GUTULEDWA 19

1Khu hwane nya satshavbo sesi, nyi dipwa nga lito nya lidhuma nya vathu na li gu tshiga khu ndzadzini khilo: "Aleluya!Gu vbanyisa, ni gidhumo, ni tshivba sa gu tumbunuga khu ga Nungungulu wathu. 2Kholu gulamula gwaye khwa lisine ni gululama, khaguva tsayisile gibhayi gikhongolo gi nga mbembisa litigo khu wubhayi waye,gambe phodzede vbatshani ga igyo novba nya sithumi saye." 3Va di engedza khavo: "Aleluya! Wutshi waye wa gu tuviga kala gupindruga." 4Vale nya magumi mana na mana madhota, ni sivangwa sile nya sina nya guvbanye, va di khidzima va gu khozela Nungungulu a khadego vbagikhalotunu nya wufumu, khavo: "Amen! Aleluya!" 5Khu vbagikhalotunu nya mufumu gu di duga lito khilo: "Rungudzani Nungungulu wathu,enu mwatshavbo sithumi saye,enu mu gu ni githawo gwaye,vadugwana ni vakhongolo." 6Nyi dipwa gambe nga lito nya likhongolo nya talo nya vathu, nga gudzuma nya talo nya mati, nga gudzuma nya libara, na va gu khavo: "Aleluya! Kholu Pfhumu, Nungungulu wathu nya tshivba yatshavbo a ngu fuma! 7Hongoleni hi tsake, hi nengela ni gu mu rungudza,kholu gi vbohide gikhati nya buzo wa Nvutana,mwangadzi waye gambe a dzi dongisede, 8ambagisedwe dzingandzu nya gumbure dzi handzidwego dzi agiswa gwadi." Dzingandzu nya wumburi khu mithumo nya ndruda ya va nya gukatega. 9Girumwa gi di nyi embela khigyo: "Lova khuye: 'Va kategide vale va ranidwego guta hodza buzo nya mutshadho wa Nvutana.' " Gi di engedza gi nyi embela khigyo: "Aya khu magana nya lisine ya Nungungulu." 10Eni nyi di thega migondroni gwaye gasi gu gi khozela. Aholu, igyo gi di nyi embela khigyo: "Ahihi! Wona gwadi! Eni nyi githumi kha nga uwe ni vandriyago vatshavbo va girago wufakazi wa Jesu. Nungungulu khuye basi a fanelago gu khozedwa."Khu lisine, wufakazi wa Nungungulu khu liphuvbo nya wuphrofeti. 11Nyi di wona gambe ndzadzini na gu tulegide, gu wonega kavalu nya gu age. Oyu a yi khiledego a gu ranwa pwani khuye nya gutumbege, nya lisine, kholu khu gululama a di fuma ni gu dwana nyimbi. 12Maho yaye ma di ngangamela nga nilo, hungoni gwaye a nani sihugu nya singi. A nani lina li lovidwego, nya gu mwalo a litigo vbavbandze ga uye mune basi. 13Ambade mwendra nya gunegwe novbani. Lina laye khuye: "Lito la Nungungulu." 14Mabutho ya Ndzadzini ma di mu landrela na ma ambade dzingadzu nya wumburi nya guage ngudzu, na ma khilede dzikavalu nya gu age ngudzu. 15Khu kanani gwaye gu di duga litshari nya guvbire gasi gu paya khilo mayigo. Uye a na ma fuma khu ndronga nya simbi; a na gamela maphisoni vbinyu nya likhulo la Nungungulu nya tshivba yatshavbo. 16Vbatshokatunu nya mwendra wu fenengedzago giwunu gyaye, gu lovidwe pwani: "Pfhumu nya dzipfhumu; Mufumeli nya vafumeli." 17Gu di handzamedza nyi wona girumwa gimwegyo na gi emide vbatshani nya lidambo, na gi gu ganela khu tshivba ga sinyoni satshavbo si nga bani si gu vbuvba ndrengelengeni khigyo: "Deluni: tshanganani buzoni nya khongolo wa Nungungulu, 18muta hodza nyama nya vafumeli, nyama nya vathangeli nya dzinyimbi, nyama nya dzingwazi, nyama nya dzikavalu, ni dza vale va khiledego idzo, nyama nya mafumbo yatshavbo, va nya gutshulega ni dzikhumbi, nya vadugwana ni vakhongolo." 19Khavbo avbo, nyi di wona girengo ni vafumeli nya mayigo ni mabutho yawe na va tshanganide gasi gu dwanisa wule a nga bani a khilede kavalu ni dzinyimbi dzaye. 20Aholu girengo gi di modwa gumogo ni muphrofeti nya malipha, a nga girago siliwugiso tshivbani nya girengo, a gu pengisa vatshavbo ava va nga hakhago gifungo nya girengo ni va khozeli nya gifananiso gyaye. Va vavili va rinyidwe na va gu vbanya tsivani nya nilo wu dzurago na wu gu engedzedwa khu solufa. 21Ava vambe va nga tshalago va di songwa khu litshari li nga dugago khu kanani ga wule a nga bani a khilede kavalu. Ni sinyoni satshavbo si di khura khu nyama yawe.


Copyright
Learn More

will be added

X\