GUTULEDWA 5

1Khavbo avbo, nyi di wona libhuku mandzani ya nyamudye ga wule a khadego vbagikhalotunu nya wufumu; li di lovidwe khu ndrani ni vbavbandze, li lemwa khu livbandre na sivili sifungo. 2Nyi di wona gambe ngilozi ya Nungungulu nya tshivba, na gi gu huwelela khu lito nya gukhusege khigyo: "Khu mani a gu ni fanelo nya gutule libhuku, a gu namula sifungo saye?" 3Aholu kha manega ni moyo basi ndzadzini, ambari mafuni, ambari vbavbatshi nya mafu, a nga kodzago gu tula mwendro gu li khedza. 4Eni nyi di lila ngudzu kholu mwalo a nga manwago nari ni fanelo nya gutule mwendro gu hevbula mwendro gu khedza libhuku. 5Limwedo nya madhota yale li di nyi degudzela, khilo: "U nga lili kholu Nghala nya lihundzu la Judha a gu Melego wa Dhavide, yi pade, khu kharato yi ngu kodza gu tula libhuku ni gu namula sifungo saye satshavbo nya livbandre na sivili." 6Khavbo avbo, nyi di wona Nvutana na yi emide, vbakari nya gikhalo nya wufumu, nya gukhwatshi yi di songwa, na yi randredwe khu sirengo sile sa sina ni madhota. Yidiri ni livbandre na dzimbili dzikheho, ni livbandre na mavili maho, a gu livbandre na mavili maphuvbo ya Nungungulu ma rumedwego mafuni gwatshavbo. 7Khavbo avbo, Nvutana yi di ta hakha libhuku khu mandzani ya nyamudye ga wule a khadego vbagikhalotunu nya wufumu. 8Na gu hakha libhuku, sirengo sile sa sina ni madhota yale nya magumi mavili na mana ma di khidzima mbeli ga Nvutana, mari ni sitendre ni sikombe nya gugirwe khu ndralama na si tade khu libani, a gu milombelo nya sihathwa. 9Ma di gu emba ndzimo nya yiphya, khayo: "U nani fanelo nya gu hakhe libhuku ni gu namula sifungo saye,kholu u songidwe;khu novba wago, u dzegiside vathu nya mahundzu, malimi, mafumbu, ni mayigo yatshavbo.U gu va ningela ga Nungungulu. 10U va giride vafumeli ni vaphasi nya mhamba ya Nungungulu;avo vana fuma mafuni." 11Khavbo avbo, nyi di wona ni gupwa lito nya mwandra nya dzingilozi dza Nungungulu dzi nga bani si randrede gikhalo nya wufumu, ni sirengo sile sa sina ni madhota; tengo wa kona adiri makhulukhulu ni makhulukhulu. 12Va di gu emba khu lito nya gukhusege khavo: "Nvutana yi nga songwago yi fanede gu ningwa mufumu, wurendra,guti, tshivba, rungudzo, gidhumo ni wuzundzo" 13Sivangwa satshavbo sa ndzadzini, sa mafuni, ni vbavbatshi nya mafu niso sa matini nyi di sipwa satshavbo na si gu khiso: "Wuzundzo ni rungudzo, ni wufumu ni tshivba kala gupindruga ga wule a khadego vbagikhalotunu nya wufumu ni ga Nvutana." 14Sirengo sile sa sina si di hakha khiso: "Amen!" Gasi madhota nya magumi mavili ni mana ma di khidzima ma gu khozela wule a banyago kala gupindruga.

will be added

X\