GUTULEDWA 3

1"Lovela girumwa gya libandla la Sardesi khuwe: "Wule a gu ni livbandre na mavili maphuvbo ya Nungungulu ni livbandre na dzimbili dzinyeledzi wari khuye: Nyi ngu yiti mithumo yago, u nani ndruma nya gupwani u ngu vbanya. Gasi u fude. 2"Dzi wonele, u dwanela gipandre gi si gufigo, kholu kha nyi ma woni gwadi mavbanyelo yago mbeli ga Nungungulu. 3Khu kharato dundruga mahungu u ma hakhidego ni gu mapwa. Ma landrise, u vbindrugedza mavbanyelo u wuya ga Nungungulu. Wamba gwadi nyi nata kha nga mbafa nu si giti gikhati nyi na gu gu vbohelago khigyo. 4Ambari ulo, tigoni ga Sardesi unani vathu va nga mba kunedzisa dzingandzu dzawe. Avo nyi na gimbila navo na va ambade dzingandzu nya gu age, kholu va na ni fanelo. 5Uye a na palago a na ambala dzingandzu nya guage; eni gima kha nyi na nga futa lina laye mu libhukuni nya womi. Nyi na tivisa lina laye ga Babe wangu ni ga dzingilozi dzaye. 6"Wule a gu ni dzindzeve a na pwisise esi Liphuvbo li embelago mabandla." 7"Lovela girumwa gya libandla la Filadelfiya khuwe: "Wule a agidego, a gu uye nya lisine, a gu ni pfhungulo ya Dhavide wule nya gu a gu tula mwalo a segago, a gu sega mwalo a tulago, wari khuye: 8Nyi ngu mati mavbanyelo yago. Nyi tude lidimba mbeli gwago, mwalo a li kodzago gu sega. Nyi ngu dziti nya gu kheni tshivba yago yi dugwanana aholu u vegedzide magana yangu, khwa danga lina langu. 9Nyi na gu ninga tshangano nya valandreli va Sathane, vale va dzi randrago Vajudha nari va gu lipha. Va na khidzima migondroni gwago, gasi va dziti nya gukhavo nyi ngu gu gola. 10Kha nga ulo u nga landrisago nya gu timisele gwangu, eni neni nyi na gu vhikela gikhati litigo latshavbo li na lingwago gasi gu wona khu mani a tiyidego mafuni. 11"Nyi nguta nugunugu. Iso u gu naso si vegedze, gasi usi dzegedwi gihugu gyago nya wudhumo. 12Gasi wule a na palago nyi na mu gira lidingo Nyumbani ga Nungungulu wangu, umo nya gu gima kha na duga kala gupindruga. Nyi na mu lova lina la Nungungulu wangu, ni lina nya lidhoropa la Nungungulu wangu - Jerusalema nya guphya - gu tshigago khu ndzadzini gutago khiyo ga Nungungulu wangu - bwelo khavbo nyi mu lova lina langu nya liphya. 13"Wule a gu ni dzindzeve a na pwisise esi Liphuvbo li embelago mabandla." 14"Lovela ngilozi ya libandla la Laodikeya khuwe:"Wule a gu uye, Amen, a gu fakazi nya guthembege nya lisine a gu uye guphela nya sivangwa satshavbo sa Nungungulu wari khuye: 15Nyi ngu mati mavbanyelo yago, khu dzidzili, gambe khu vbisi. Nari pwani sago nuri wa gu dzidzila mwendro nuri wa guvbisa! 16Kha nga olu u gu wa gu furumela u si gu wa gudzidzila mwendro guvbisa, nyi na gu gosa khu kanani gwangu. 17Wari khuwe: 'Nyi gikhudhudhu, nyi fumide, gi mwalo nyi gi hamugago.' Aholu khu dziti nya gukhuwe u mutshaniseki, u gisiwana, u gikhumu, u wumbwiri. 18Nyi ngu gu laya gu kheni renga gwangu ndralama nya gu mburisedwe niloni gasi u fume; u renga dzingandzu nya gu age gasi u ambale, u siha dzitshoni nya wumbwiri wago; u renga rendre nya maho gasi u dzi todza u kodze gu wona. 19Eni, nya gu kawuka ni gu laya avo nyi va golago. Khu kharato, dzi garadze, u vbindrugedza mavbanyelo u wuye ga Nungungulu. 20Nyi womo vbalidimbatunu nyi khokhota. Uye a na pwago lito langu a nyi tulela, nyi na bela nyumbani gwaye nyi hodza naye, uye nuye a hodza ni eni. 21"Wule a na palago nyi na mu dzumedzisa gu khala naye vbagikhalotunu gwangu nya wufumu kha nga eni neni nyi nga palago nyi khadego vbagikhalotunu nya wufumu wa Babe wangu. 22"Wule a gu ni dzindzeve a na pwisise esi Liphuvbo li embelago mabandla."


Copyright
Learn More

will be added

X\