GUTULEDWA 20

1Nyi di wona ngilozi na yi gu tshiga khu ndzadzini, giri ni pfhungulo nya liphala nya guete ni likhetshe mandzani gwaye. 2Gi di mola mwamilambo, nyoga ya gale a gu uye dhiyabulosi ni Sathane, a gu mu khotela likhumi mazana myaga. 3A di mu rinya phalani nya guete a mu segela, a vega gifungo khu vbatshani gasi a si pengisi gambe mayigo kala gu enela likhumi mazana myaga. Hwane nya myaga yoyo a na tshudwa gikhatinyana. 4Nyi di wona gambe mihefemulo ya vale va nga songwago kholu va nga tumbegago khu gufakaza Jesu ni Mahungu ya Nungungulu . Avo kha va nga khozela girengo ambari gifananiso gyaye, gambe kha va dzumela gu vegwa gifungo gyaye vbagiwombotunu ambari mandzani. Avovo va wugide va vbanya, va gu fuma gumogo ni Kristo gipimo nya likhumi mazana myaga. 5Vambe va nya gufa kha va na wuswa kala gu enela likhumi mazana myaga. Ogu khu gu wuga nya guhegule khu gufani. 6Vakategide vale va na gu valedwago tengoni nya guwuge gogu nya guhegule khu gufani! Kholu gufa nya wuvili kha gu na mana tshivba vbatshani gwawe, aholu va na khala vaphasi va Nungungulu ni va Kristo, va na fuma naye gipimo nya likhumi mazana myaga. 7Guvbela nya likhumi mazana myaga, Sathane a na tshudwa a gu duswa pasoni. 8A na duga gasi guta senga mayigo nya makhona ya mana ya tigoni: Gog, Magog a ma tombanisa gasi gu dwana nyimbi. Tengo wawe kha nga fungu wa phwani. 9Va di tadza litigo latshavbo va gu dzuwulugela lizumbo la va nya gukatega ni lidhoropa nya gugolege. Aholu wu di tshiga nilo khu ndzadzini wuta vbedza vatshavbo. 10Sathane a nga va pengisago, a di rinywa tsivani nya nilo ni solufa, avba gu nga bani guromo girengo ni muphrofeti nya malipha; avbo va na mana gutshaniseka nya gukhongolo wutshigu ni mihani kala gupindruga. 11Nyi di wona gambe gikhalo nya gikhongolo nya wufumu nya gu age ni wule a nga bani a khade ga igyo. Mahoni gwaye ndzadzi ni mafu si di mwalalega nyamba wonega gambe. 12Nyi di wona va nya gufa, vakhongolo ni sanana, va na emide mbeli nya gikhalo nya wufumu. Ma di tudwa mabhuku. Li tudwa gambe libhuku nya womi. Vafi va di lamudwa nga idzo gu nga bani gu lovidwe khidzo mabhukuni gupima khu mithumo yawe. 13Linene li di dusa vbavbandze vafi va nga dzamago ga ilo, lufu ni lithowo si di bweledza vafi vawe. Muthu ni muthu a di lamudwa khu mithumo yaye. 14Lufu ni lithowo si di rinywa tsivani nya nilo. Litsiva leli nya nilo khu gufa nya wuvili. 15Tsivani momo va di rinywa vatshavbo vathu va nga bani va sa lowa malina yawe omu nya libhuku nya womi.


Copyright
Learn More

will be added

X\