GUTULEDWA 17

1Yi dita ngilozi mweyo nya dzile nya livbandre na dzmbili dzi nga bani dzi pharide livbandre na sivili sikombe, yita ganela ni eni khiyo: "Delu eno, nyi gu nonedza gu lamudwa nya gibhayi gikhongolo gi khalago wubambe nya mati nya linene, 2egi vafumeli va tigoni va nga bhayago nagyo, gi nga levisa vathu va tigoni khu wadwa nya wubhayi waye." 3Yi di nyi yisa giwulani khu liphuvbo. Nyi diya wona nyamayi na khilede girengo nya gufuvile, na gi ambagisedwe malina nya guvale Nungungulu, giri ni livbandre na mivili mihungo ni likhumi dzikheho. 4Nyamayi a di ambade mwendra nya giwunguwungu nya gufuvile, na dzi mburisede khu ndralama, ni siwindri nya gukhedzige. Mandzani gwaye a di pharile gikombe nya ndralama nya gutale khu manyala ni ndzilo nya wubhayi waye. 5Vbagiwombotunu gwaye gu di lovidwe lina nya gupwani sihalo: "Bhabhiloniya nya khongolo, melegi nya sibhayi ni guvivba ga tigoni." 6Nyi di wona nyamayi wule na gu leva khu novba nya va nya gukatega ni novba nya dzifakazi dza Jesu; na nyi mu wone nyi di liwuga ngudzu. 7Aholu ngilozi yi di nyi embela khiyo: "Khu ginani u liwugago? Nyi na gu tshamusela sihalo nya nyamayi ni girengo gi mu rwalago, gi gu ni livbandre na mivili mihungo, ni likhumi dzikheho. 8"Girengo u nga gi wona gi diromo, aholu gi mwalo gambe; gya gu duga khu phalani giya mbembiswa; vathu va tigoni, vale malina yawe ma sa lowago libhukuni nya womi, gu khugela nya guvangwe litigo, va na samadziswa khu gu wona gu khavo girengo gi nga bani giromo, gi mwalo gambe, aholu gi na tumbuluga nya luphye. 9"Avba guvbwetega hungo nya guti ni mapimo. Livbandre na mivili mihungo yi thudwago, khu livbandre na sivili sigomo si khaledwego khu nyamayi. 10Gambe khu livbandre na vavili vafumeli: livbandre nya avo va thegide, moyo a nga gu fuma, mumbe a si gu vbohi. Aholu a gu vboha a na fuma gikhatinyana nya gidugwana basi. 11Girengo gi nga bani giromo, olu gi gu mwalo gambe, igyo nigyo gya gu tshamusela mumbe mufumeli nya livbandre na wuraru; a guromo tengoni nya vale nya livbandre na vavili vayago vaya mbemba. 12Likhumi dzikheho u nga dzi wona khu likhumi vafumeli vale va si gu hakhiswigo gidhumo nya wufumu, aholu, ndrani nya gikhatinyana va na kabana wufumu ni girengo. 13Vatshavbo va na ni mapimo mamowo, va gu thumela girengo, va vega tshivba yawe nya wufumu mandzani nya girengo. 14Ava va na wugela Nvutana va yi dwanisa, aholu va na padwa khu Nvutana, kholu khiyo Pfhumu nya dzipfhumu, Mufumeli nya vafumeli. Gumogo Naye vale va ranidwego, va khodwago, va khalago Naye, va na pala navo." 15Ngilozi yi di nyi embela gambe khiyo: "Mati u nga ma wona ma na khaledwe khu nyamayi nya gibhayi khu mafumbu, ni mayigo ni malimi. 16Likhumi dzikheho u dzi wonego ni girengo, si na wugela nyamayi nya gibhayi si mu gira gisiwana si mu diga wumbwiri, si hodza nyama yaye, si yi vbisa niloni. 17Kholu Nungungulu vegide myonyoni gwawe gasi gu gira guhaladza gwaye, va dzumela gu thumela girengo kala ma tadzisega magana ya Nungungulu. 18Nyamayi u mu wonego khu lidhoropa nya likhongolo li fumelago vbatshani nya vafumeli va tigoni."

will be added

X\