VAROMA 1

1Eni Pawulo, githumi gya Jesu Kristo, nyi ranidwego gu khala Mupostoli, nyi hathidwe gasi gu tivisa mahungu nya yadi ya Nungungulu. 2Mahungu nya Yadi aya Nungungulu a ma tumbisidego gale khu vaprofeti omu nya Milowo nya gu Age 3maganelago khu Mwanaye, Pfhumu yathu, Jesu Kristo. Uye, khu gu velegwa adiri Mwamana wa Dhavide. 4Khu tshivba nya Liphuvbo nya gu Age, wonegisidwe gu pwani Mwamana wa Nungungulu nya tshivba yatshavbo, khu guwuga gwaye khu ga vafudego. 5Khu uye, Nungungulu a nyi ningide wuhigo nya gukhale Mupostoli, gasi nyi wuyise vathu nya mahundzu yatshavbo va khodwa ga Nungungulu ni gu dhumisa Kristo. 6Enu nenu, mu womo vbakari nya ava va ranidwego gukhala va Jesu Kristo. 7Eni Pawulo, nyi ngu mi losani enu mwatshavbo mu gomogo Roma, enu mu haladzwago khu Nungungulu, mu ranidwego gu khala va nya guaga vaye, kheni: Wuhigo ni gurula gu tago khu ga Nungungulu Babe wathu, ni ga Pfhumu Jesu Kristo gu na khale ni enu mwatshavbo. 8Khu guhegula, nya gubonga Nungungulu wangu khu ga Jesu Kristo. Nya gu mu bonga khu kotani yanu mwatshavbo, kholu mahungu nya gukhodwe gwanu ma pwade tigoni gwatshavbo. 9Nungungulu nyi mu thumelago khu monyo wangu watshavbo khu gu tshumayela Ivhangeli ya Mwanaye, khuye a gu fakazi yangu. A ngu dziti gwadi gu khuye nyi ngu mi dundruga 10gikhati gyatshavbo omu nya milombelo yangu, nyi lombago gu kheni Nungungulu a nyi ninge wuhigo nyi katege liendroni gwangu kala nyi guvboha iyo gwanu. 11Khu lisine, nyi ngu gola ngudzu guta mi wona, gasi nyita mi tshatshedza giningwa nya liphuvbo gi dzi kodzago gu mi tiyisela. 12Nya gu gola gu kheni hita tiyiselana hatshavbo: eni nyi tiyisedwa khu gukhodwa gwanu, ni enu mu tiyisedwani khu gwangu. 13Vandriyangu, nya guvbweta gu kheni mu dziti gu khenu dzinyondro dzingi nyi yedzile guta iyo gwanu, aholu nyi tandregiswa kala olu. Nya gu gola gu kheni thumo wangu wu ninge mihandro vbakari gwanu nga eyi yi ningidwego ga vambe va nya mayigo. 14Nyi hungidwe khu fanelo nya guphasedzele vathu vatshavbo: avo va handzegidego ni avo nyamba handzega, va nya guti ni sipumbu. 15Khu kharato, eni nyi dzi emisede gambe guta mi tivisani Ivhangeli, enu mu vbanyelago Roma. 16Eni kha nyi khali dzitshoni khu Ivhangeli, kholu iyo khiyo yi gu tshivba ya Nungungulu gasi gu vbanyisa vatshavbo vale va khodwago, guphela khu Vajudha kala va nya mayigo. 17Khiyo Ivhangeli yi hi yeyedzago gikungu gya Nungungulu nya gu hi tshanganise naye khu tshivba nya gukhodwe, gukhugela guhegulani kala mahegiso, kha nga yi ganelago Milowo nya gu Age khiyo: "Muthu a lulamidego mahoni gwa Nungungulu khu gukhodwa, a na vbanya." 18Nungungulu a ngu wonegisa khu ndzadzini likhulo laye nya likhongolo, gasi gu tsayisa guyeyisa ni guvivba gu girwago khu vathu nya sighohi, khu mavbanyelo yawe nya guvivbe ma segelago vathu guti lisine laye. 19Mahungu yatshavbo ya Nungungulu vathu va ngu ma pima gwadi, kholu uye Nungungulu wurumba waye a va tulede gu mati. 20Khu lisine, Nungungulu kha wonegi. Aholu, gukhugela guhegulani nya litigo, wonegiside gwadi wunungungulu waye ni tshivba yaye nyamba vbela khu mithumo yaye. Khu kharato, va mwalo guditshedzwa. 21Va di gu dziti gu khavo Nungungulu womo, aholu kha va mu thela kota ni gu mu rungudza kha nga edzi gu vbwetegago khidzo. Va di pfhala khu mipimiso yawe nyamba phasa gilo, ni gu gola gulandrisela silo nya gidema. 22Va gu dzi randra vathu nya guti, aholu sipumbu. 23Va digide gu rungudza Nungungulu nya gupindruge, va gu khozela sifananiso nya vathu vafago, kala va gu khozela ni sifananiso nya sinyoni, nya dzinyoga ni simbe sirengo. 24Khu kharato, Nungungulu a di va diga va gu thegela gunyenyezani nya gugole nya myonyo yawe, va gu gira mithumo nya dzitshoni, yi nyenyezisago sivili sawe. 25Va digide gulandrisa lisine la Nungungulu, va gu landrisela malipha. Va khozede ni gu thumela sivangwa sa Nungungulu, va diga gu khozela ni gu thumela uye mune Muvangi, uye a gu ni fanelo nya gukhozedwe kala gupindruga. Amen! 26Khu kharato, Nungungulu a va digide va gu thegela gunyenyezani nya esi si tsakisago sivili sawe. Gu di dzega ni vagadzi vakone va gu diga vama vawe, gasi gu gira iso nyamba yela, si hambanago ni tumbunuko nya wunyamayi wawe. 27Khu magirelo ya mamowo, vama vakone navo, va di diga gutshangana ni vagadzi vawe, va fekana gu dogolelana khu gyawe. Mwama ni mwama va di gira silo nya gunyenyeze nya dzitshoni, khu kharato, va ngu yela gu hakha tsayiso nya sihonohono sawe. 28Kha nga avo va nga mba thela kota ku guti Nungungulu, Nungungulu nuye a di va diga va gu landra mapimo yawe nya guhandruge, gasi va gire iso nyamba yela. 29Khu kharato, va fumedwe khu guwegela gwatshavbo, ni gunyenyeza gwatshavbo, ni wugundreli, ni guvivba, ni lidiwo, ni wufu, ni wughevenga, ni vhilinganya, ni malipha, ni wulala ni milembo. 30Va di khala vathu nya guvale, va dzi gira valala va Nungungulu, va nya gu dzi gugumugisa, va nya matshandza, va nya gunyenya vakwawe, vakutsedzeli nya mayunga, va nyamba yingela vavelegi, 31vathu nyambana gupima esi nya sadi ni esi nya guvivbe, vathu nyamba tumbega, nyambana lihaladzo, nyamba kodza gu pwela wuhindzi vathu vakwawe. 32Avo va ngu dziti, gu khuga ni gu ema gu khavo, nayo wa Nungungulu wa gu ruma gu khuwo vatshavbo ava va vbanyago kharalo, va ngu fanedwa khu gufa. Aholu, kha va hegeli basi gu gira silo sesi, va gu pata ni guzundza vale va vbanyago navo kharato.

will be added

X\