GUTULEDWA 14

1Khavbo avbo, nyi di wona Nvutana na yi emide gigomoni gya Siyoni. Gumogo ni Nvutana va diromo lizana ni magumi mana na mana mazana mazana nya vathu (144.000) va nga bani va lovidwe vbagiwombotunu lina la Nvutana ni la Babe Waye. 2Nyi dipwa gambe gudzuma ndzadzini kha nga linene, ni libara nya likhongolo, aholu dzindzeveni gwangu gudi pwala khwatshi lito nya hwambi wu wombwago. 3Vale nya 144.000 vathu va di gu embelela ndzimo nya yipya mbeli nya gikhalo nya wufumu wa Nungungulu, mahoni nya sivangwa sa sina nya guvbanye ni manganagana. Vbavbandze nya vale 144.000 vathu vanga dzegiswago vbakari nya litigo, mwalo mumbe muthu a nga bani a gu dzi kodza gu emba ndzimo yoyo. 4Ava khu vale va nga mba dzi nyenyezisa khu vanyamayi, vale va nga khala na va dzi vegiside; khavo va landrelago Nvutana malangani yatshavbo. Va di dzegiswa vbakari nya vathu nga matiwula nya siluvelo ga Nungungulu ni ga Nvutana. 5Kanani gwawe gima kha ga manega, wupembi, va tumbegide mbelinya mufumo wa Nungungulu. 6Nyi di wona gambe gimbe ngilozi na yi gu vbuvba ndzadzini. Yi rumidwe guresa nayo nya wuphya nya gupindruge; guta embela vathu vatshavbo va tigoni, nya mafumbu, ni mahundzu, ni malimi yatshavbo. 7Ngilozi yi di huwelela khu tshivba khigyo: "Ningani githawo Nungungulu mu dhumiseni Nungungulu kholu gi vbohide gikhati gyaye nya gulamule! Khozelani Muvangi nya ndzadzi ni mafu ni linene ni sifefe nya mati." 8Gu di handzamedza yimbe ngilozi nya wuvili yi huwelela khiyo: "Mbembide! Mbembide Bhabhiloniya lidhoropa nya likhongolo! Uye a nga levisa mayigo yatshavbo khu vbinyu nya likhulo nya wubhemba waye." 9Khavbo avbo, gu di handzamedza ngilozi nya wuraru yi ganela khu tshivba ngudzu khiyo: "Wule a na gu khozelago girengo ni gifananiso gyaye, mwendro gu hakha gifungo gyaye vbagiwombotunu, mwendro mandzani, 10uye a na sela vbinyu nyamba futungedzwa nya likhulo la Nungungulu, li guhudwago ni tshivba yaye yatshavbo gikombeni nya gulamule. Gambe a na dayiswa khu nilo ni enxofre mbeli nya dzingilozi nya gukatege ni Nvutana. 11Gu na tuviga wutshi nyamba vbela khu niloni nya gu saniseke gwawe. Vatshavbo va khozelago girengo ni githombe gyaye, mwendro gu vegisa gifungo nya lina laye va na saniseka nyamba hefemula wutshigu ni mihani." 12Khigyo egi gikhati nya dzindrena nya gukhodwe, vale va timiselago va vegisa milayo ya Nungungulu ni gukhodwa ga Jesu. 13Nyi dipwa lito ndzadzini khilo: "Lova: va kategide vale, gukhugela muhuno, va na felago mandzani ga Pfhumu." Liphuvbo li di khilo: "Ina, khidzo furi! Mu gu garalani gwawe va na mana guhefemula, kholu mithumo yawe yi ngu va landrela." 14Nyi di wona gambe moyo nya gufanane ni Mwamana wa Muthu na khade vbatshani nya lipfhi nya guage. A na ambade gihugu nya wufumu nya ndralama hungoni, na pharide givbwero nya gulodzwe mandzani gwaye. 15Ngilozi mweyo yi di duga khu Nyumbani ga Nungungulu, yi khusedza lito yi ganela ni wule a nga bani a khade vbatshani nya lipfhi, khiyo: "Dzega givbwero gyago u pilele kholu gikhati nya guvbwere givbohide. Mbewu ya tigoni yi vidzidwe." 16Khavbo avbo, wule a nga bani a khade lipfhini a di tshisa givbwero mafuni, a gu vbwera litigo. 17Gimbe girumwa gi di duga gambe khu Nyumbani ga Nungungulu ya ndzadzini na gi pharide nigyo givbwero nya guvbire. 18Khavbo avbo, gi di duga yimbe ngilozi khu giluveloni, ni tshivba nya gufumele nilo, yi di khusedza lito khu tshivba yi embela ngilozi yile gi nga bani yi pharide givbwero nya guvbire, khiyo: "Phara givbwero gyago nya guvbire u pilela sitsatsa nya dziwuvha dza tigoni kholu dzi tshanganede guvidzwa." 19Ngilozi yi di tshisa givbwero mafuni yi pilela dziwuvha dza tigoni yi dzi thedzela sungwani nya likhulo la Nungungulu. 20Dziwuvha dzedzi dzi di ya sugedwa vbavbandze nya lidhoropa. Novba nya wungi ngudzu wu di vbalagela khu sungwani wu tala kala gu manela matomu nya dzikavalu. Wu langaladza kharato gipandre nya mazana mararu mipfhuka (300, Km.).

will be added

X\