GUTULEDWA 22

1Khavbo avbo, ngilozi yi di nyi yeyedza tsongo nya mati nya womi, nya gukhedzige nga libona nya kristali, na ma gu duga khu vbagikhalotunu nya wufumu wa Nungungulu ni wa Nvutana. 2Vbakari nya ndzila, khu maphuvbo ya mavili nya tsongo womo simbo nya womi wu velegago mihandro, likhumi na dzimbili dzinyondro, khu ngima ni ngima gu velega. Gasi mahagane yakone rendre nya guhawulugise vathu vatshavbo. 3Gima kha gu na manega gambe guvala, kholu gi na bani giromo umo gikhalo nya wufumu wa Nungungulu ni wa Nvutana. Sithumi saye si na mu thumela. 4Va na wona khovbe Yaye ni lina laye li na lowa siwomboni gwawe. 5Gima kha gu na manega gambe wutshigu; kha gu na vbwetega safa nya mwenge, ambari guwenengedza nya lidambo, kholu Pfhumu Nungungulu a na wenengedza vbatshani gwawe, avo va na fuma khu gupindruga nya gupindruge. 6Ngilozi yi di nyi embela khigyo: "Magana yaya ma tumbegide, khya lisine, kholu Pfhumu Nungungulu nya maphuvbo nya vaphrofeti rumede ngilozi yaye gu ya yeyedza ga sithumi saye silo si guromo vbafuvbi ni gu dugelela. 7Mu ngu wona! Nyi ngu ta nugunugu. Kategide oyu a vegisago magana nya wuphrofeti nya libhuku leli." 8Eni, Johane, kheni nyi gu fakazi nyi nga sipwago ni gu si wona silo sesi. Na nyi si wone ni gu sipwa nyi di khidzima mawundruni nya ngilozi yi nga nyi yeyedza silo sesi nyifela gu yi khozela. 9Aholu, ngilozi yi di nyi himbedzela, khiyo: "Ahihi, u nga giri isoso, eni nyi githumi kha nga uwe ni vandriyago, ni vaphrofeti, ni vatshavbo vale va vegisago magana nya libhuku leli. Khozela Nungungulu." 10Yi di nyi embela gambe khiyo: "U nga segeli magana nya wuphrofeti nya libhuku leli, khaguva gikhati gyomo vbafuvbi ni gu vboha. 11Muthu nya mbana ndruda a na simame ni mithumo yaye nya guwegele, muthu nya gunyenyeze a na simame ni gudzinyenyezisa gwaye, muthu nya gululame a na simame ni mithumo nya gululame gwaye. Ni uye a agidego a na simame gu dzi agisa. 12"Wonani, eni nyi nguta khu gu vbiredza, nyi resa tshatshazelo wa muthu ni muthu gu khedza khu mithumo yaye. 13Eni kheni Alfa ni Omega! Oyu nya guhegule ni uye nya guhegise. Guphela ni guhegisa. 14Va kategide vale va handzago dzingandzu dzawe vafela gu mana fanelo nya guhodze simbo nya womi gasi va kodze gu bela khu malimba ya dhoropani. 15Va na tshala vbavbandze dzimbwa, dzindroyi, va nya wubhayi, va nya gukhozela sikwembu ni vanungungulu nya malipha ni sighevenga ni vatshavbo vale va golago ni gu thuma mithumo nya malipha. 16"Eni Jesu nyi rumede ngilozi yangu gu ta mi fakazela silo sesi khu mahungu nya mabandla. Eni nyi khamba ni mbewu nya lihundzu la Dhavide, nyi thandra nya wuronga nya guwenengedze ngudzu." 17Liphuvbo nya gu Age ni ngadza Nvutana, vari khavo: "Delu!" Ni wule a pwago a na ganele nuye khuye: "Delu!" Wule a gu ni lidora a nate. Oyu a dzinago a na hakhe mahala mati nya guvbanye. 18Ga vatshavbo va pwago magana nya wuphrofeti nya libhuku leli nyi ngu tivisa gu kheni: A gu kala muthu a engedzela gilogyo ga magana yaya, Nungungulu a na mu engedzelela sitsayiso si lovidwego libhukuni momu. 19A gu kala muthu a vbungula magana nya wuphrofeti nya libhuku leli, Nungungulu a na dusa gipandre gyaye simboni nya womi ni dhoropani nya gu age, si tiviswago libhukuni momu. 20Oyu a gu fakazi nya silo sesi wari khuye: "Ina, nyi nguta nugunugu!" Amen. Delu Pfhumu Jesu! 21Pfhumu Jesu a na tshise wuhigo waye ga enu mwatshavbo.


Copyright
Learn More

will be added

X\