GUTULEDWA 9

1Ngilozi nya livbandre yi di womba pundru, khavbo avbo, nyi di wona nyeledzi na yi thegide khu ndzadzini. Yi di ningwa pfhungulo nya liphala nya likhongolo ngudzu. 2Nyeledzi yi di tula liphala gu duga wutshi nya gufane nuwo nya luvbya nya likhongolo ngudzu. Lidambo ni ndzadzini gu di sivbadzwa khu wutshi wakone. 3Khu wutshini gu di duga mbasa nya yingi yi phalalega ni litigo. Mbasa yakone yidiri ni wuhungu kha nga nya dzihume. 4Aholu, yi di leletedwa gumba sasela mwasi nya guvbanye wa khabini, mwendro sisimbwana satshavbo ni misimbo nya yikhongolo. Yi rumedwe basi gu sasela vathu vale va nga bani va sa vegwa gifungo gya Nungungulu vbagiwombotunu. 5Ambari ulo yi di laywa gumba songa vathu, aholu gu va sanisa ngudzu ndrani nya livbandre migima. Mahodzelo nya mbasa yoyo ma di vbisisa nya nga hume. 6Ndrani nya migima yoyo, vathu va na dogorela gufa va gu hamuga, va na vbweta gufa, aholu, lufu li na va thava. 7Mbasa yoyo yi di fana ni dzikavalu dzi dongisedwego guya nyimbini. Khovbe kha nga muthu, hungoni yi ambade kha nga gihugu nya wufumu nya gugirwe khu ndralama. 8Yidiri ni ndzudzu nya gulaphe kha nga nya vanyamayi; magwaha yakone ma di gu fana nayo nya nghala. 9Yidiri ni givhikelo nya gikete vbakhanatunu, ligwaha nya mambapi yakone li di fana ni ligwaha nya dzikareta nya gundrindrwe khu dzikavalu nya dzingi nya gututumele nyimbini. 10Yidiri gambe ni ngila nya guhegise khu muba nga oyu nya hume. Ngilani gakone wu diromo wuhungu nya tshivba nya gusanise vathu ndrani nya livbandre migima. 11Mbasa yatshavbo yi di gu thangedwa khu pfhumu mweyo a gu girumwa gya phalani. Khu Gihebheru gya gu ranwa "Abbadon" khu Gigreki "Apollion" gu tshamusago gu pwani "Mumbembisi." 12Egi gitsayiso nya guphele gi vbindrile. Aholu gu nga tshade gambe si tsayiso sivili hwane nya egi. 13Khu hwane nya isoso, girumwa nya livbandre na gimwegyo gi di womba pundru, khavbo avbo, nyi di pwa lito na li gu duga khu dzikhehoni dza dzina nya giluvelo nya ndralama, gi guromo mbeli ga Nungungulu. 14Lito li di embela girumwa nya livbandre na gimwegyo gi nga bani gi pharide pundru khilo: "Tshula sirumwa sa sina si hungidwego bambe nya tsongo khongolo wa Eufrate." 15Si di tshudwa sirumwa sa sina na si dongisede tshivba nya gusonge gipandre nya wuraru nya vathu khu gipitipiti, gikhati gegi, litshigu leli, ngima yoyu, ni mwaga yoyu. 16Nyi va pwide gwadi na va gu sayela tengo nya vama va khiledego dzikavalu nya nyimbi, adiri mazana mavili nya mazana mazana nya vama. 17Nyi di woniswa kharati dzikavalu ni vama va dzi khiledego: Vakhileli vadiri ni sighwabhata nya gungangamele nga nilo, nya gukhedzige ngudzu nga safira, nya gubyuge nga enxofre. Mihungo nya dzikavalu yi di gu fana niyo nya dzi nghala. Khu maganani nya dzikavalu gu di duga nilo ni wutshi ni enxofre. 18Khiso silo sesi sa siraru: nilo, ni wutshi ni enxofre si nga sasela gipandre nya wuraru nya vathu va tigoni, si nga bani si duga khu kanani gwawe. 19Kholu tshivba nya dzikavalu dzakone yi diromo kanani ni vbangilatunu. Migila yi di gu fana ni dzinyoga, yi nani mihungo yi hodzago khiyo vathu. 20Ambari ga sigaradzo satshavbo sesi, vale va nga vbulugago, kha va dzi kodza gu vbindrugedza mavbanyelo, va nyenya sithombe nya guwumbwe khu mandza yawe, kha va diga gu khozela sikwembu ni sithombe nya guwumbwe khu ndralama, mwendro khu prata, ni misimbo. Va rana vanungungulu sithombe nyamba wona, nyamba pwa, nyamba gimbila. 21Kha va vbindrugedza mavbanyelo, gambe va di simama ni mithumo yawe nya guvivbe: wughevenga, wuloyi, wubhayi ni wuvafa.

will be added

X\