroba, ni Hema ni vandruye vatshavbo va vbanyago navo. 15Losedzelani gambe Filologo ni Juliya, Nerewo ni ndriyaye nya nyamayi, ni Olimpiya, ni vakhodwa vatshavbo va vbanyago vbakari gwanu. 16Vatshavbo va loseni khu beju nya wundruye. Mabandla yatshavbo ya Kristo ma ngu mi losedzela. 17Nyi ngu mi tivisani, vandruye, gu kheni dzi woneleni ga vale va wusago guhambana ni gu yala gukanakana sihevbuloni mu hakhidego. Gimbilelani hwindzo navo, 18kholu vathu nya nga avovo kha va thumeli Kristo Pfhumu yathu, aholu va gu thumela sirumbu sawe. Va gu pfhadza vathu nya vangi khu magana yawe nya gulombele na ma tade khu wuhephi. 19Mahungu nya gutumbege gwanu ga Kristo ma pwade malangani gwatshavbo, ma nyi tsakisa ngudzu. Aholu nya gu vbweta gu kheni mu gengela gasi mu kodze gu landra esi nya sadi; mu rula gasi mu kodze gu dzi vhikela ga esi nya guvivbe. 20Nungungulu nya gurule a na pala Sathane a mu vega nyamba hwela vbavbatshi nya migondro yanu. Pfhumu yathu Jesu Kristo a na mi kategise. 21Thimoti, mubangaladzi wangu thumoni momu, gumogo ni Lisiyo ni Jasani ni Sosipatro va ngu mi losedzelani. 22Eni Tersiyo nyi lovago lidangalila leli, nyi ngu mi losedzela neni, khu ga Kristo. 23A ngu mi losedzela nuye Gayo, a nyi hakhidego ni gu hakha libandla latshavbo ndrangani gwaye. [ 24Hakhani gambe malosedzela ya Erasto, a gu uye muphari nya kwama nya lidhoropa, ni malosedzela ya ndriyathu Kwarto. (Wuhigo wa Pfhumu yathu Jesu Kristo wu na khale ga enu mwatshavbo. Amen.)] 25A na rungudzwe Nungungulu! Khuye a dzi kodzago gu mi tiyisela gukhodwani, kha nga edzi yi hevbudzago khidzo Ivhangeli nyi mi tivisidego, ni mahungu ya Jesu Kristo, khu esi hi nga tuledwa gu siti khu mahungu nya guvbanyise ga Nungungulu. Sihalo wu nga bani wu sihade gukhugela myaga yatshavbo, 26olu wu wonegisidwe khu mabhuku ya vaprofeti khu guruma ga Nungungulu nya gupindruge. Mayigo yatshavbo ma tuledwe gu wuti gasi ma hake gukhodwa. 27Wudhumo wu na vegwe gwa Nungungulu nya tshivba yatshavbo, Nungungulu wa moyo nya guti, khu ga Kristo, kala gupindruga. Amen.

will be added

X\