VAROMA 12

1Nyi ngu mi lomba khu wuhindzi wa Nungungulu, gu kheni mu dzi ningele wutumbu wanu mu khale mhamba nya guvbanye, nya gukatege, nya gunengedzise Nungungulu. Eyi khiyo mhamba nya lisine nya maningano, yi yelago gu phasedwa Nungungulu. 2Mu nga landriselini mikhuwo nya mavbanyelo nya litigo leli, aholu vbindrugedzani mapimo yanu ni mavbanyelo yanu yatshavbo, gasi mu kodze gupima gugola gwa Nungungulu; ni gu pima esi nya sadi, nya gutsakise, si vbeledego mahoni gwa Nungungulu. 3Khu kota nya thumo Nungungulu a nyi ranedego uwo vbakari gwanu, nyi ngu laya moyo ni moyo wanu gu kheni mu nga dzi valeli guvbindra fanelo. Aholu dzi sodziseni, muthu ni muthu a dzi vega vbawulangatunu gwaye gu khedza khu wuhigo a ningidwego khu Nungungulu. 4Kha nga olu hi gu ni sivbango nya singi givilini gimwegyo, gambe givbango ni givbango gi gu na ni thumo waye, 5Kharato nethu, hi vangi, aholu ha gu khala givili gimwegyo basi ga Kristo, gambe moyo ni moyo givbango gya kwawe. 6Muthu ni muthu a na ni giningwa gyaye, khavbo nya wuhigo a ningidwego khu Nungungulu. Oyu a ningidwego gu tivisa mahungu ya Nungungulu a na thume maningano ni gukhodwa gwaye. 7Oyu a gu ni giningwa nya gu thumela vakwawe, a na va thumele; oyu a ningidwego guhevbudza, a na hevbudze; 8oyu a ningidwego wusingalagadzi, a na laye; oyu a ningidwego gukabanisela silo a na kabanisele khu wuhindzi; oyu a rumago a na rume khu mapimo; ni oyu a ningidwego sisiwana, a na thume na tsakide. 9Lihaladzo lanu li na khale lihaladzo nya lisine, nyamba pembedzela. Nyenyani guvivba mu gira nya sadi. 10Golanani khu lihaladzo nya wundruye, mu palisana khu gu ningana githawo. 11Thumani ngudzu, mu nga khalini vathu nya wugara. Dzi garadzeni khu gu thumela Pfhumu khu monyo watshavbo. 12Nengelani gutumbani, mu timisela sigaradzoni, mu pharisa milombeloni. 13Kabanani esi mu gu naso ni vandruye vale va gu mwalo gilo; hakhani gwadi vaendri. 14Lombelelani ga Nungungulu khu vale va mi tshanisago, va kategiseni, mu nga va vali. 15Nengelani ni vale va nengelago, mu gu lila ni vale va lilago. 16Vbanyani khu monyo moyo, muthu ni muthu a nga dwaneli gu dzi khusedza afela guzundzwa, aholu dzumelani mithumo nya gusolege. Mu nga dzi giri matshandza khu guti. 17Mu nga bweledzelini guvivba khu guvivba, aholu dzi garadzeni khu gu girela gwadi vathu vatshavbo. 18Sa gu kodzega, zamani guvbanya khu gurula ni vathu vatshavbo. 19Vandruye, mu nga dzi phodzelini mwabune, digani Nungungulu a tsayise, kholu Pfhumu a ngu ganela omu nya Milowo nya gu Age khuye: "Eni kheni nyi gu ni fanelo nya gutsayise; kheni nyi na tshatshazelago." 20A engedza gambe khuye: "Nala wago a gupwa ndzala mu ninge guhodza, a gupwa lidora mu ninge mati a sele. Wa gu gira kharato u na wungedzela magala nya nilo hungoni gwaye." 21U nga dzi digi u padwa khu guvivba, aholu, uwe pala guvivba khu wuwadi.

will be added

X\