GUTULEDWA 21

1Khavbo avbo, nyi di wona Ndzadzi nya yiphya ni litigo liphya, kholu, ndzadzi nya guhegule ni litigo nya guhegule si di vbindride, ni yiphwa yi di mwalalegide. 2Nyi di wona gambe na gu tshiga khu ndzadzini, khiyo ga Nungungulu, lidhoropa nya gukatege, Jerusalema guphya, gu dzi dongisedego nga nyamayi a dzi mburisedego gasi guya hakha mwama waye. 3Khavbo avbo, nyi di pwa lito nya tshivba nali guta khu gikhalotunu nya wufumu, khilo: "Wonani nyumba ya Nungungulu vbakari nya vathu. Nungungulu a na vbanya vbakari nya vathu, avo va na khala vathu vaye, uye vbakari gwawe, a na bani ari Nungungulu wawe. 4Uye a na va bavbula marongo mahoni gwawe, kholu gima kha gu na manega gambe gufa, gulila gu na vbela, ni gudilela ni wuvi, kholu dzitshanisa dza gale dzi vbindride." 5Wule a khadego vbagikhalotunu nya wufumu a di tivisa khuye: "Eni nyi ngu gira siphya silo satshavbo." A engedza gambe khuye: "Lova kholu magana yaya ma tumbegide, gambe khya lisine." 6A di nyi embela gambe khuye: "Satshavbo si giregide! Eni kheni Guphela ni Mahegiso (Alfa ni Omega). Oyu a gu ni lidora nyi na mu ninga a sela mahala mati nya gifefe nya guvbanye. 7Oyu a na palago a na hakha thomba yeyi, eni nyi na khala Nungungulu waye, ni uye a khala gyanana gyangu. 8Gasi va nya wugara, ni mahedheni, ni sighohi, ni sighevenga, ni sibhayi, ni dzindroyi, ni va nya malipha, va nya wun'yanga, vatshavbo va dongisedwe wulanga wawe tsivani nya nilo ni solufa, a gu gufa nya wuvili." 9Khavbo avbo, nyi di wona girumwa gimwegyo nya sile nya livbandre na sivili sirumwa sa Nungungulu si nga bani si pharide livbandre na sivili sikombe nya gutale khu livbandre na sivili sitsayiso, gi dita gwangu gita khigyo: "Delu! Nyi na gu yeyedza Mwangadzi wa Nvutana." 10Khavbo avbo, gi di nyi rwala khu Liphuvbo gi nyi yisa gigomoni nya gikhongolo, nya gulaphe gi nyi yeyedza Jerusalema, lidhoropa nya gukatege, li nga bani li gu tshiga khu ndzadzini, khu ga Nungungulu. 11Lidhoropa li di ngangamela khu wudhumo wa Nungungulu. Gu aga gwaye gu di gira nga giwindri nya gukhedzige ngudzu nga giwindri nya jasperi nya gu age nga libona. 12Lidhoropa lakone li dzuwulugedwe khu libhiyo nya gugule ni gulapha, li gu ni likhumi na mavili malimba. Khu vbatshani nya malimba somo likhumi na sivili sirumwa sa Nungungulu, gambe gu lovidwe malina, a gu malina nya likhumi na mavili mahundzu nya sanana sa na Israeli. 13Malimba mararu ma khade khu khuga-dambo; mararu khu wuronga; mararu khu marandzi; ni mararu khu muhwa-dambo. 14Libhiyo nya lidhoropa li vbahedwe vbatshani nya likhumi na sivili siseketelo si lovidwego likhumi na mavili malina nya vapostoli va Nvutana. 15Uye a nga bani a gu ganela ni eni adiri ni pimo nya ndralama, gasi gu pima lidhoropa, ni malimba yaye ni libhiyo lakone. 16Lidhoropa leli li na ni maphuvbo mana nya tanga mweyo. A di pima lidhoropa khu pimo; li di ningana likhumi na mavili magumi mazana nya mipimo. Gulapha ni gugula, dzindzari dzatshavbo ni vbatshani gu ngu ningana. 17A di pima gambe libhiyo a gu mana lizana ni magumi mana na mina mikono. Ngilozi yi di gu pima khu mapimelo nya giwuthu. 18Libhiyo li di vbahwa khu siwindri nya jasperi, gasi lidhoropa li di vbahwa khu ndralama nya gukhedzige nga libona nya gu age ngudzu. 19Siseketelo nya libhiyo si londridwe khu mafumbu yatshavbo nya siwindri nya wuzundzo. Egi nya guhegule gi londridwe khu jasperi; nya wuvili khu safira, egi nya wuraru gi londridwe khu kalsedoni, egi nya wuna khu esmeralda; 20egi nya livbandre khu sardhoniya; egi nya livbandre na o khu komalina; egi nya livbandre na sivili khu krizolito; egi nya livbandre na siraru khu berilo; egi nya livbandre na sina khu topasiyo; egi nya likhumi khu krizoprazo; egi nya likhumi na gimwegyo khu jasinto; egi nya likhumi na sivili khu ametista. 21Malimba yale nya likhumi na mavili adiri likhumi na sivili siwindri nya gukhedzige, lidimba ni lidimba li di girwa khu rumba nya giwindri nya gukhedzige. Ndzila yakone ya vbakari khya ndralama nya gukhedzige nga libona nya gu age ngudzu. 22Dhoropani gwatshavbo kha nya wona nyumba ya Nungungulu. Kholu uye Pfhumu Nungungulu nya tshivba yatshavbo, gumogo ni Nvutana, khuye abune Nyumba ya Nungungulu. 23Lidhoropa lakone khali vbweti lidambo, ambari ngima gu wenengedza, kholu la gu wenengedzwa khu wudhumo wa Nungungulu, wenengedzo waye khu Nvutana. 24Mayigo ma na gimbila vbakari nya safa nya wenengedzo waye. Ni vafumeli nya mayigo va nata, va resa dzithomba dzawe dhoropani. 25Malimba yaye kha ma na segwa, kholu gima kha gu na khala gambe wutshigu. 26Va na resa wudhumo ni thomba nya mayigo. 27Dhoropani gakone gima kha gu na bela gilo nya gunyenyeze, ni vathu va girago guvivba ni malipha; aholu va na bela basi vale va lovidwego libhukuni nya womi la Nvutana.

will be added

X\