VAROMA 15

1Ethu hi tiyidego gukhodwani, guvbweta hi timisela, hi phasedzela vale va sa tiyago, gurwala sigaradzo sawe. Hi nga dwaneli gu gira esi si hi tsakisago. 2Muthu ni muthu guvbwetega a tsakisa kwawe khu silo nya sadi gasi a mu tiyisela gukhodwani. 3Kholu Kristo nuye kha vbweta esi nya gu mu nengedzise, aholu si tadzisegide gwaye esi si nga ganedwa omu nya Milowo nya gu Age pwani: "Givalo gya vale va gu valago gi thegede vbatshani gwangu." 4Satshavbo si guromo omu nya Milowo nya gu Age si lovedwe gu khala gihebudzo gwathu, gasi hi mane gutumba khu kota nya gutimisele hi gu manago umo nya Milowo nya gu Age. 5Uye Nungungulu a gu gifefe nya gutimisele ni gutiya gwatshavbo a na mi ningeni gupwanana moyo ni moyo mu fanana ni Jesu Kristo. 6Gasi mwatshavbo gumogo, khu lito limwedo mu rungudza Nungungulu Babe wa Pfhumu yathu Jesu Kristo. 7Khavbo avbo, hakhanani khu gyanu kha nga Kristo a mi hakhidego, gasi a dhumiswe Nungungulu. 8Eni nyi ngu ganela kheni, Kristo dzude guta thumela Vajudha gasi gu yeyedza gutumbega gwa Nungungulu ni gutadzisega nya sisambanyo a nga girago ga vakokwe. 9Dzude gambe gasi va nya mayigo va kodze navo gu rungudza Nungungulu khu kota nya wuhindzi waye, kha nga gu lovidwego umo nya Milowo nya gu Age pwani: "Khu kharato, nyi na gu rungudza vbakari nya mambe mahundzu,Nungungulu wangu, nyi na embelela wudhumo wago." Gu lowidwe gambe pwani: 10"Ma na nengele mambe mayigo gumogo ni vathu va Nungungulu." 11Wumbe wulanga gu lovidwe gambe pwani: "Ma na rungudze Pfhumu mayigo yatshavbo ni vathu vatshavbo va na pwadze gidhumo gyaye." 12A nuye muprofeti Isaya a ngu ganela khuye: "Gi nata gitugulwana gya Jese gi na ema gi fuma mayigo va nya mayigo va na tumba igyo." 13Uye Nungungulu a gu gibuga nya gitumbo a na mi ninge gunengela, ni gurula khu gukhodwa, gasi gitumbo gyanu gi engedzelana gu dandra khu tshivba nya Liphuvbo nya gu Age. 14Vandriyangu, nyi ngu tumba ni gu tiya gu kheni mu tade khu wuhindzi ni wusingalagadzi nya gululekane khu gyanu. 15Ambari ulo nyi tiyide gu mi lovela mahungu yaya gasi mu khale na mu gu ma pima. Nya gu gira esi khu kota nya thumo nyi pharisidwego khu Nungungulu, 16nya guthumele Jesu Kristo ga va nya mayigo. Kha nga muphasi nya mhamba, thumo wangu khu gu tivisa Mahungu nya Yadi ya Nungungulu gasi va nya mayigo va ningedwe ga Pfhumu kha nga mhamba nya gutsakise uye, yi agisidwego khu Liphuvbo nya gu Age. 17Kha nga muthu a khodwago ga Jesu Kristo, nyi ngu dzipwa nyiri ni wuzundzo ndrani nya thumo yoyu wa Nungungulu. 18Eni kha nyi tiyeli gu ganela khu simbe silo vbavbandze nya esi Kristo a thumidego khu mandza yangu gasi gu wuyisa va nya mayigo vata khodwa ga Nungungulu, khu magana ni mithumo, 19khu siliwugiso ni sisamadziso, ni tshivba nya Liphuvbo la Nungungulu, kha nga nyitago na nyi gu tivisa Mahungu nya Yadi ya Kristo, gukhugela Jerusalema, ni malangani yatshavbo kala gipandre gya Iliriya. 20Aholu nyi di gola basi gutivisa Ivhangeli malangani yale Kristo a nga bani a si gu tidwi, gasi nyi si vbahi vbatshani nya girendro ga vambe vathu. 21Nyi di landrisa Milowo nya gu Age yi gu khiyo: "Vale va nga mba embedwa mahungu yaye va na wona; ni vale va nga bani va si gupwi gilo, va na ma pima." 22Dzinyondro dzingi nyi nga thindregiswa guta mi holelani. 23Gasi olu nyi vbedzidego thumo wangu eno, nyi ngu tumba gu kheni nyi nata nyita manana nanu, kha nga a gu gale na nyi gu gola guta mi wona kharato. 24Nyi nata mi holela gikhati nyi vbindrago nyi gu hongola tigoni ga Espanya. Mu nata nyi vbwelegedzani iyo, hwane nya gu na hi kodwe khu gu wonana. 25Olu nya guhongola Jerusalema guya thumela vakhodwa va Kristo va guromo iyo. 26Kholu vakhodwa va Makedhoniya ni Akaya va di pwanana va gu gira mihengo gasi guya phasedzela vandruye nya sisiwana nya Libandla la Nungungulu li guromo Jerusalema. 27Va di wona nari gwadi gu gira kharato, gambe adiri fanelo yawe. Kha nga ulo va nya mayigo va hakhidego makategwa nya liphuvbo a gu ya Vajudha, avo navo va na ni fanelo nya gu va phasedzele khu siningwa sawe nya mafu. 28Gikhati nyi na vbedzago gu gimbidzisa thumo yoyu, na nyi ningede mihengo yatshavbo, nyi na phara liendro nya guhongole Espanya, nyi na vbindra khiyo gwanu nyi mi holela. 29Nyi ngu tumba gu kheni gikhati nyi natago iyo gwanu, nyi nata na nyi tade khu makategwa ya Kristo. 30Vandriyangu, nyi ngu mi lombani khu Pfhumu yathu Jesu Kristo ni lihaladzo hi ningwago khu Liphuvbo nya gu Age, gu kheni mu hengela ni eni, mu nyi lombelela ga Nungungulu khu monyo watshavbo. 31Lombani ga Nungungulu a nyi vbulugise ga vale va si khodwigo ga Kristo tigoni ga Judheya ni gu giphasedzelo gegi nyi yisago ga vakhodwa va Jesu Kristo ma guromo Jerusalema, giya hakhwa gwadi khu gunengela. 32Kharato nyi na dzi kodza guta mi holela na nyi tsakide ngudzu, nyita hefemula vbadugwana vbakari gwanu. 33Nungungulu nya gurule a na khale ni enu mwatshavbo. Amen.

will be added

X\