VAROMA 10

1Vandriyangu, esi nyi si vbwetago khu monyo wangu watshavbo, nyi si lombago ga Nungungulu milombeloni gwangu, khu gu kheni Vajudha va vbanyiswe. 2Nyi ngu dzi kodza gu va emela nyi fakaza gu kheni avo va ngu dzi garadza ngudzu khu silo sa Nungungulu. Nombo basi khu gu, va gu dzi garadzela wukhumuni, 3Kholu khava pimi ndzila ya Nungungulu a ningago khiyo vathu gululama mahoni gwaye. Avo va gu dzi garadza khu magirelo yawe, aholu va diga gulandra ndzila yi vegisidwego khu Nungungulu. 4Kristo tshipiside Nayo wa Mosi gasi gu tshanganisa wulongoni gwa Nungungulu vathu vatshavbo va khodwago gwaye. 5A gu bani ari khu mahungu nya gutshanganiswe ni Nungungulu khu gu landra Nayo, Mosi lovide gu khuye: "Muthu watshavbo a landrisago Nayo, a na vbanyiswa khu Nayo". 6Gasi khu mahungu nya gutshanganiswe ni Nungungulu khu ndzila nya gukhodwe, Mosi lovide kharati: "U nga ganeli khu monyoni gwago khuwe: Khu mani a na litago a gu hongola ndzadzini?" (Khu gu pwani: gasi guya rana Kristo a tshige mafuni). 7"U nga wudzisi gambe gu khuwe: khu mani a na relelago vbavbatshi nya mafu?" (Khu gu pwani: gasi guya dusa Kristo khu gufani ata guvbanyani.) 8Gasi Milowo nya gu Age yari khiyo ginani? "Mosi wari khuye: Magana ya Nungungulu momo vbafuvbi gwago, kanani gwago ni monyoni gwago." Khayo magana yaya nya gukhodwe hi ma tivisago. 9Wa gu fakaza khu likana lago khuwe Jesu khuye Pfhumu, gumogo ni gu khodwa monyoni gwago khuwe Nungungulu a mu wuside khu ga vafudego, u na vbanyiswa. 10Kholu, muthu a gu khodwa monyoni gwaye Nungungulu a gu mu gira muthu nya gululame mahoni gwaye; muthu a gu fakaza khu likana laye, Nungungulu a gu mu vbanyisa. 11Khu lisine Milowo nya gu Age yi ngu hi embela gu khiyo: "Wule a khodwago ga Nungungulu gima kha na nga thedwa dzitshoni". 12Khu kharato, gumwalo gu hambana nya Vajudha ni va nya mayigo, kholu vatshavbo va na ni Pfhumu mweyo basi yi kavedzelago siningwa saye ga vatshavbo vale va mu lombago. 13Kha nga yi ganelago Milowo khiyo: "Muthu watshavbo a khodwago ga Pfhumu a na vbanyiswa." 14Aholu va na dzi kodza kharini gurana wule va si gu khodwigo gwaye? Mwendro, va na khodwa kharini ga wule va si gu mapwigo mahungu yaye? Gambe, va na ma pwisa guwani, amba manega muthu nya guya va tivisa Mahungu nya Yadi? 15A na hongodzisa guwani muthu nya guya va tivisa, amba rumedwa? Kha nga gu ganedwago umo nya Milowo nya gu Age gupwani: "Gu ngu tshamba ngudzu gu wona guvboha ga vale va hi reselago Mahungu nya Yadi." 16Aholu khandri vatshavbo va dzumelago Mahungu nya Yadi. Isaya ganede kharati khuye: "Khu mani a khodwego khu mahungu hi tivisidego?" 17Kharati, gukhodwa gwa guta khu gupwa mahungu hi tiviswago, gutivisa gwa guta khu mahungu ya Kristo. 18Olu nyi ngu wudzisa: Ina avo kha va mapwa mahungu yaya, gani? Khu lisine va ma pwide. Gambe iyo Milowo nya gu Age yabune yi ngu ganela khiyo: "Lito la vativisi li pwade tigoni gwatshavbo,ni magana yawe ma vbohide kala mahegiso nya mafu." 19Nyi na wudzisa gambe: Ina, vathu va na Israeli kha va mapima mahungu yaya, gani?Ga giwudziso gegi Mosi a gu hakha kharati: "Nyi na mi gira mu khalela lidiwo litigo li si gu litigo la gilo;Nyi mi gira mu khalela wufu litigo nya sipumbu." 20Isaya a ngu tiya gu ganela, khuye: "Nungungulu manidwe khu vale va nga bani va si mu vbweti;a dzi wonegiside ga vale va nga bani va si mu wudziseli." 21Aholu na gu thula Israeli, Isaya a di khuye: "Matshigu yatshavbo eni Nungungulu nya gu thawuludza libogo langu,ga vathu nyamba khodwa ni gumba yingela."


Copyright
Learn More

will be added

X\