GUTULEDWA 6

1Nyi di wona Nvutana na yi gu namula gifungo nya guphele nya sile satshavbo nya livbandre na sivili. Khavbo avbo, nyi dipwa ni gu wona girengo nya guphele nya sile sa sina na gi gu ganela khu lito nya gudzume kha nga libara, khigyo: "Delu wona!" 2Khavbo avbo, nyi di wona kavalu nya gu age na yi gu duga, na yi khiledwe khu muthu na pharide wulaho mandzani. A di ningwa gihugu nya wufumu, a gu phara ndzila a hongola kha nga kuzi, gasi guya pala. 3Gikhati Nvutana yi nga namulago gifungo nya wuvili, nyi dipwa girengo nya wuvili na gi gu khigyo: "Delu!" 4Khavbo avbo, li di duga yimbe kavalu, nya gufuvile, na li khiledwe khu muthu a nga ningwago tshivba nya guvbedze gurula tigoni, gasi vathu va songane khu gyawe. A di ningwa gambe litshari nya likhongolo. 5Gikhati Nvutana yi nga namulago gifungo nya wuraru, nyi dipwa girengo nya wuraru na gi gu khigyo: "Delu wona!" Khavbo avbo, yi di duga kavalu nya gusivbale, na yi khiledwe khu muthu a nga bani ari ni gikalo mandzani. 6Khavbo avbo, nyi dipwa vbakari nya sirengo sa sina lito khilo: "Gipimo nya sivbila gu livba thumo nya litshigu, sipimo siraru nya mavbila gu livba thumo nya litshigu aholu u nga haganiseli mafura ni vbinyu." 7Gikhati Nvutana yi nga namula gifungo nya wuna nyi dipwa girengo nya wuna na gi gu khigyo: "Delu wona!" 8Nyi di wona kavalu nya safarawu, na yi khiledwe khu moyo nya gupwani khu "Gufa" a na gu bangaladzwa khu Hayidesi, litigo nya vafi. A di ningwa gipandre nya wuna nya litigo, gasi a gi mwaladze khu litshari, ni ndzala, ni mitungu nya madwali ni sirengo nya likhabi. 9Gikhati Nvutana yi nga namula gifungo nya livbandre, nyi di wona vbavbatshi nya giluvelo mihefemulo ya vale va nga songwago khu kota nya gutivise mahungu ya Nungungulu ni gu ma fakaza khu mavbanyelo yawe. 10Va di gu huwelela khu tshivba khavo: "Ama Pfhumu, uwe khuwe u agidego ni gutumbega!Hi na lirela kala lini gasi u lamule vathu va tigonimu,u hi phodzela olu va nga hi songetelago?" 11Moyo ni moyo wawe a di ambagiswa ngandzu nya gu age ni gulapha, va gu embedwa pwani va na hefemule vbadugwana, va lirela gu enedza tengo nya vangana ni vandriyawe, ava va nga gu vbwetago gu songwa nga avo. 12Khavbo, nyi di wona Nvutana yi namula gifungo nya livbandre na gimwegyo. Gu di manega girevareva nya gikhongolo; lidambo li di sivbala kha nga gilendra; ngima wu di fuvila kha nga novba; 13Dzinyeledzi dza ndzadzini dzi di thegela vbavbatshi, kha nga nguyu wu thegelago maguyu nya mambihu khu gu kutsungwa khu gingulu. 14Ndzadzini gu di mwalalega kha nga lidangalila li peteledwago. Sigomo ni sidwa satshavbo si di siguledwa malangani gwawe. 15Vafumeli nya mayigo, ni vathangeli nya dzinyimbi, sitetema, va nya tshivba, vatshavbo, dzikhumbi ni va nya gutshulega, va di sihala mu dziphagoni nya siwindri sa mu sigomoni; 16va di embela sigomo ni siwindri khavo: "Hi thegeleni mu hi siha ga wule a khadego vbagikhalotunu nya wufumu, ni ga likhulo la Nvutana, 17kholu litshigu likhongolo nya likhulo laye li vbohide; khu mani a na gu dzi kodzago gu khala na emide?"


Copyright
Learn More

will be added

X\