GUTULEDWA 7

1Khavbo avbo, nyi di wona dzingilzi dzina dza Nungungulu na dzi emide mu dzikhonani dza dzina nya litigo, na si pharide maphuvbo ya mana nya litigo, gasi Liphuvbo li si furugedzi tigoni, ni matini ya phwani ambari misimboni. 2Nyi di wona gambe yimbe ngilozi ya Nungungulu yi nga bani yi guta khu khuga-dambo, na yi pharide gifungo gya Nungungulu nya guvbanye. Yi di ganela khu tshivba ni tshivba, yi embela dzingilozi dza dzina edzi Nungungulu a nga dzi ningago tshivba nya gusasele mafu ni yiphwa, khiyo: 3"Mu nga saselini litigo, ambari yiphwa, ni misimbo, na hi si gu lovi gifungo mu siwomboni nya sithumi sa Nungungulu wathu." 4Khavbo avbo, nyi di pwa tengo nya vale va nga bani va lovidwe gifungo: lizana ni magumi mana na mana mazana nya mazana (144.000) nya vathu va lumbago mahundzu yatshavbo nya sanana sa Israeli: 5Nya lihundzu la Judha adiri lizana ni magumi mavili mazana (12.000) avo va nga bani va lovidwe gifungo; nya lihundzu la Rubheni, adiri lizana ni magumi mavili mazana; nya lihundzu la Ghadhe, adiri lizana ni magumi mavili mazana; 6nya lihundzu la Aseri, adiri lizana ni magumi mavili mazana; nya lihundzu la Nafitali, adiri lizana ni magumi mavili mazana; nya lihundzu la Manase, adiri lizana ni magumi mavili mazana; 7nya lihundzu la Simioni, adiri lizana ni magumi mavili mazana; nya lihundzu la Levhi, adiri lizana ni magumi mavili mazana; nya lihundzu la Isakari adiri lizana ni magumi mavili mazana; 8nya lihundzu la Zabhuloni, adiri lizana ni magumi mavili mazana; nya lihundzu la Josefe adiri lizana ni magumi mavili mazana; nya lihundzu la Bhenjami, adiri lizana ni magumi mavili mazana. 9Hwane nya isoso nyi di wona mwandra nya wungi ngudzu nya vathu nya mayigo, mahundzu, mafumbu, malimi yatshavbo, a gu mwalo muthu a dzi kodzago gu wu saya. Va di emide mbeli nya gikhalo nya wufumu ni mbeli nya Nvutana, na va ambade dzingandzu nya gu age, va phara migindru mandzani. 10Va di gu huwelela khu tshivba khavo: "Guvbanyisa ga gu lumba Nungungulu wathu,a khadego vbagikhalotunu nya wufumu, gambe gwa gu lumba Nvutana." 11Dzingilozi dza Nungungulu dzatshavbo dzi nga bani dzi randrede gikhalo nya wufumu, madhota ni sirengo sa sina, dzi di khidzima mbeli nya gikhalo nya wufumu si gu khozela Nungungulu, khidzo: 12"Amen! Rungudzo ni gidhumo ni guti ni gubonga ni wuzundzo ni wufumu ni tshivba sa gu lumba Nungungulu wathu kala gupindruga. Amen!" 13Moyo nya madhota a di khusedza lito a nyi wudzisa, khuye: "Ava va nga ambala dzingandzu nya gu age khu vamani, na va guta khu hayi?" 14Nyi di mu hakha kheni: "Pfhumu yangu, uwe khuwe u dzitigo!" Khavbo avbo, a di nyi tshamusela, khuye: "Ava khu vale va tago khu mu sigaradzoni nya sikhongolo, vale va nga handzago dzingandzu dzawe va dzi agisela novbani nya Nvutana. 15Khiso si va girago va manega mbeli nya gikhalo nya wufumu wa Nungungulu, va mu thumela wutshigu ni mihani nyumbani gwaye. Wule a khadego vbagikhalotunu nya wufumu a na va vhikela khu mwedzi waye. 16Gima kha va na pwa gambe ndzala ni lidora, lihani ni lithonga gima kha si na va sanisa gambe. 17Kholu Nvutana yi guromo vbagikhalotunu nya wufumu khiyo yi va havisago, yi va yisa namboni nya mati nya womi. Nungungulu a na va bavbula marongo yawe yatshavbo."

will be added

X\