VAROMA 14

1Wule a sa tiyago gukhodwani gwaye, mu hakheni gwadi, mu nga ganedzisani naye khu kota nya mawonelo yaye. 2Vomo va alakanyago gu khavo va ngu dzi kodza gu hodza silo satshavbo, gasi vambe va sa tiyago gukhodwani gwawe, va gu hodza tongwe basi. 3Oyu a hodzago satshavbo a nga nyenyi wule a digago gu hodza simbe silo. Wule a si hodzigo simbe silo a nga hembululi oyu a hodzago satshavbo, kholu uye nuye a ngu godwa khu Nungungulu. 4Khuwe mani uwe u tiyelago gu lamula githumi gya mumbe muthu? Mune wa igyo khuye a lamulago, gani gi ngu pala gani gi ngu padwa, isoso si na ni mune waye. Aholu a na pala kholu Pfhumu anani tshivba nya gu mu ninge gupala. 5Vomo gambe vathu va pimisago gu khavo mambe matshigu makhongolo guvbindra mambe, ni vambe va gu khavo matshigu yatshavbo khidzo saye. Muthu ni muthu guvbwetega a vbanya khu edzi a khodwago khidzo. 6Oyu a gu khuye matshigu nya gukari makhongolo, a gu girela gu rungudza Pfhumu. Oyu a hodzago satshavbo a ngu rungudza Pfhumu, kholu a ngu bonga Nungungulu. Oyu a si hodzigo nuye a gu girela gu rungudza Pfhumu, a ngu mu bonga nuye. 7Mwalo muthu a dzi vbanyelago uye mune, kha nga gambe mwalo muthu adzi felago uye mune. 8Ha gu vbanya ha gu vbanyela Pfhumu, ha gufa gambe ha gufela Pfhumu. Kholu gani hi ngu vbanya gani hi ngufa, ha gu lumba Pfhumu. 9Khu lisine, Kristo fude, a wuga, a vbanya gasi gu khala Pfhumu nya va nya gufa ni va nya guvbanya. 10A gu bani ari kharato, khu ginani uwe u lamulago ndriyago, mwendro khu ginani u mu nyenyago? Ethu hatshavbo hi na ema mbeli gwa Nungungulu gasi hi lamudwa khuye. 11Pfhumu a ngu ganela omu nya Milowo nya gu Age khuye: "Nyi ngu tiyisa gwanu kheni vathu vatshavbo va na khidzima mbeli gwangu.Vatshavbo va na fakaza vathuni khavo kheni Nungungulu." 12Khu kharato, muthu ni muthu a naya dzi ganelela abune gwa Nungungulu. 13Hongoleni hi diga gulembana. Hi na dzi garadze khu gu mba gira ni gimwegyo gilo gi dzi kodzago gu tshunganedzisa vakhwathu va thega gighohoni. 14Nyi ngu dziti ni gukhodwa gwadi khu ga Pfhumu Jesu gu kheni, gimwalo gilo gi nyenyezidego khu tumbunuko nya igyo. Aholu muthu a gu pimisa gu khuye gilo nya gukari gi nyenyezile, a na gi wona mapimoni gwaye na gi nyenyezile furi. 15Uwe wa gu khunguvanyisa ndriyago khu kota nya esi u hodzago, khu yeyedzi lihaladzo. Khu kota nya guhodze gwago u nga dzi giri givangelo nya gudzimedze muthu a fedwego khu Kristo. 16Egi gi gu gyadi ga enu, gi nga khali gikhunguvanyiso ga vambe. 17Kholu mufumu wa Nungungulu khandri mahungu nya guhodze ni gusela, aholu, mahungu nya gululame, nya gurule ni gunengela gutago khu Liphuvbo nya gu Age. 18Muthu a thumelago Kristo khu magirelo nya nga ayoyo, a ngu tsakisa Nungungulu, a wuya a zundzwa khu vathu. 19Khu kharato, hongoleni hi dzi garadze khu gu vbweta silo sile si hi reselago gurula ni gu tiyiselana gukhodwani. 20U nga ghoheteli thumo wa Nungungulu khu kota nya guhodze. Hi ngu dzi kodza gu hodza silo satshavbo, aholu guvivba khu gu hodza gilo gi dzi kodzago gu tshunganedzisa muthu kwanu a thega gighohoni. 21Gwadi gumba hodza nyama, ni gumba sela wadwa, ni gumba gira gilo wa gu dziti gu khuwe gi na tshunganedzisa ndriyago a thega gighohoni. 22Esi u khodwago monyoni gwago, si na tidwe basi khuwe mune ni Nungungulu.Kategide wule a na gumba dzi mbembisa abune khu kota nya esi a si hathago. 23Aholu, muthu a kanakanago khu esi a hodzago khu gumba dziti gu khuye si ngu tsakisa mwendro kha si tsakisi Nungungulu, a gu hodza a na ni nandru; kholu kha landrisi esi a khodwago ga iso. Satshavbo esi a girago muthu na si gu hambana ni gukhodwa gwaye, gighoho.

will be added

X\