GUTULEDWA 16

1Eni nyi dipwa lito nya likhongolo na li gu duga khu Nyumbani ga Nungungulu, li gu embela dzingilozi dza Nungungulu khilo: "Indrani mu ya vbaladza tigoni sikombe satshavbo nya livbandre na sivili si tadego khu likhulo la Nungungulu." 2Yi di khuga ngilozi nya guhegule yiya vbaladza gikombe gyaye tigoni. Va di tedwa khu silondra nya guhagele nya guthise ngudzu, vathu vale va nga bani va vegidwe gifungo nya girengo, ni vale va nga khozelago gifananiso gyaye. 3Ngilozi nya wuvili yi di vbaladza gikombe gyaye linene, li vbindrugedza li gu khala novba khwatshi khwa muthu nya gufe. Si difa sivangwa satshavbo sa linene. 4Ngilozi nya wuraru yi di vbaladza gikombe gyaye mitsongoni ni sifefeni nya mati. Si vbindrugedza si gu khala novba. 5Khavbo avbo, nyi dipwa girumwa gi fumago matini na gi gu ganela khigyo: "U lulamide uwe, Pfhumu, u guromo, u nga bani uromo!Gambe u agide kholu u lamudego khu lisine. 6U va sedziside novba,kholu va vbaladzide novba wa va nya gukatega ni vaprofeti,va fanedwe khu tsayiso yoyo." 7Nyi dipwa gambe lito khu giluveloni li ganela khilo: "Khu lisine, Pfhumu Nungungulu nya tshivba yatshavbo, gulamula gwago khwa lisine, gu lulamide." 8Ngilozi nya wuna yi di vbaladza gikombe gyaye damboni, gi ningwa tshivba nya guvbise vathu khu nilo. 9Vathu va di hahudwa khu lihani nya likhongolo, va guvbya nya guthise, va gu vala lina la Nungungulu, a gu ni tshivba nya gurumele sitsayiso sesi; aholu, kha va dzi kodza gu vbindrugedza va rungudza Nungungulu. 10Ngilozi nya livbandre yi di vbaladza gikombe gyaye vbatshani nya gikhalo nya wufumu nya girengo, mufumu wa iyo wu di fenengedzwa khu gidema. Vathu va di dzi hodzedzela malimi khu wuvi. 11Va di vala Nungungulu wa Ndzadzini, khu kota nya gutshaniseke gwawe khu silondra nya guhagele. Aholu kha va dzi kodza gu vbindrugedza va gu diga mithumo yawe nya guvivbe. 12Ngilozi nya livbandre na mweyo yi di vbaladza gikombe gyaye tsongoni nya khongolo wa Eufrate, mati yaye ma di banga gasi gutulega ndzila nya guvbindre vafumeli va khuga-Dambo. 13Khavbo avbo, nyi di wona maphuvbo mararu nya guvivbe nya gufanane ni vanyakhele na ma gu duga khu kanani ga Mwamilambo, ni kanani ga girengo, ni kanani ga muphrofeti nya malipha. 14Aya khu maphuvbo nya mandriki ma girago siliwugiso, ma yago ga vafumeli vatshavbo va mafuni gasi gu va tshanganisa va ta dwana nyimbi nya Litshigu Likhongolo la Nungungulu nya tshivba yatshavbo. 15(Khalani na mu dzi dongisede kholu nyi na vboha kha nga mbafa; kategide wule a lirelago na vegiside dzingandzu dzaye gasi a si gimbili wumbwiri, dzitshoni dzaye dzi gu wonwa khu vathu). 16Maphuvbo ya mararu ma di tshanganisa vafumeli wulangani wu ranwago khu gihebheru pwani "Hermagedoni." 17Ngilozi nya livbandre na wuvili yi di vbaladza gikombe gyaye ndrengelengeni. Gu di duga lito nya likhongolo khu vbagikhalotunu nya Wufumu ndrani nya Nyumba ya Nungungulu, khilo: "Satshavbo si girerigide." 18Khavbo avbo, gu di lasa, gu pwala dzihuwa, gu dzuma mabara, gu handzamedza girevareva nya gu gima na gima gi di si gu wonwi khu muthu; adiri girevareva nya gikhongolo ngudzu. 19Lidhoropa nya likhongolo li di pandrega khu sipandre siraru, madhoropa ya va nya mayigo ma gu khungumuga. Nungungulu a di dundruga Bhabhiloniya nya gukhongolo a gu sedza gikombe nya guvile khu vbinyu nya likhulo laye. 20Sidwa satshavbo si di dzama, sigomo si di mwalalega. 21Khavbo avbo, khu ndzadzini gu di thega maralala nya gulemele kha nga ndzadzi nya siwindri nya sikhongolo ngudzu. Vathu va di vala Nungungulu khu kota nya gitsayiso nya maralala kholu gidiri gikhongolo ngudzu.


Copyright
Learn More

will be added

X\