GUTULEDWA 13

1Khavbo avbo, nyi di ema khu funguni nyi wona gambe girengo na gi tumbuluga khu linene. Girengogyo gidiri ni livbandre na mivili mihungo ni likhumi dzikheho, kheho ni kheho yi di ambade gihugu nya wufumu. Mihungoni gwaye gu di lovidwe malina nya guvale Nungungulu. 2Girengo nyi nga gi wonago gi di gu fanana ni likhamba. Sandza nya migondro yaye khwatshi khesi nya yingwe, likana li di gu fanana neli nya nghala. Mwamilambo a di gi ninga tshivba yaye, ni gikhalo gyaye, ni wufumu nya wukhongolo. 3Hungo moyo nya girengo wu di pandridwe phandza nya guvbwete gufa. Aholu, phandza yakone yi di vbode. Litigo latshavbo li di liwuga li gu landrisela girengo. 4Vathu va di khozela mwamilambo a nga ningago tshivba nya yi khongolo girengo. Va wuya va khozela girengo khavo: "Khu mani a dzi kodzago gu palisana tshivba ni girengo,khu mani a na gu dzi kodzago gu dwana nagyo?" 5Girengo gi di dzumedziswa gu ganela magana nya gulemele, nya guvale Nungungulu, gipimo nya magumi mana na mivili migima. 6Girengo gi di tula likana gi gu vala Nungungulu ni lina laye, ni tabernakele yaye ni vatshavbo va vbanyago ndzadzini. 7Gi ningidwe tshivba nya gudwanise nyimbi gi pala sihathwa sa Nungungulu, ni tshivba nya gufume mafumbu yatshavbo, ni malimi, ni mayigo yatshavbo. 8Vathu vatshavbo va tigoni va di khozela girengo, vbavbandze ga vale basi va lovedwego malina yawe, gu khugela nya guvangwe litigo, omu nya libhuku nya guvbanye li vegisidwego khu Nvutana yi payidwego. 9Wule a gu ni dzindzeve a napwe. 10Oyu a fanedwago khu gu bela wugumbini a na yiswa wugumbini, oyu a fanelago gu songwa khu litshari a nafa khu litshari. Khigyo egi gikhati nya wundrena ni gu thembega nya vakhodwa. 11Khu hwane nya iso nyi di wona gimbe girengo na gi gu tumbuluga khu tigoni gidiri ni dzikheho dzimbili kha nga nvuta aholu gi di ganela kha nga mwamilambo. 12Girengo gegi khigyo gi gimbidzisago mufumu watshavbo nya girengo nya guhegule kha nga gyandza gyaye; khigyo gi rumago litigo ni vathu vatshavbo va vbanyago ga ilo va khozela girengo nya guhegule, egi nya phandza nya guvbole. 13Girengo gegi nya wuvili gya gu gira siliwugiso nya sikhongolo. Gi ngu dzi kodza gu tshisa mafuni nilo wa ndzadzini wu wonwa khu vathu. 14Gi ngu pengisa vathu va tigoni khu siliwugiso gi ningidwego gu gira khu tshivba nya girengo nya guhegule. Gya gu senga vathu va tigoni va gira gifananiso nya gudhumise girengo nya gukokwe phandza khu litshari gi wuya gi vbanya. 15Gi ningidwe gambe tshivba nya gu ninge hefemulo gifananiso nya girengo, gasi gi kodza gu ganela ni tshivba nya gusonge vatshavbo vale va si khozeligo githombe nya girengo. 16Gi di ruma vatshavbo vathu, sanana ni vakhongolo, sitetema ni sisiwana va nya gutshulega ni dzikhumbi, vatshavbo gu vbweta va vegwe gifungo mandzani ya nyamudye, mwendro vbagiwombotunu. 17Khu guralo, vale va gu ni gifungo, mwendro lina nya girengo, mwendro numeri nya lina la igyo khavo basi va dzumedziswago gu renga mwendro gu rengisa silo. 18Avba guvbwetega wugengeli! Wule a gu ni mapimo a na tshamusele numeri nya girengo, kholu khiyo numeri nya muthu. Numeri yakone kheyi: livbandre na limwedo mazana, ni livbandre na limwedo magumi ni livbandre na mweyo (666).

will be added

X\