GUTULEDWA 18

1Khu hwane nya esi nyi di wona gambe gimbe ngilozi na yi gu tshiga khu ndzadzini ni tshivba nya yikhongolo ngudzu, ni litigo li di wenengedzwa khu gungangamela gwaye. 2Yi di ganela khu tshivba khu lito nya likhongolo khiyo: "Thegide, thegide Bhabhiloniya nya khongolo,gu vbindrugedzide gu khala wulanga nya madhemoni,lipaso nya maphuvbo yatshavbo nya guvivbe,ni sinyoni satshavbo nya gunyenyeze,ni sirengo satshavbo nya likhabi. 3Kholu mayigo yatshavbo ma sede wuvasi nya vbinyu nya wubhayi waye.Vafumeli vatshavbo va tigoni va bhayide naye.Ambari sidambane ni vakanganyisi va tigoni va fumide khu kota nya wubhayi waye." 4Nyi dipwa gambe lito na li gu tshiga khu ndzadzini li ganela khilo: "Dugani khu dhoropani momo, enu vathu vangu,gasi mu si hengeli naye sighoho saye, mu patwa nenu sitsayisoni saye. 5Kholu sighoho saye si wungedzelane kala si gu ghuma damboni,gambe Nungungulu dundrugide mithumo yaye nyambasi yadi. 6Mu bweledzeleni gu vbindrisa guvili guvivba a nga girago.Omu nya gikombe a nga sedza khigyo, thelani sipimo sivili. 7Mu ningeni gutshaniseka ni wuvi nya guningane ni gidhumo,ni gutshamba a nga gupwago, kholu wari khuye khu monyoni gwaye: 'Nyi khade vbagikhalotunu nya wufumu kha nga mufumeli,kha nyiri noni, gambe gima nyi si gupwi wuvi'. 8Khu kharato sitsayiso si mu viredego si nata khu gipitipiti litshigu la limwedo:gufa, gililo, ndzala, a na tsagamiswa khu nilo,kholu Nungungulu a mu lamudego Pfhumu nya tshivba." 9Vafumeli nya mayigo va nga gira naye wubhemba, va ghiya gumogo naye, va na mu lila va gu dzi laya va gu wona wutshi nya guvbiswe gwaye. 10Va na ema khu hwindzo khu gu thava gutshaniseka gwaye, khavo: "Wowe, Wowe! Libango lago uwe lidhoropa nya likhongolo la Bhabhiloniya, lidhoropa nya gutale khu tshivba, u vbohedwe khu gikhati nya gutsayiswe gwago." 11Va nya wugwevo va tigoni va mutigo va ngu mu lila va mu dilela kholu mwalo muthu a na gu va rengelago silo sawe va rengisago: 12ndralama, prata, siwindri nya gukhedzige, dziperola, myendra nya siwunguwungu nya gufuvile, mafumbu yatshavbo nya misimbo nya gunungele, ni sombo nya gugirwe khu magwaha nya dzindzofu, sombo nya guvatwe khu misimbo nya yadi ngudzu, ni sikete ni siwindri nya gu age, 13kinamono, mafura nya gunungele, ni mafura nya gutole, ni libani, ni vbinyu, ni mafura nya guphule khayo, ni wuguvbi, ni mavbila, ni dzimombe, ni dzimbongola, ni dzinvuta, ni dzikavalu, ni dzikareta, ni dzikhumbi ni vathu. 14Va na embela lidhoropa khavo: "Mihandro yile nya guvidzwe eyi hefemulo wago wu nga bani wu yi gola, yi gu thavile yi penga hwindzo; satshavbo silo nya wufumu ni wurendra si dzimede vbafuvbi gwago, gima khu na nga si mana gambe." 15Varengisi vatshavbo nya silo sesi, vale va nga mana gufuma khu kota nya lidhoropa, va na khalela hwindzo, va lila khavo: 16"Wowe, Wowe! Lidhoropa nya likhongolo, li nga bani li ambade myendra nya siwunguwungu, nya gufuvile, nya gumburisedwe khu ndralama, ni siwindri nya gukhedzige, ni dziperola. Khu gikhatinyana nya gi dugwana wu pfhungumugide wufumu nya wukhongolo ngudzu nya guvbindre tengo!" 17Vagimbidzisi nya mataro ni vatshavbo va gimbilago khayo, vamarinyero ni vatshavbo vathu va manago guvbanya khu gu thumela phwani, va di ema khu hwindzo, 18va di womba gimima khu gu wona wutshi nya luvbya laye, khavo: "Khu levbini limbe lidhoropa li nga bani li gu ningana ni lidhoropa leli nya likhongolo?" 19Va di dzi thedzela nguma hungoni, na va gu dilela, valila marongo khavo: "Wowe, Wowe! Libango nya lidhoropa eli nya likhongolo li nga fumisago vatshavbo va nya mataro khu dzi thomba dzaye, liphalalegisidwe khu githugedza." 20Nengelani mu bhuma vbatshani gwaye, ndzadzi, ni enu mwatshavbo va nya gukatega, ni vapostoli, ni vaphrofeti. Kholu Nungungulu lamude khu gu mu phodzela, khu gu tsayisa lidhoropa leli khu mahungu yalo. 21Ngilozi nya tshivba yi di khusa giwindri, nya gikhongolo nya nga gitshindro yi gi rinya nondrwani, khiyo: "Khidzo kharati li na mbembiswago khidzo lidhoropa nya likhongolo la Bhabhiloniya; mwalo a na li wonago gambe. 22Gima kha dzi na pwala gambe umo dzindzimo nya vawombi nya mihwambi, ni vaembeleli, ni vawombi nya sitoliyo ni mipundru. Kha na manega ndrani gwago muvati mwendro meseri nya wevbini thumo, gima kha gu na pwala gambe gudzuma nya gitshindro ndrani gwago. 23Wenengedzo nya kandriya gima kha wu na wenengedza gambe ndrani gwago, kha li na pwala gambe dzinyumbani gwago lito la mwama ni ngadzi, khaguva vasundzi vago vadiri vafumeli nya mayigo, kholu mafu yatshavbo ma pengisidwe khu wuloyi wago." 24Ndrani gwaye wu manidwe novba nya vaprofeti ni va nya gukatega, novba wa vatshavbo vathu va nga songwago mafuni.

will be added

X\