VAROMA 13

1Muthu ni muthu guvbwetega a yingela vathangeli va vegidwego khu nayo, kholu wufumu watshavbo wa guta khu ga Nungungulu. 2Oyu a yeyisago vathangeli a ngu yeyisa nayo wu vegidwego khu Nungungulu: Gasi ava va yeyisago nayo wa Nungungulu va na mana tsayiso yawe. 3Vathangeli kha va theli hwanga vale va vbanyago khu gululama, aholu vale va girago guvivba. Ina khu dzini gu thava vathangeli, gani? Vbanya khu gululama, va na gu tsakela. 4Kholu fanelo yatshavbo nya guthangele vathu ya guta khu ga Nungungulu gasi guthumela uwe. Aholu wa gu gira guvivba u na ni fanelo nya guthave kholu vathangeli va na ni tshivba nya gutsayise. Muthangeli kha phari ndronga mahala. Wuthangeli wa gu thumela Nungungulu khu gu tsayisa vale va girago guvivba. 5Guvbwetega gu yingela vathangeli, nasiri basi khu kota nya hwanga nya gutsayiswe khu Nungungulu, aholu khu kota nya gulandrise edzi ma lombago khidzo mapimo yathu. 6Khigyo gambe givangelo gi mi girago mu livba mikhupho, kholu vathangeli va vegidwe kha nga sithumi sa Nungungulu gasi gu lulamisa thumo yoyo. 7Khavbo avbo, livbani muthu ni muthu esi a gu fanelo. Livbani mikhupho ni sipeto ni mihengo ga vale mu gu ni fanelo nya gu va livbe; ningani githawo vale va gu ni fanelo nya guningwe githawo, mu gu rungudza wule a fanelago gu rungudzwa. 8Mu nga khali ni mangava ga muthu. Mangava yanu ma na khale basi lihaladzo nya wundruye. Kholu oyu a haladzago muthu kwawe a ngu tadzisa nayo. 9Sileletelo nya nayo sari khiso: "U nga bhayi, u nga songi, u ngabi, u nga dogoleli sa vane". Satshavbo sesi ni simbe gambe sa gu patwa sa gu khala nayo moyo basi wu gu khuwo: "Haladza muthu kwanu kha nga uwe mune." 10Lihaladzo kha li gireli guvivba muthu kwanu. Khavbo avbo, lihaladzo gutadzisege nya nayo. 11Hongoleni hi gire kharato ngudzungudzu olu hi gitigo, gikhati muni egi hi vbanyago ga igyo. Hi ngu dziti gu khethu khigyo egi gikhati nya gukhendzuge khu ligovbeni. Olu guvbanyiswa gwathu gomo vbafuvbi ngudzu guvbindra gikhati hi nga hakhago khigyo gukhodwa. 12Wutshigu wu dandride, gugya gu vbohide. Hongoleni hi dige mithumo nya gidema, hi phara matshari hi dwana guwonegelani. 13Hongoleni hi vbanye khu gululama nga vathu va vbanyago safani nya mihani; hi nga vbanyeni khu wukhondrobwa ni guleva; hi nga vbanyi wuphuphuluni ni mithumo nyamba yadi; hi nga vbanyeni khu gu dwanelana ni lidiwo. 14Aholu ambalani Pfhumu Jesu Kristo, mu nga dzi digi mu gu sengwa khu gudogolela nya tumbunuko nya wuthu.

will be added

X\