VAROMA 11

1Eni nyi na engedza gambe gu wudzisa: Ina Nungungulu a di tsukula vathu vaye, gani? Ahihi. Eni nyi ganelago, nyi wana Israeli, nyi gitugulwana gya Abrahama, gya nyumbani ga Bhenjami. 2Nungungulu kha tsukula vathu vaye a va hathidego gukhugela tshiguneneni. Ina kha mu si pimi esi si ganedwego khu Milowo nya gu Age gikhati Eliya a nga ya dilela ga Nungungulu khu mahungu ya Israeli, gani? 3A di khuye: "Pfhumu, va songide vaprofeti vago, va pfhungumude siluvelo sago. Nyi tshade eni nyenga, gambe va ngu vbweta gu nyi songa." 4Aholu Nungungulu a di mu hakha khuye ginani? A di khuye: "Nyi vegiside livbandre na mavili magumi mazana (7.000) nya vathu va nga mba khidzima va khozela Bhahali, nungungulu nya malipha." 5Khidzo gambe kharato ni matshiguni ya muhuno, womo tengo wudugwana nya vale Nungungulu a va hathidego khu wuhindzi waye. 6Ava hathide khu wuhindzi waye nasiri khu kota nya mithumo yawe. Nari gu khasi adiri khu kota nya mithumo, wuhindzi wa Nungungulu wu disiri wuhindzi wa gilo. 7Hi na khethu ginani olu? Hi na khethu va na Israeli va tandregide gu mana esi va nga si vbweta; aholu si manidwe khu tsawa nya vale va nga hathwa khu Nungungulu. Vatshavbo vambe kha va dzina gupwa gurana ga Nungungulu, 8kha nga gu lovidwego umo nya Milowo nya gu Age pwani: "Nungungulu a di va gira va si theli kota;a va ninga maho nyamba wona,ni dzindzeve nyamba pwa,kala matshigu ya muhuno." 9Dhavide nuye a di ganela khuye: "Mibuzo yawe yi na khale milaphwi, yi va kanganyisa,gasi va tshunganele va thega, va mane tsayiso. 10Maho yawe ma na khale gidema gasi va si woni,hwambo wawe wu na gohala kala gupindruga,khu gu lemedwa khu sigaradzo sawe." 11Nyi na wudzisa gambe: Ina gikhati Vajudha va nga tshunganelago va di thegela guhegisa, gani? Khandridzo; Khu guthega gwawe va manide guvbanyiswa va nya mayigo, gasi va na Israeli va khale wufu. 12Olu gighoho nya Vajudha gi khadego giphaso ga va nya mayigo, ni gumbemba gwawe gu khadego thomba ga mambe mahundzu, guwani va gu kala Vajudha va gu vbindrugedza mavbanyelo? Makategwa ya Nungungulu ma na tala guvbindrisa. 13Olu nya gu ganela gwanu enu mu si gu Vajudha. Eni nyi mupostoli ga va nya mayigo, gambe nyi ngu dzipwa matshandza khu kota nya thumo wangu. 14Khu kharato, a gu dzina saye, vambe ni vambe nya lifumbo langu, va na mi dogolela, va ta vbanyiswa. 15Olu khu gu fularedwa gwawe, litigo li manidego wuhigo nya gutshanganiswe ni Nungungulu, guwani esi si na dugelelago gikhati va na hakhwago nya luphye? Ni ava va nga bani va fude va na vbanya. 16Kholu gya gu bani gi phasedwe Nungungulu gipandre nya guphele nya gibaba, gu yeyedza gu pwani gibaba gyatshavbo gi agisedwe Nungungulu. Mikhamba nya simbo ya gu bani yi gu lumba Nungungulu, ni matamo yakone gambe ma gu lumba uye! 17Mambe matamo makokeledwe. Aholu, uwe u si gu Mujudha, u nga bani uri nga ngure nya likhabi, u tshomegidwe matamoni momo, u tshanganiswa kharato ni mikhamba, gasi u lisedzedwa mahwe nya ngure nya mbewu nya yadi. 18U nga hingigedzi gu dzi vega vbatshani nya matamu ma nga kokwago. Uwe u na dzi kodza kharini gu dzi vega vbatshani? Khandruwe u hodzisago khamba, khamba khuwo wu gu hodzisago. 19U na ganela khu mapimoni gwago khuwe: matamu yoyo ma kokedwe gasi ufela gu tshomegwa uwe wulangani gwawe. 20Lisine ilolo. Avo va kokidwe khu kota nya gumba khodwa, gasi uwe olu u vegidwe wulangani wowo khu kota u khodwago. Ambari ulo u nga dzi giri matshandza khu kota nya isoso. Aholu gu vbwetega gu dziwonela. 21Olu, Nungungulu a nga mba tsetsa Vajudha, va gu matamo nya mavelego, ina wa gu alakanya gu khuwe a na gu tsetsa uwe gani? 22Wona gwadi gu khuwe Nungungulu khwadi, aholu, a ngu garadza gambe. A ngu garadza ga vale va nga thega. Gwago uwe khwadi. Aholu gu vbwetega u vbanya khu edzi wu lombago khidzo wuwadi waye. Wa mba gira kharato, u na kokedwa nuwe. 23Khidzo navo kharato Vajudha, va gu diga gumbakhodwa gwawe, va na vegwa nya luphye wulangani gwawe. Nungungulu a na ni tshivba nya gu dzi kodze gu va wuyisa nya luphye. 24Ambari nya gukhuwe uwe khuri Mujudha, u litamo nya mavelego nya ngure nya likhabi, Nungungulu kodzide gu ndraga tumbunuko, a gu koka, a gu tshomega tshinani nya ngure nya wadi. Gasi Vajudha matamu nya mavelego nya ngure nya wadi.Gu na mu vbevbugela ngudzu gu va tshomega nya luphye tshinani nya simbo va lumbago uwo khu gale. 25Vandruye, kha nyi vbweti gu kheni mu hangwe khu sihalo yoyu, gasi mu si dzi randri va nya guti. Guganedza ga vathu va na Israeli kha gu na pindruga gikhati nya gulaphe aholu gu na simama kala mayigo yatshavbo ma gu vbindrugedza ma khodwa ga Nungungulu. 26Gikhati gyogyo, ngamo yatshavbo ya na Israeli yi na vbanyiswa kha nga yi ganelago Milowo nya gu Age khiyo: "Khu Siyoni a nata muvbanyisi,a nata handzago guvivba ga sanana sa na Israeli. 27Khigyo gidzumeledzwano nyi na hungago navo hwane nya gu na nyi va duside khu sighohoni gwawe." 28Ha gu khedza khu Mahungu nya Yadi, Vajudha va khade valala va Nungungulu khu kotani gwanu. Aholu avo va ngu simama gu khala sihathwa sa Nungungulu khu kota ya vakokwe. 29Kholu Nungungulu kha vbindrugedzi mapimo yaye ga ava a va hathidego ni gu va kategisa. 30Enu mu si gu Vajudha gale mu di gu yeyisa Nungungulu, gasi olu Vajudha va yeyisidego, enu mu hakhide wuhindzi wa Nungungulu. 31Olu Vajudha va yeyisidego, Nungungulu a ngu tadza enu khu wuhindzi waye, vafela gu hakha navo wuhindzi. 32Kholu Nungungulu digide vatshavbo va thegela wugumbini nya guyeyise, afela gu yeyedza wuhindzi waye ga vathu vatshavbo. 33Nga wona idzo yi gu yingi khidzo thomba, ni guti, ni wugengeli wa Nungungulu! Khu mani a dzi kodzago gu tshamusela maalakanyo yaye? Khu mani a dzi kodzago gu pima dzindzila dzaye? 34Milowo nya gu Age yi ngu ganela gwadi gu khiyo: "Khu mani a gutigo gu hingigedza ga Pfhumu?Khu mani a mu ningago wusingalagadzi? 35Khu mani a ningidego gilo Nungungulu gasi uye Pfhumu a mu vbweledzela?" 36Satshavbo sa guta khu ga Nungungulu; satshavbo sa gu tumbunuka tshivbani gwawe gasi gu thumela uye. A na rungudzwe Nungungulu kala gupindruga. Amen.


Copyright
Learn More

will be added

X\