GUTULEDWA 2

1"Lovela girumwa gya libandla la Efeso khuwe:"Wule a pharago livbandre na dzimbili dzinyeledzi khu nyamudye; wule a vbindrago khu vbakari nya livbandre na dzimbili dzikandriya nya ndralama, wari khuye: 2Nyi ngu siti sigiro sago, mithumo yago ni gutimisela gwago, kholu nyi ngu dziti nya gukheni khu pwanani ni vathu nyamba si vadi; ni vale va dzi ranago vapizani vasiri u va, u va lingide, uva kona mu guliphani gwawe. 3"U nani gutimisela, u tshanisekide khu kota nya lina langu, ambari ulo khwa rereka. 4Aholu, nyi ngu gusola kholu u digile lihaladzo lago nya guhegule. 5Nga dundruga avbo u nga thega khavbo; Nga dzi vbindrugedza, u landrisa nya luphye mithumo yago nya guhegule. Aholu, wa gumba dzi vbindrugedza, nyi nata iyo gwago nyita dusa kandriya yago wulangani gwaye. 6"Ambari guralo, unani gipandre gyago nya wuwadi, kholu, u ngu nyenya mithumo ya valandreli va Nikolawu, kha nga edzi nyi yi nyenyago khidzo eni. 7"Wule a gu ni dzindzeve a na pwisise esi Liphuvbo li embelago mabandla. Ga wule a na palago, nyi na mu dzumedzisa guhodza handro nya simbo nya womi wu gomo thembweni ga Nungungulu." 8"Lovela girumwa gya libandla la Esmirna, khuwe: "Wule a gu guphela ni guhegisa; wule a ngafa a wuya a wuga, wari khuye: 9Nyi ngu guti gutshaniseka gwago ni wusiwana wago, aholu u fumide. Nyi ngu dziti gambe edzi va gu nyenyago khidzo vale va dzi ranago Vajudha vasiri avo, kholu avo tsawa nya valandreli va Sathane basi. 10U nga khali hwanga khu gu wona gutshaniseka gu gu viredego. Ndrani nya matshigu yaya, Sathane a na khothela pasoni vambe ni vambe vbakari nya libandla lanu, gasi gu va lingwa. Muna wona gutshaniseka nya gukhongolo gipimo nya likhumi matshigu. Tumba kala gufa, nyi na gu ambagisa gihugu nya womi nyamba bela. 11"Wule a gu ni dzindzeve a na pwisise esi Liphuvbo li embelago mabandla: wule a na palago gima kha na nga wona tshanisa nya lufu nya wuvili." 12"Lovela Girumwa gya libandla la Pergamo khuwe: "Wule a lodzidego litshari li gu vbira eno ni eno, wari khuye: 13Nyi ngu guti avbo u vbanyago, khavbo gi guromo gikhalo nya wufumu wa Sathane.Ambari guralo, u ngu pala sigaradzo satshavbo, u gu namarela, khu gutiya, linani gwangu. Khwa nyenya gukhodwa ga eni. Ambari ga matshigu yale a nga songwago khayo mufakazi wangu Antipa a nga bani a gu vbanya vbakari gwanu avbo a vbanyago nuye Sathane. 14Aholu, u na ni nandru kholu: u navo vbakari gwago valandreli nya nayo wa Balahami wu nga hevbudzwago khu Balahaki gasi gu tshunganedzisa sanana sa Israeli si gu hodza nyama nya sirengo nya guphasedwe sithombe nya vanungungulu nya malipha, ni gu gira wuphuphulu. 15Vomo navo vbakari gwago valandreli nya nayo wa Nikolawu avo ni va nyenyago neni gwago. 16Nga vbindrugedza mavbanyelo: nyi nga gara nyita khu guvbiredza nyita dwana navo khu litshari leli la kanani gwangu. 17"Wule a gu ni dzindzeve a na pwisise esi Liphuvbo li embelago mabandla: wule a na palago nyi na mu ninga mana ma sihidwego. Nyi mu ninga gambe giwindri nya guage gilovidwego lina nya liphya, eli li si tidwigo khu muthu vbavbandze nya wule a nga riywago ilo." 18"Lovela girumwa gya libandla la Tiyatira khuwe:"Mwamana wa Nungungulu, oyu a gu ni maho nya gugungangamele nga nilo, ni migondro yaye nya gukhwatshi sugu nya gukhedzige, wari khuye: 19Nyi ngu siti sigiro sago, ni lihaladzo lago, ni mithumo yago, ni gukhodwa gwago, ni gutimisela gwago, ni gusimamisa gwago; mithumo yago ya olu yi ngu vbindra eyi nya guhegule. 20Aholu, u na ni nandru kholu u digago Jezebeli, nyamayi a dzi girago muhprofeti, a gu ndreyisa sithumi sangu, a gu si hevbudza gu gira wuphuphulu, ni gu hodza nyama nya guphasedwe vanungungulu nya malipha. 21Eni nyi mu ningide gikhati nya guvbindrugedze, aholu, uye kha dzini gu vbindrugedza mavbanyelo a diga wuphuphulu waye. 22Olu furi guvbweta gu nga mu thesa vbadawutunu a tshaniseka gumogo ni vale va nga bhaya naye, va na tshaniseka wulanga nya wukhongolo ngudzu va mba vbindrugedza mavbanyelo va diga mithumo yawe nya guvivbe. 23Nyi na rwega lufu ga sanana saye gasi mabandla yatshavbo ma dziti gu khayo kheni muloli nya mahingigedzo ni myonyo, kholu nyi na ninga moyo ni moyo gu landra khu mithumo yaye. 24"Gasi ga enu ni vambe vathu va Tiyatira vale va si landreligo milayo yeyi, enu mu si gutigo 'Gu eta ga Sathane' (kha nga edzi gu ganedwago khidzo) kha nyi na mi lemedza khu mimbe mirwalo. 25Aholu, vegisani eyi milayo mu gu nayo kala nyi gu wuya. 26Ga gikhati gyogyo wule a na palago ni gu landrisa mithumo yangu kala mahegiso, nyi na mu ninga tshivba nya gufumele mayigo. 27A na ma fuma khu ndronga nya simbi, a na ma pandrelela kha nga edzi gu pandredwago khidzo dzikhali nya libumba. 28Kha nga eni neni nyi hakhidego mufumu wa Babe wangu anuye nyi na mu ninga thandra nya gugye. 29"Wule a gu ni dzindzeve a na pwisise esi Liphuvbo li embelago mabandla."

will be added

X\